CopSahBible2 - Ezekiel - 1

1:1  ⲁⲥϣⲱⲡⲉ ϩⲛ ⲧⲙⲉϩⲙⲁⲁⲃ ⲛⲣⲟⲙⲡⲉ ⲙⲡⲙⲉϩϯⲟⲩ ⲛⲉⲃⲟⲧ ⲛⲥⲟⲩϯⲟⲩ ⲙⲡⲉⲃⲟⲧ ⲁⲛⲟⲕ ⲛⲉⲓϣⲟⲟⲡ ϩⲛ ⲧⲙⲏⲧⲉ ⲛⲧⲁⲓⲭⲙⲁⲗⲱⲥⲓⲁ ϩⲓϫⲙ ⲡⲉⲓⲉⲣⲟ ⲭⲟⲃⲁⲣ ⲁⲩⲱ ⲁⲩⲟⲩⲱⲛ ⲛϭⲓ ⲙⲡⲏⲩⲉ ⲁⲩⲱ ⲁⲓⲛⲁⲩ ⲉϩⲉⲛϩⲟⲣⲁⲥⲓⲥ ⲛⲧⲉ ⲡⲛⲟⲩⲧⲉ

1:2  ϩⲛ ϯⲟⲩ ⲙⲡⲉⲃⲟⲧ ϩⲛ ⲧⲙⲉϩϯ ⲛⲣⲟⲙⲡⲉ ⲙⲡⲡⲱⲱⲛⲉ ⲉⲃⲟⲗ ⲙⲡⲣⲣⲟ ⲓⲱⲁⲕⲓⲙ

1:3  ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁ ⲉⲓⲉⲍⲉⲕⲓⲏⲗ ⲡⲟⲩⲏⲏⲃ ⲡϣⲏⲣⲉ ⲛⲃⲟⲩⲍⲓ ϩⲙ ⲡⲕⲁϩ ⲛⲛⲉⲭⲁⲗⲇⲁⲓⲟⲥ ϩⲓϫⲙ ⲡⲉⲓⲉⲣⲟ ⲭⲟⲃⲁⲣ ⲁⲩⲱ ⲧϭⲓϫ ⲙⲡϫⲟⲉⲓⲥ ⲁⲥϣⲱⲡⲉ ⲉⲣⲁⲓ ⲉϫⲱⲓ

1:4  ⲁⲓⲛⲁⲩ ⲁⲩⲱ ⲉⲓⲥ ϩⲏⲏⲧⲉ ⲉⲓⲥ ⲟⲩ ⲉϥϫⲟⲥⲉ ⲉϥⲛⲏⲩ ⲉⲃⲟⲗ ϩⲙ ⲡⲉⲙϩⲓⲧ ⲉⲩⲛⲟⲩⲛⲟϭ ⲛⲕⲗⲟⲟⲗⲉ ⲛϩⲏⲧϥ ⲁⲩⲱ ⲟⲩⲟⲩⲟⲉⲓⲛ ⲙⲡⲉϥⲕⲱⲧⲉ ⲙⲛ ⲟⲩⲕⲱϩⲧ ⲉϥϯⲃⲣⲏϭⲉ ⲁⲩⲱ ϩⲛ ⲧⲉϥⲙⲏⲧⲉ ⲛⲑⲉ ⲙⲡⲉⲥⲙⲟⲧ ⲛⲟⲩⲱⲛⲉ ⲛⲉⲗⲉⲕⲧⲣⲓⲛⲟⲛ ϩⲛ ⲧⲙⲏⲧⲉ ⲙⲡⲕⲱϩⲧ ⲙⲛ ⲟⲩⲟⲩⲟⲉⲓⲛ ϩⲣⲁⲓ ⲛϩⲏⲧϥ

1:5  ⲁⲩⲱ ⲛⲉϥⲟ ϩⲛ ⲧⲉϥⲙⲏⲧⲉ ⲛϭⲓ ⲟⲩⲉⲓⲛⲉ ⲛϥⲧⲟⲟⲩ ⲛⲍⲱⲟⲛ ⲁⲩⲱ ⲧⲁⲓ ⲧⲉ ⲧⲉⲩϩⲟⲣⲁⲥⲓⲥ ⲟⲩⲉⲓⲛⲉ ⲛⲣⲱⲙⲉ ⲡⲉⲛⲉϥϣⲟⲟⲡ ⲛϩⲏⲧⲟⲩ

1:6  ⲉⲩⲟⲩⲛ ϥⲧⲟⲟⲩ ⲛϩⲟ ϩⲓ ⲡⲟⲩⲁ ⲡⲟⲩⲁ ⲁⲩⲱ ϥⲧⲟⲟⲩ ⲛⲧⲛϩ ϩⲓ ⲡⲟⲩⲁ ⲡⲟⲩⲁ

1:7  ⲉⲣⲉ ⲛⲉⲩⲟⲩⲉⲣⲏⲧⲉ ⲥⲟⲩⲧⲱⲛ ⲁⲩⲱ ⲉⲩⲣⲏⲧ ⲛⲧⲛϩ ⲙⲛ ϩⲉⲛϯⲕ ⲛⲕⲱϩⲧ ⲛⲑⲉ ⲛⲟⲩϩⲟⲙⲛⲧ ⲉϥⲧⲁⲁⲧⲉ ⲁⲩⲱ ⲉⲩⲁⲥⲱⲟⲩ ⲛϭⲓ ⲛⲉⲩⲧⲛϩ

1:8  ⲉⲣⲉⲟⲩϭⲓϫ ⲛⲣⲱⲙⲉ ϩⲁ ⲡⲉⲥⲏⲧ ⲛⲛⲉⲩⲧⲛϩ ⲉⲩⲙⲟⲟϣⲉ ϩⲓ ⲡⲉⲩϥⲧⲟⲩⲥⲁ ⲁⲩⲱ ⲛⲉⲩϩⲟ ⲙⲡⲉϥⲧⲟⲟⲩ

1:9  ⲛⲉⲩⲕⲱⲧⲉ ⲙⲙⲟⲟⲩ ⲁⲛ ⲉⲡⲁϩⲟⲩ ϩⲙ ⲡⲧⲣⲉⲩⲙⲟⲟϣⲉ ⲡⲟⲩⲁ ⲡⲟⲩⲁ ⲛⲉⲩⲙⲟⲟϣⲉ ⲡⲉ ⲙⲡⲉⲙⲧⲟ ⲉⲃⲟⲗ ⲙⲡⲉⲩϩⲟ

1:10  ⲁⲩⲱ ⲡⲉⲓⲛⲉ ⲛⲛⲉⲩϩⲟ ⲟⲩϩⲟ ⲛⲣⲱⲙⲉ ⲙⲛ ⲟⲩϩⲟ ⲙⲙⲟⲩⲓ ⲛⲟⲩⲛⲁⲙ ⲙⲙⲟⲟⲩ ⲙⲡⲉϥⲧⲟⲟⲩ ⲁⲩⲱ ⲟⲩϩⲟ ⲙⲙⲁⲥⲉ ⲛϩⲃⲟⲩⲣ ⲙⲙⲟⲟⲩ ⲙⲡⲉϥⲧⲟⲟⲩ ⲙⲛ ⲟⲩϩⲟ ⲛⲁⲉⲧⲟⲥ