TpiKJPB - Acts - 16

16:1  ¶ Nau em i kam long Derbi na Listra. Na, lukim, wanpela disaipel i stap long dispela hap, husat nem bilong em em Timotias, pikinini man bilong wanpela meri, husat em i meri Ju, na i bilip, tasol papa bilong em em i wanpela Grik,

16:2  Husat i gat gutpela ripot long ol brata husat i stap long Listra na Aikoniam.

16:3  Pol i gat laik long em i ken go ausait wantaim em. Na em i kisim em na katim skin bilong em, bilong tingim ol Ju husat i stap long ol dispela hap. Long wanem, ol olgeta i save long papa bilong em em i wanpela Grik.

16:4  Na taim ol i wokabaut namel long ol biktaun, ol i givim ol ol strongpela tokaut long bihainim, dispela ol aposel na ol lapun hetman husat i stap long Jerusalem i makim.

16:5  Na olsem tasol ol sios i kisim strong long bilip tru, na namba bilong ol i kamap bikpela moa olgeta wan wan de.

16:6  ¶ Nau taim ol i bin go namel long Frijia na hap graun bilong Galesia, na Holi Spirit i tambuim ol long autim tok long Esia,

16:7  Bihain long ol i kam long Misia, ol i gat laik long go insait long Bitinia. Tasol Spirit i no larim ol.

16:8  Na taim ol i wokabaut klostu long Misia ol i kam daun long Troas.

16:9  Na wanpela driman samting i kamap ples klia long Pol long nait. I gat wanpela man Masedonia i sanap, na askim em plis, i spik, Kam hapsait i kam long Masedonia, na helpim mipela.

16:10  Na bihain long em i bin lukim dispela driman samting, wantu mipela i traim long go long Masedonia, tru tumas, mipela i kisim strongpela bilip long Bikpela i bin singautim mipela long autim gutnius long ol.

16:11  Olsem na taim mipela i lusim Troas, mipela i kam wantaim wanpela stretpela rot i kam long Samotrasia, na de bihain long Niapolis.

16:12  Na mipela i lusim dispela ples i go long Filipai, dispela em i nambawan biktaun long dispela hap bilong Masedonia, na wanpela ples narapela kantri i bosim. Na mipela i stap long dispela biktaun sampela de.

16:13  Na long sabat mipela i go ausait long biktaun klostu long arere bilong riva, we ol man i save mekim prea. Na mipela i sindaun, na toktok long ol meri husat i go long dispela hap.

16:14  Na wanpela meri husat nem bilong em em Lidia, meri bilong salim purpelpela samting long mani, bilong biktaun Taiataira, husat i lotuim God, i harim mipela, husat bel bilong em Bikpela i opim, inap long em i givim ia long ol dispela samting Pol i toktok long en.

16:15  Na taim em i kisim baptais, na hauslain bilong em, em i askim mipela plis strong, i spik, Sapos yupela i bin jasim mi olsem mi stap meri yu inap bilip long em i go long Bikpela, kam insait long haus bilong mi, na stap long dispela hap. Na em i pulim mipela strong.

16:16  ¶ Na em i kamap olsem, taim mipela i go long prea, wanpela yangpela meri husat wanpela spirit bilong glasman pasin i holimpas i bungim mipela, husat i bringim ol bosman bilong em planti winmani long glasman pasin.

16:17  Em stret i bihainim Pol na mipela, na singaut, i spik, Ol dispela man i stap ol wokboi bilong God i antap olgeta, husat i soim yumi rot bilong kisim bek.

16:18  Na em i mekim dispela planti de. Tasol Pol, taim dispela i bagarapim bel bilong em, i tanim na tokim dispela spirit, Mi tok strong long yu long nem bilong Jisas Kraist long kam ausait long em. Na em i kam ausait long dispela aua stret.

