SPVar - Deuteronomy - 15

15:1  מקץ שבע שנים תעשה שמטה

15:2  וזה דבר השמטה שמט כל בעל משא ידו אשר ישא ברעהו לא יגש את רעהו את אחיו כי קרא שמטה ליהוה

15:3  את הנכרי תגש ואשר יהיה לך את אחיך תשמט ידך

15:4  אפס כי לא יהיה בך אביון כי ברוך יברכך יהוה אלהיך בארץ אשר יהוה אלהיך נתן לך נחלה לרשתה

15:5  רק אם שמע תשמע בקול יהוה אלהיך לשמר ולעשות את כל המצוה הזאת אשר אנכי מצוך היום

15:6  כי יהוה אלהיך ברכך כאשר דבר לך והעבטת גוים רבים ואתה לא תעבט ומשלת בגוים רבים ובך לא ימשלו

15:7  כי יהיה בך אביון מאחד אחיך באחת שעריך בארץ אשר יהוה אלהיך נתן לך לא תאמץ את לבבך ולא תקפץ את ידך מאחיך האביון

15:8  כי פתח תפתח ידך לו העבט תעביטנו די מחסרו אשר יחסר לו

15:9  השמר לך פן יהיה דבר עם לבבך בליעל לאמר קרובה שנת השבע שנת השמטה ורעה עינך באחיך האביון ולא תתן לו וקרא עליך אל יהוה והיה בך חטא

15:10  נתן תתן לו ולא ירע בלבבך בתתך לו כי בגלל הדבר הזה יברכך יהוה אלהיך בכל מעשיך ובכל משלח ידיך

15:11  כי לא יחדל האביון מקרב הארץ על כן אנכי מצוך לאמר פתח תפתח ידך לאחיך לעניך ולאביונך בארצך

15:12  כי ימכר לך אחיך העברי או העבריה ועבדך שש שנים ובשנה השבעית תשלחנו חפשי מעמך

15:13  וכי תשלחנו חפשי מעמך לא תשלחנו ריקם

15:14  העניק תעניק לו מצאנך ומגרנך ומיקבך כאשר ברכך יהוה אלהיך תתן לו

15:15  וזכרת כי עבד היית בארץ מצרים ויפדך יהוה אלהיך על כן אנכי מצוך את הדבר הזה היום

15:16  והיה כי יאמר אליך לא אצא מעמך כי אהבך ואת ביתך כי טוב לו עמך

15:17  ולקחת את המרצע ונתת באזנו ובדלת והיה לך עבד עולם ואף לאמתך תעשה כן

15:18  ולא יקשה בעיניך בשלחך אתו חפשי מעמך כי משנה שכר שכיר עבדך שש שנים וברכך יהוה אלהיך בכל אשר תעשה

15:19  כל הבכור אשר יולד בבקרך ובצאנך הזכר תקדיש ליהוה אלהיך לא תעבד בבכור שורך ולא תגז בכור צאנך

15:20  לפני יהוה אלהיך תאכלנו שנה בשנה במקום אשר בחר יהוה אתה וביתך

15:21  וכי יהיה בו מום פסח או עור או כל מום רע לא תזבחנו ליהוה אלהיך

15:22  בשעריך תאכלנו הטמא והטהור יחדו כצבי וכאיל

15:23  רק את דמו לא תאכל על הארץ תשפכנו כמים