SPVar - Deuteronomy - 25

25:1  כי יהיה ריב בין אנשים ונגשו אל המשפט ושפטום והצדיקו את הצדיק והרשיעו את הרשע

25:2  והיה אם בן הכות הרשע והפילו השפט והכהו לפניו כדי רשעתו במספר

25:3  ארבעים יכנו לא יסף פן יסף להכתו על אלה מכה רבה ונקלה אחיך לעיניך

25:4  לא תחסם שור בדישו

25:5  כי ישבו אחים יחדו ומת אחד מהם ובן אין לו לא תהיה אשת המת החוצה לאיש זר יבמה יבוא אליה ולקחה לו לאשה ויבמה

25:6  והיה הבן הבכור אשר תלד יקום על שם אחיו המת ולא ימחה שמו מישראל

25:7  ואם לא יחפץ האיש לקחת את יבמתו ועלתה יבמתו השערה אל הזקנים ואמרה מאן יבמי להקים לאחיו שם בישראל לא אבה יבמי

25:8  וקראו לו זקני עירו ודברו אליו ועמד ואמר לא חפצתי לקחתה

25:9  ונגשה יבמתו אליו לעיני הזקנים וחלצה נעלו מעל רגלו וירקה בפניו וענתה ואמרה ככה יעשה לאיש אשר לא יבנה את בית אחיו

25:10  ונקרא שמו בישראל בית חלוץ הנעל

25:11  כי ינצו אנשים יחדו איש ואחיו וקרבה אשת אחד להציל את אישה מיד מכהו ושלחה את ידה והחזיקה בבשרו

25:12  וקצת את כפה לא תחוס עינך

25:13  לא יהיה לך בכיסך אבן ואבן גדלה וקטנה

25:14  לא יהיה לך בביתך איפה ואיפה גדלה וקטנה

25:15  אבן שלמה וצדק יהיה לך איפה שלמה וצדק יהיה לך למען יארכון ימיך על האדמה אשר יהוה אלהיך נתן לך

25:16  כי תועבת יהוה אלהיך כל עשה אלה כל עשה עול

25:17  זכר את אשר עשה לך עמלק בדרך בצאתכם ממצרים

25:18  אשר קרך בדרך ויזנב בך כל הנחשלים אחריך ואתה עיף ויגע ולא ירא אלהים

25:19  והיה בהניח יהוה אלהיך לך מכל איביך מסביב בארץ אשר יהוה אלהיך נתן לך נחלה לרשתה תמחה את זכר עמלק מתחת השמים לא תשכח