LinVB - Zechariah - 6

6:1  Nafungoli miso lisusu, namoni limoni : Namoni makalo manei mazalaki koya kati ya ngomba ibale ; ngomba ina izalaki ya mbe­ngi.

6:2  Likalo lya yambo libendani na farasa ya nzoto etane, likalo lya mabale na farasa ya nzoto eindo,

6:3  likalo lya masato na farasa ya nzoto mpembe, likalo lya manei na farasa ya nzoto matono matono.

6:4  Na­tuni anzelu oyo azalaki koloba na ngai : « Mokonzi wa ngai, makalo mana malakisi nini ? »

6:5  Anzelu ayanoli : « Makalo maye matelemeki o boso bwa Mokonzi wa nse mobi­mba mazali kokende nzela ya mi­mpepe minei.

6:6  Farasa ya nzoto ei­ndo izali kokende o ekolo ya Nordi, iye ya nzoto mpembe o ekolo ya Westi, mpe iye ya nzoto matono matono o ekolo ya Sudi. »

6:7  Farasa ya nzoto etane ebandi kokende, na mposa enene ya kokoma o nse mobimba. Mokonzi atindi yango : « Bo­kende kokatisa nse mobimba. » Mpe ikei kokatisa nse mobimba.

6:8  Abe­ngi ngai, alobi : « Tala, baye bakokende o Nordi, bakokitisa motema mwa ngai o ekolo ya Nordi. »

6:9  Yawe alobi na ngai maloba maye :

6:10  Kongolo mabonza ma bato bautaki o boombo : Keldai, Tobia na Yedaya ; mpe kende o ndako ya Yosia, mwana wa Sefanya, oyo auti o Babilon sikawa.

6:11  Kamata wolo na palata, sala enkoti mpe tia yango o motó mwa nganga mokonzi Yozue, mwana wa Yosadak.

6:12  Na nsima oko­loba na ye : Yawe wa bokasi bonso alobi boye : Tala moto oyo azali na nkombo ‘Eboto ya sika’, akokola o esika azali ; akotonga Tempelo ya Yawe lisusu.

6:13  Ye moto akotonga Tempelo ya Yawe ; ye akolata bilamba bya bokonzi, akofanda o ngwende ya ye mpe akoyangela bato. Nganga Nzambe mpe akofanda o ngwende esusu ; bango babale bakoyokana malamu mpe­nza.

6:14  Enkoti ya bokonzi ekotikala o Tempelo ya Yawe bo elembo ya kokanisa Keldai, Tobia na Yedaya mpe mwana wa Sefanya.

6:15  Na nsima baye bazali mosika bakoya kotonga lisusu Tempelo ya Yawe. Bokoyeba bongo ’te Yawe wa bokasi bonso atindi ngai epai ya bino. Yango ekosalema soko botosi monoko mwa Yawe Nzambe wa bino o makambo manso.