Kapingamarangi - Hosea - 7

7:1  “Nia madagoaa huogodoo ala ma-ga-hiihai-iei Au bolo e-haga-humalia agu daangada Israel mo-di hai digaula gi-haadanga lamalia labelaa, gei agu mee e-gidee-Au la-go nadau hangahaihai huaidu ala e-hai. Digaula e-hagadau halahalau ginaadou, e-oho ga-ulu gi-lodo nia hale, e-gaiaa nia daangada i-hongo nia ala.

7:2  Ma hagalee modongoohia-ginaadou bolo Au ga-hagamamaanadu nia mee aanei huogodoo. Nia hala digaula e-haganiga digaula, gei Au e-deemee di-hagalee mmada gi-nia maa.”

7:3  Dimaadua ga-helekai, “Nia daangada e-halahalau di king mo ana gau aamua gi nadau haganoho hai-mee huaidu.

7:4  Nia daangada huogodoo e-hagi-aga dangada ge hagalee manawa-dahi. Nadau dee-hiihai e-ulaula be-di ahi i-lodo di mee-dunu-mee dela e-hai haga-humalia go tangada hai-palaawaa gi-togomaalia gi-di dunu nia palaawaa.

7:5  Di laangi di budu o-di king, digaula guu-hai di king mo ana gau aamua gi-libaliba huaidu i-nia waini.

7:6  Uaa, digaula e-ulaula be-di mee-dunu-mee i-nadau mamaanadu hai-huaidu. Di waalooloo di boo nadau hagawelewele e-buu, ge luada gu-ulaula damana.

7:7  “I-lodo hua di welengina o nadau hagawelewele, digaula gu-daaligi nadau dagi gii-mmade. Nadau king la-gu-hagadau dadaaligi ginaadou guu-mmade, gei tangada e-dahi ne-dalodalo-mai gi-di-Au i-di hagamaamaa ai.”

7:8  Dimaadua ga-helekai, “Nia daangada Israel e-hai be nia palaawaa ne-dunu di baahi hua e-dahi. Digaula e-gana gi nnenua llauehe ala i-nadau baahi,

7:9  ge de-iloo bolo nadau gana gi digau henua-gee guu-hai ginaadou gi-paagege. Nadau laangi la-gu-hoohoo ga-odi ge digaula e-de-iloo.

7:10  Di hagamuamua digau Israel e-hai baahi gi digaula. Ma e-aha maa nia mee huogodoo la-guu-hai, gei digaula digi loomoi gi-muli gi-di-Au, go Dimaadua go di-nadau God.

7:11  Israel e-heehee be-di mwuroi boiboi: matagidagi digaula ne-gahi Egypt bolo e-hagamaamaa ginaadou, nomuli gaa-llele gi Assyria!

7:12  Gei Au gaa-holo dagu hele e-kumi digaula be nia manu mamaangi. Au ga-hagaduadua digaula gi-nia hala ala ne-hai go digaula.

7:13  “Digaula gu-huaidu ang-gi ginaadou! Digaula gu-diiagi Au, gu-hai-baahi mai-gi-di-Au. Digaula ga-mooho gi-daha. Au ne-hiihai belee haga-mouli digaula, ge nadau daumaha mai gi-di-Au la-guu-hala.

7:14  Digaula hagalee dalodalo-aga i-lodo nadau manawa hagatau, gei digaula ne-haga-hinga-hinga ginaadou gi-lala ga-wwolowwolo gadoo be nia haihai digau bouli ala e-hai. Digaula ma-ga-dalodalo i-nia huwa-laagau mono waini, digaula e-duuduu nadau gili be digau bouli. Digaula la digau e-hai-baahi-mai!

7:15  Ma e-aha maa Au dela ne-madamada humalia i digaula gi-tomo-aga gaa-hai digaula gi-maaloo, digaula ne-hai-baahi-mai gi-di-Au.

7:16  Digaula e-hulihuli gi-daha mo Au gi-di god dela ono mogobuna ai. Digaula hagalee hagadagadagagee ginai be-di maalei biga. Idimaa nadau dagi e-hagamuamua, digaula gaa-mmade haga-huaidu, ge digau Egypt ga-gadagada gi digaula.”