SPVar - Deuteronomy - 21

21:1  כי ימצא חלל באדמה אשר יהוה אלהיך נתן לך לרשתה נפל בשדה לא נודע מי הכהו

21:2  ויצאו זקניך ושטריך ומדדו אל הערים אשר סביבת החלל

21:3  והיה העיר הקרובה אל החלל ולקחו זקני העיר ההיא עגלת בקר אשר לא עבד בה ואשר לא משכה בעל

21:4  והורידו זקני העיר ההיא את העגלה אל נחל איתן אשר לא יעבד בו ולא יזרע וערפו שם את העגלה בנחל

21:5  ונגשו הכהנים בני לוי כי בם בחר יהוה אלהיך לשרת ולברך בשם יהוה ועל פיהם יהיה כל ריב וכל נגע

21:6  וכל זקני העיר ההיא הקרובים אל החלל ירחצו את ידיהם על העגלה הערופה בנחל

21:7  וענו ואמרו ידינו לא שפכו את הדם הזה ועינינו לא ראו

21:8  כפר לעמך ישראל אשר פדית יהוה ואל תתן דם נקיא בקרב עמך ישראל ונכפר להם הדם

21:9  ואתה תבער הדם הנקיא מקרבך כי תעשה הישר בעיני יהוה

21:10  כי תצא למלחמה על איביך ונתנו יהוה אלהיך בידך ושבית שביו

21:11  וראית בשביו אשה יפת תאר וחשקת בה ולקחת לך לאשה

21:12  והבאתה אל תוך ביתך וגלחה את ראשה ועשתה את צפרניה

21:13  והסירה את שמלת שביה מעליה וישבה בביתך ובכתה את אביה ואת אמה ירח ימים ואחר כן תבוא אליה ובעלתה והיתה לך לאשה

21:14  והיה אם לא חפצת בה ושלחתה לנפשה ומכר לא תמכרנה בכסף לא תתעמר בה תחת אשר עניתה

21:15  כי תהיינה לאיש שתי נשים אחת אהובה ואחת שנואה וילדו לו בנים האהובה והשנואה והיה הבן הבכור לשנואה

21:16  והיה ביום הנחילו את בניו את אשר יהיה לו לא יוכל לבכר את בן האהובה על פני בן השנואה הבכור

21:17  כי את הבכור בן השנואה יכיר לתת לו פי שנים בכל אשר ימצא לו כי הוא ראשית אונו ולו משפט הבכרה

21:18  כי יהיה לאיש בן סורר ומורה איננו שמע בקול אביו ובקול אמו ויסרו אתו ולא ישמע אליהם

21:19  ותפשו בו אביו ואמו והוציאו אתו אל זקני עירו אל שער מקומו

21:20  ואמרו אל אנשי עירו בננו זה סורר ומורה איננו שמע בקולנו זולל וסובא

21:21  ורגמהו כל אנשי עירו באבנים ומת ובערת הרע מקרבך וכל ישראל ישמעו וייראו

21:22  כי יהיה באיש חטא משפט מות והומת ותלית אתו על העץ

21:23  לא תלין נבלתו על העץ כי קבר תקברנו ביום ההוא כי קללת אלהים תלאי ולא תטמא את אדמתך אשר יהוה אלהיך נתן לך נחלה