TpiKJPB - Ezekiel - 14

14:1  ¶ Nau sampela bilong ol lapun hetman bilong Isrel i kam long mi, na sindaun long ai bilong mi.

14:2  Na tok bilong BIKPELA i kam long mi, i spik,

14:3  Pikinini man bilong man, ol dispela man i bin sanapim ol piksa bilong god giaman bilong ol insait long bel bilong ol, na putim ol sin nogut bilong ol i sutim lek bilong ol long ai bilong pes bilong ol. Ating Mi ken larim ol i askim liklik long Mi?

14:4  Olsem na toktok long ol, na tokim ol, GOD Bikpela i tok olsem, Olgeta wan wan man bilong hauslain bilong Isrel husat i sanapim ol piksa bilong god giaman bilong em insait long bel bilong em, na putim ol sin nogut bilong sutim lek bilong em long ai bilong pes bilong em, na em i kam long profet, Mi BIKPELA bai bekim em husat i kam bilong bihainim planti namba tru bilong ol piksa bilong god giaman bilong em.

14:5  Inap long Mi ken kisim hauslain bilong Isrel insait long bel bilong ol yet, bilong wanem, olgeta i go longwe long Mi long ol piksa bilong god giaman bilong ol.

14:6  Olsem na tokim hauslain bilong Isrel, GOD Bikpela i tok olsem, Tanim bel, na tanim yupela yet i lusim ol piksa bilong god giaman bilong yupela. Na tanim i go ol pes bilong yupela i lusim olgeta sting pasin bilong yupela.

14:7  Long wanem, olgeta wan wan bilong hauslain bilong Isrel, o bilong ausait man husat i stap waira long Isrel, husat i brukim em yet long Mi, na sanapim ol piksa bilong god giaman bilong em insait long bel bilong em, na putim ol sin nogut bilong em olsem samting bilong sutim lek long ai bilong pes bilong em, na kam long wanpela profet bilong askim long em long sait bilong Mi, Mi BIKPELA bai bekim em Mi Yet.

14:8  Na Mi bai strongim pes bilong Mi i birua long dispela man, na Mi bai mekim em wanpela mak na wanpela provep, na Mi bai rausim em ausait long namel bilong lain manmeri bilong Mi. Na yupela bai save long Mi stap BIKPELA.

14:9  Na sapos profet i stap paul taim em i bin toktok long wanpela samting, Mi BIKPELA i bin paulim dispela profet, na Mi bai stretim han bilong Mi antap long em, na Mi bai bagarapim em olgeta ausait long namel bilong lain manmeri bilong Mi Isrel.

14:10  Na ol bai karim mekim save bilong ol sin nogut bilong ol. Mekim save bilong profet, yes, bai stap wankain olsem mekim save bilong man husat i kam painim tok long em,

14:11  Inap long hauslain bilong Isrel i no ken go lus long Mi moa, na tu ol i no inap kamap doti moa liklik wantaim ol pasin bilong ol bilong kalapim lo. Tasol Mi bai mekim inap long ol i ken stap lain manmeri bilong Mi, na Mi ken stap God bilong ol, GOD Bikpela i tok.

14:12  ¶ Tok bilong BIKPELA i kam long mi gen, i spik,

14:13  Pikinini man bilong man, taim dispela hap i mekim sin i birua long Mi taim em i sakim lo nogut tru, orait bai Mi stretim han bilong Mi antap long en, na Mi bai brukim strong bilong bret bilong en, na Mi bai salim bikpela taim hangre antap long en, na Mi bai rausim man na animal olgeta long en.

14:14  Maski dispela tripela man, Noa, Danyel, na Jop i stap long en, ol i ken kisim bek tewel bilong ol yet tasol long stretpela pasin bilong ol, GOD Bikpela i tok.

14:15  Sapos Mi mekim ol animal i karim sik long wokabaut namel long dispela hap, na ol i bagarapim dispela, inap long em i stap nating olgeta, inap long i no gat man i ken wokabaut namel long en bikos ol dispela animal i stap,

14:16  Maski dispela tripela man i stap long en, olsem Mi stap laip, GOD Bikpela i tok, ol bai i no inap kisim bek ol pikinini man o ol pikinini meri. Ol tasol bai kisim bek ol yet, tasol dispela hap bai stap nating olgeta.

14:17  O sapos Mi bringim wanpela bainat antap long dispela hap, na tok, Bainat, go namel long dispela hap, inap long Mi ken rausim man na animal olgeta long en,

14:18  Maski dispela tripela man i stap long en, olsem Mi stap laip, GOD Bikpela i tok, ol bai i no inap kisim bek ol pikinini man o ol pikinini meri, tasol ol bai kisim bek ol yet tasol.

14:19  O sapos Mi salim wanpela sik nogut i go long dispela hap, na kapsaitim belhat nogut tru bilong Mi antap long en long blut, bilong rausim man na animal olgeta long en,

14:20  Maski Noa, Danyel, na Jop i stap long en, olsem Mi stap laip, GOD Bikpela i tok, ol bai i no inap kisim bek pikinini man o pikinini meri. Ol bai kisim bek ol tewel bilong ol yet tasol long stretpela pasin bilong ol.

14:21  Long wanem, GOD Bikpela i tok olsem, Hamas moa, taim Mi salim fopela kot i strong tru bilong Mi antap long Jerusalem, bainat, bikpela taim hangre, na animal i karim sik, na sik nogut, bilong rausim olgeta long en man na animal?

14:22  Tasol, lukim, insait long en bai i stap yet wanpela hap lain i stap yet husat ol bai bringim i kam ausait, ol pikinini man na ol pikinini meri wantaim. Lukim, ol bai kam ausait i kam long yupela, na yupela bai lukim pasin bilong ol na ol wok bilong ol. Na yupela bai kisim bel isi long sait bilong ol dispela pasin nogut Mi bin bringim antap long Jerusalem, yes, long sait bilong olgeta samting Mi bin bringim antap long en.

14:23  Na ol bai givim bel isi long yupela, taim yupela i lukim ol pasin bilong ol na ol wok bilong ol. Na yupela bai save long Mi no bin mekim nating olgeta dispela samting Mi bin mekim insait long en, GOD Bikpela i tok.