SPVar - Deuteronomy - 22

22:1  לא תראה את שור אחיך או את שיו או את כל בהמתו נדחים והתעלמת מהם השב תשיבם לאחיך

22:2  ואם לא קרוב אחיך אליך ולא ידעתו ואספתו אל תוך ביתך והיה עמך עד דרש אחיך אתו מעמך והשבתו לו

22:3  כן תעשה לחמרו וכן תעשה לשמלתו וכן תעשה לכל אבדת אחיך אשר תאבד ממנו ומצאתה לא תוכל להתעלם

22:4  לא תראה את חמור אחיך או את שורו או את כל בהמתו נפלים בדרך והתעלמת מהם הקם תקים עמו

22:5  לא יהיה כלי גבר על אשה ולא ילבש גבר שמלת אשה כי הועבת יהוה אלהיך כל עשה אלה

22:6  כי יקרא קן צפור לפניך בדרך בכל עץ או על הארץ אפרחים או בצים והאם רבצת על האפרחים או על הבצים לא תקח האם על הבנים

22:7  שלח תשלח את האם ואת הבנים תקח לך למען ייטב לך והארכת ימים

22:8  כי תבנה בית חדש ועשית מעקה לגגך ולא תשים דמים בביתך כי יפל הנפל ממנו

22:9  לא תזרע כרמך כלאים פן תקדיש המלאה הזרע אשר תזרע ותבואת הכרם

22:10  לא תחריש בשור ובחמור יחדו

22:11  לא תלבש שעטניז צמר ופשתים יחדו

22:12  גדלים תעשה לך על ארבע כנפות כסותך אשר תכסה בה

22:13  כי יקח איש אשה ובא אליה ושנאה

22:14  ושם לה עלילת דברים והוציא עליה שם רע ואמר את האשה הזאת לקחתי ואקרבה אליה ולא מצאתי לה בתולים

22:15  ולקח אבי הנערה ואמה והוציאו את בתולי הנערה אל זקני העיר השערה

22:16  ואמר אבי הנערה אל הזקנים את בתי נתתי לאיש הזה לאשה וישנאה

22:17  והנה הוא לה שם עלילת דברים לאמר לא מצאתי לבתך בתולים ואלה בתולי בתי ופרש השמלה לפני זקני העיר

22:18  ולקחו זקני העיר ההיא את האיש ההוא ויסרו אתו

22:19  וענשו אתו מאה כסף ונתנו לאבי הנערה כי הוציא שם רע על בתולת ישראל ולו תהיה לאשה לא יוכל שלחה כל ימיו

22:20  ואם אמת היה הדבר לא נמצאו בתולים לנערה

22:21  והוציאו את הנערה אל פתח בית אביה וסקלוה אנשי עירה באבנים ומתה כי עשתה נבלה בישראל להזנות את בית אביה ובערת הרע מקרבך

22:22  כי ימצא איש שכב עם אשה בעלת בעל ומתו גם שניהם האיש השכב עם האשה והאשה ובערת הרע מישראל

22:23  כי יהיה נערה בתולה מארשה לאיש ומצאה איש בעיר ושכב עמה

22:24  והוצאתם את שניהם אל שער העיר ההיא וסקלתם אתם באבנים ומתו את הנערה על דבר אשר לא צעקה בעיר ואת האיש על דבר אשר ענה את אשת רעהו ובערת הרע מקרבך

22:25  ואם בשדה ימצא האיש את הנערה המארשה והחזיק בה האיש ושכב עמה ומת האיש אשר שכב עמה לבדו

22:26  ולנערה לא תעשו דבר אין לנערה חטא מות כי כאשר יקום איש על רעהו ורצחו נפש כן הדבר הזה

22:27  כי בשדה מצאה צעקה הנערה המארשה ואין מושיע לה

22:28  כי ימצא איש נערה בתולה אשר לא ארשה ותפשה ושכב עמה ונמצאו

22:29  ונתן האיש השכב עמה לאבי הנערה חמשים כסף ולו תהיה לאשה תחת אשר ענה לא יוכל שלחה כל ימיו