16:19  Na taim ol bosman bilong em i luksave olsem hop bilong ol winmani bilong ol i go pinis, ol i holimpas Pol na Sailas, na pulim ol i go long ples maket i go long ol hetman,

16:20  Na bringim ol long ol kiap, i spik, Dispela tupela man, husat i ol Ju, i kirapim planti moa trabel yet long biktaun bilong yumi,

16:21  Na ol i skulim ol man long ol kastam, dispela i tambu long lo bilong yumi long kisim, o long bihainim, taim yumi stap ol lain Rom.

16:22  Na bikpela lain tru i kirap i bung wantaim i birua long ol. Na ol kiap i brukim na rausim ol klos bilong ol i go, na tok strong long ol long paitim ol.

16:23  Na taim ol i bin putim planti mak bilong wip antap long ol, ol i tromoi tupela i go insait long kalabus, na givim wok long wasman bilong kalabus long lukautim tupela gut,

16:24  Husat, taim em i kisim kain wok olsem, i subim ol i go insait long insait kalabus, na mekim ol lek bilong ol i pas strong long ol diwai i kalabusim ol hanlek.

16:25  ¶ Na long belo biknait Pol na Sailas i beten, and singing ol song bilong litimapim nem bilong God. Na ol kalabusman i harim ol.

16:26  Na wantu i gat wanpela bikpela guria, inap long ol as ston bilong kalabus i seksek. Na wantu olgeta dua i op, na olgeta hankap samting bilong olgeta wan wan man i go lus.

16:27  Na taim wasman bilong kalabus i kirap long slip bilong em, na taim em i luksave long ol dua bilong kalabus i op pinis, em i pulim bainat bilong em i kam ausait, na em i gat laik long kilim em yet, taim em i ting olsem ol kalabusman i bin ranawe.

16:28  Tasol Pol i singaut wantaim bikpela nek, i spik, No ken bagarapim yu yet. Long wanem, mipela olgeta i stap hia.

16:29  Nau em i singaut long kisim wanpela lait, na em i ran hariap i go insait, na kam wantaim guria, na pundaun long ai bilong Pol na Sailas,

16:30  Na em i bringim ol i kam ausait, na tok, Ol bikman, mi mas mekim wanem samting na God bai kisim bek mi?

16:31  Na ol i tok, Bilip long Bikpela Jisas Kraist, na God bai kisim bek yu, na hauslain bilong yu.

16:32  Na ol i toktok long em long tok bilong Bikpela, na long olgeta husat i stap long haus bilong em.

16:33  Na em i kisim ol long dispela aua stret bilong nait, na wasim ol mak bilong wip bilong ol. Na em i kisim baptais, em na olgeta bilong em, kwiktaim.

16:34  Na taim em i bin bringim ol i go insait long haus bilong em, em i putim kaikai long ai bilong ol, na wokim amamas tru, taim em i bilip long God wantaim olgeta hauslain bilong em.

16:35  ¶ Na taim em i san pinis, ol kiap i salim ol wokman bilong kot, i spik, Lusim ol dispela man.

16:36  Na wasman bilong kalabus i toksave long Pol long dispela toktok, Ol kiap i bin salim tok long larim yutupela go. Olsem na nau go, na go wantaim bel isi.

16:37  Tasol Pol i tokim ol, Ol i bin paitim mipela ples klia taim mipela i no lus long kot, taim mipela i stap ol man Rom, na ol i bin tromoi mipela long kalabus. Na nau ating ol bai subim mipela i go ausait hait? Nogat tru. Tasol larim ol i kam ol yet na kisim mipela i go ausait.

16:38  Na ol wokman bilong kot i toksave long ol dispela toktok i go long ol kiap. Na ol i pret, taim ol i harim olsem ol i ol man Rom.

16:39  Na ol i kam na askim ol plis strong, na bringim ol i kam ausait, na askim ol long lusim dispela biktaun i go ausait.

16:40  Na ol i go ausait long kalabus, na go insait long haus bilong Lidia. Na taim ol i bin lukim ol brata, ol i givim bel isi long ol, na go.