TpiKJPB - Acts - 6

6:1  ¶ Na long ol dispela de, taim namba bilong ol disaipel i kamap planti moa, ol man Grik i kirap na tok baksait i birua long ol man Hibru, bilong wanem, ol i slek long lukautim ol meri man bilong ol i dai pinis bilong ol long wok bilong olgeta wan wan de.

6:2  Nau dispela twelpela i singautim bikpela lain tru bilong ol disaipel i kam long ol, na tok, Em i no gutpela tingting long mipela i mas lusim tok bilong God, na wokim wok long ol tebol.

6:3  Olsem na, ol brata, yupela painim gut namel long yupela sevenpela man i gat ripot long pasin i no gat giaman, pulap long Holi Spirit na save tru, husat mipela i ken makim bilong bosim dispela wok.

6:4  Tasol mipela bai givim mipela yet, olgeta, taim long prea, na long wokim wok bilong tok bilong God.

6:5  Na dispela toktok i amamasim bel bilong dispela bikpela lain tru olgeta. Na ol i makim Stiven, man i pulap long bilip tru na long Holi Spirit, na Filip, na Prokoras, na Naikenor, na Timon, na Parmenas, na Nikolas, wanpela man Antiok i bihainim lotu bilong ol Ju,

6:6  Husat ol i putim long ai bilong ol aposel. Na taim ol i bin beten, ol i putim ol han bilong ol antap long ol.

6:7  Na tok bilong God i kamap bikpela moa. Na namba bilong ol disaipel i kamap planti moa tru insait long Jerusalem. Na bikpela lain bilong ol pris i bihainim tok bilong bilip tru.

6:8  ¶ Na Stiven, pulap long bilip tru na pawa, i mekim ol bikpela samting bilong winim tingting na ol mirakel namel long ol manmeri.

6:9  Nau sampela i kirap bilong sinagog, dispela ol i kolim sinagog bilong ol Friman, na ol man Sairini, na ol man Aleksandria, na bilong ol bilong Silisia na bilong Esia, i tok pait wantaim Stiven.

6:10  Na ol i no inap long sanap na birua long save tru na spirit, dispela i givim em toktok.

6:11  Nau ol i kisim ol man bilong tok giaman, husat i tok, Mipela i bin harim em toktok long ol tok bilas i birua long Moses, na i birua long God.

6:12  Na ol i kirapim ol manmeri, na ol lapun hetman, na ol man bilong rait, na ol i kam long em, na holimpas em, na bringim em long kaunsil,

6:13  Na sanapim ol giaman witnes, husat i tok, Dispela man i no lusim pasin bilong toktok long ol tok bilas i birua long dispela ples holi, na long lo.

6:14  Long wanem, mipela i bin harim em tok, long dispela Jisas bilong Nasaret bai bagarapim dispela ples olgeta, na em bai senisim ol dispela kastam Moses i givim long yumi.

6:15  Na olgeta husat i sindaun long kaunsil, taim ol i lukluk strong long em, i lukim pes bilong em olsem em i bin stap pes bilong wanpela ensel.