SP - Deuteronomy - 19

19:1  כי יכרית יהוה אלהיך את הגוים אשר יהוה אלהיך נתן לך את ארצם וירשתם וישבת בעריהם ובבתיהם

19:2  שלש ערים תבדיל לך בתוך ארצך אשר יהוה אלהיך נתן לך לרשתה

19:3  תכן לך הדרך ושלשת את גבול ארצך אשר ינחילך יהוה אלהיך והיה לנוס שמה כל רצח

19:4  וזה דבר הרצח אשר ינוס שמה וחי אשר יכה את רעהו בבלי דעת והוא לא שנא לו מתמול שלשום

19:5  ואשר יבוא את רעהו ביער לחטב עצים ונדח ידו בגרזן לכרת העץ ונשל הברזל מן העץ ומצא את רעהו ומת הוא ינוס אל אחת מן הערים האלה וחי

19:6  פן ירדף גאל הדם אחרי הרצח כי יחם לבבו והשיגו כי ירבה הדרך והכהו נפש ולו אין משפט מות כי לא שנא הוא לו מתמול שלשום

19:7  על כן אנכי מצוך לאמר שלש ערים תבדל לך

19:8  ואם ירחיב יהוה אלהיך את גבולך כאשר נשבע לאבתיך ונתן לך את כל הארץ אשר דבר לתת לאבתיך

19:9  כי תשמר את כל המצוה הזאת לעשותה אשר אנכי מצוך היום לאהבה את יהוה אלהיך וללכת בדרכיו כל הימים ויספת לך עוד שלש ערים על השלש האלה

19:10  ולא ישפך דם נקיא בקרב ארצך אשר יהוה אלהיך נתן לך נחלה והיה עליך דמים

19:11  כי יהיה איש שנא לרעהו וארב לו וקם עליו והכהו נפש ומת ונס אל אחת . הערים האלה

19:12  ושלחו זקני עירו ולקחו אתו משם ונתנו אתו ביד גאל הדם והומת

19:13  לא תחוס עינך עליו ובערת הדם הנקיא מישראל וטוב לך

19:14  לא תסיג גבול רעך אשר גבלו ראישונים בנחלתך אשר תנחל בארץ אשר יהוה אלהיך נתן לך לרשתה

19:15  לא יקום עד אחד באיש לכל עון ולכל חטא בכל חטא אשר יחטא על פי שני עדים או על פי שלשה עדים יקום דבר

19:16  וכי יקום עד חמס באיש לענות בו סרה

19:17  ועמדו שני האנשים אשר להם הריב לפני יהוה לפני הכהנים והשפטים אשר יהיו בימים ההם

19:18  ודרשו השפטים הייטב והנה עד שקר העד שקר ענה באחיו

19:19  ועשיתם לו כאשר זמם לעשות לאחיו ובערת הרע מקרבך

19:20  והנשארים ישמעו וייראו ולא יוסיפו עוד לעשות כדבר הרע הזה בקרבך

19:21  לא תחוס עינך נפש בנפש עין בעין שן בשן יד ביד רגל ברגל