Kekchi - I Samuel - 11

11:1  Laj Nahas, lix reyeb laj Amón, quixcauresiheb lix soldado ut queˈco̱eb Jabes re Galaad re teˈpletik riqˈuineb. Eb li cui̱nk li cuanqueb Jabes re Galaad queˈxye re: —Ba̱nu jun li contrato kiqˈuin ut la̱o takacanab kib rubel a̱cuanquil, chanqueb.

11:2  Ut laj Nahas quixye reheb: —La̱in tinba̱nu jun li contrato e̱riqˈuin. Abanan tento nak che̱ju̱nkalex tine̱canab chirisinquil li xnakˈ e̱ru li cuan saˈ le̱ nim, re nak tincˈut e̱xuta̱n la̱ex aj Israel, chan.

11:3  Eb li nequeˈtaklan aran Jabes queˈxye re: —Oybenihomak cuukubak cutan re nak takataklaheb li katakl riqˈuineb chixjunileb laj Israel. Cui ma̱ ani nachal chi coloc ke, la̱o takakˈaxtesi kib rubel e̱cuanquil, chanqueb.

11:4  Eb li takl queˈcuulac aran Gabaa saˈ lix tenamit laj Saúl ut queˈxye reheb li cˈaˈru teˈxba̱nu eb laj Amón. Nak queˈrabi li resil aˈan, queˈrahoˈ xchˈo̱leb ut queˈoc chi ya̱bac chixjunileb li tenamit.

11:5  Laj Saúl yo̱ chak chi sukˈi̱c saˈ cˈaleba̱l rochben lix bo̱yx. Quixye: —¿Cˈaˈru xeˈxcˈul li tenamit nak yo̱queb chi ya̱bac? chan. Ut queˈxye re li cˈaˈru queˈxye li takl li queˈchal chak Jabes.

11:6  Laj Saúl quirecˈa nak lix Musikˈ li Dios quichal saˈ xbe̱n ut cˈajoˈ nak quijoskˈoˈ nak quirabi li queˈxye li takl.

11:7  Quixchap cuib li bo̱yx ut quixsetiheb. Quixtakla li tib saˈ chixjunileb li tenamit Israel. Quixtakla xyebal reheb: —Joˈcaˈin takaba̱nu reheb lix bo̱yxeb li incˈaˈ teˈoque̱nk chixtenkˈanquil chi pletic laj Saúl ut laj Samuel, chan. Cˈajoˈ nak queˈxucuac eb laj Israel. Chi junajeb xchˈo̱leb queˈxchˈutub ribeb re teˈxic chi pletic.

11:8  Laj Saúl quixchˈutubeb li cui̱nk aran Bezec ut queˈajla̱c. Cuanqueb oxib ciento mil (300,000) chi cui̱nk aj Israel ut cuanqueb ajcuiˈ laje̱b xcaˈcˈa̱l mil (30,000) chi cui̱nk aj Judá.

11:9  Quixye reheb li takl li queˈchal chak Jabes re Galaad: —Saˈ cuaˈleb texkacol, chan. Ut eb li takl queˈco̱eb cuiˈchic ut queˈxye reheb li cuanqueb Jabes li cˈaˈru quixye laj Saúl. Cˈajoˈ nak queˈsahoˈ saˈ xchˈo̱leb.

11:10  Queˈxye reheb laj Amón: —Cuulaj takakˈaxtesi kib saˈ e̱rukˈ ut te̱ba̱nu li cˈaˈru nequeraj kiqˈuin, chanqueb.

11:11  Cuulajak chic nak toj ekˈela, laj Saúl quixjachi lix soldado saˈ oxib jachal. Nak quisake̱u, queˈco̱eb saˈ junpa̱t saˈ li naˈajej li cuanqueb cuiˈ lix muheba̱leb laj Amón ut queˈoc chi pletic riqˈuineb. Nak quicuaˈleboˈ ac xeˈxcamsiheb laj Amón ut li incˈaˈ queˈcamsi̱c queˈxjeqˈui ribeb ut queˈe̱lelic chi xjunju̱nkaleb. Ma̱ jun reheb quicana chi cuan rochben.

11:12  Eb laj Israel queˈxye re laj Samuel: —¿Aniheb li cui̱nk li queˈxye nak laj Saúl incˈaˈ ta̱takla̱nk saˈ kabe̱n? Kˈaxtesiheb saˈ kukˈ re takacamsiheb, chanqueb.

11:13  Ut laj Saúl quixye reheb: —Ma̱ jun reheb laj Israel ta̱camsi̱k anakcuan xban nak saˈ li cutan aˈin li Ka̱cuaˈ coxcol la̱o aj Israel, chan.

11:14  Chirix chic aˈan, laj Samuel quixye reheb li tenamit: —Quimkex. Yoˈkeb Gilgal re nak takaxakab chi junaj cua laj Saúl chokˈ rey, chan.

11:15  Chixjunileb li tenamit queˈco̱eb Gilgal ut queˈxxakab laj Saúl chokˈ rey chiru li Ka̱cuaˈ. Ut aran queˈmayejac ut queˈxqˈue xmayejeb re xcˈambaleb rib saˈ usilal riqˈuin li Ka̱cuaˈ. Quisahoˈ saˈ xchˈo̱l laj Saúl ut queˈsahoˈ ajcuiˈ saˈ xchˈo̱leb chixjunileb li tenamit.