SPVar - Deuteronomy - 24

24:1  כי יקח איש אשה ובא אליה ובעלה והיה אם לא תמצא חן בעיניו כי מצא בה ערות דבר וכתב לה ספר כריתת ונתן בידה ושלחה מביתו

24:2  ויצאה מביתו והלכה והיתה לאיש אחר

24:3  ושנאה האיש האחרון וכתב לה ספר כריתת ונתן בידה ושלחה מביתו או כי ימות בעלה האחרון אשר לקחה לו לאשה

24:4  לא יוכל בעלה הראישון אשר שלחה לשוב לקחתה להיות לו לאשה אחרי אשר הטמאה כי תועבה היא לפני יהוה ולא תחטיאו את הארץ אשר יהוה אלהיך נתן לך נחלה

24:5  כי יקח איש אשה חדשה לא יצא בצבא ולא יעבר עליו לכל דבר נקיא יהיה לביתו שנה אחת ושמח את אשתו אשר לקח

24:6  לא יחבל רחים ורכב כי נפש הוא חבל

24:7  כי ימצא איש גנב נפש מאחיו מבני ישראל והתעמר בו ומכרו ומת הגנב ההוא ובערת הרע מקרבך

24:8  השמר בנגע הצרעת לשמר מאד לעשות ככל התורה אשר יורו אתכם הכהנים הלוים כאשר צויתם תשמרו לעשות

24:9  זכר את אשר עשה יהוה אלהיך למרים בדרך בצאתכם ממצרים

24:10  כי תשא ברעך משאת מאומה לא תבוא אל ביתו לעבט עבוטו

24:11  בחוץ תעמד והאיש אשר אתה נשא בו הוא יוצא אליך את העבוט החוצה

24:12  ואם איש עני הוא לא תשכב בעבוטו

24:13  השב תשיב לו את העבוט כבוא השמש ושכב בשלמתו וברכך ולך תהיה צדקה לפני יהוה אלהיך

24:14  לא תעשק שכיר עני ואביון מאחיך או מגרך אשר בארצך בשעריך

24:15  ביומו תתן שכרו ולא תבוא עליו השמש כי עני הוא ואליו הוא נשא את נפשו ולא יקרא עליך אל יהוה והיה בך חטא

24:16  לא יומתו אבות על בנים ובנים לא יומתו על האבות איש בחטאו יומת

24:17  לא תטה משפט גר יתום ולא תחבל בגד אלמנה

24:18  וזכרת כי עבד היית במצרים ויפדך יהוה אלהיך על כן אנכי מצוך לעשות את הדבר הזה

24:19  כי תקצר קצירך בשדך ושכחת עמר בשדה לא תשוב לקחתו לגר ליתום ולאלמנה יהיה למען יברכך יהוה אלהיך בכל מעשה ידיך

24:20  כי תחבט זיתך לא תפאר אחריך לגר ליתום ולאלמנה יהיה

24:21  כי תבצר כרמך לא תעלל אחריך לגר ליתום ולאלמנה יהיה

24:22  וזכרת כי עבד היית בארץ מצרים על כן אנכי מצוך את הדבר הזה