TpiKJPB - I Samuel - 16

16:1  ¶ Na BIKPELA i tokim Samyuel, Yu bai soim sori long Sol inap long wanem taim, taim yu luksave pinis long Mi bin tok nogat olgeta long em long bosim kingdom bilong Isrel? Pulimapim kom bilong yu wantaim wel, na go. Mi bai salim yu i go long Jesi, man bilong Betlehem. Long wanem, Mi bin redim bilong Mi wanpela king namel long ol pikinini man bilong em.

16:2  Na Samyuel i tok, Mi ken go olsem wanem? Sapos Sol i harim dispela, em bai kilim mi. Na BIKPELA i tok, Karim bulmakau meri wantaim yu, na tok, Mi kam long sakrifais long BIKPELA.

16:3  Na singautim Jesi long sakrifais, na Mi bai soim yu wanem samting yu bai mekim. Na yu bai makim long Mi em husat Mi kolim long yu.

16:4  Na Samyuel i mekim dispela samting BIKPELA i tok, na kam long Betlehem. Na ol lapun hetman bilong taun i guria taim em i kam, na tok, Yu kam wantaim pasin bilong bel isi?

16:5  Na em i tok, Wantaim pasin bilong bel isi. Mi kam long sakrifais i go long BIKPELA. Mekim yupela yet i kamap holi, na kam wantaim mi long dispela sakrifais. Na em i mekim Jesi na ol pikinini man bilong em i kamap holi, na singautim ol long dispela sakrifais.

16:6  ¶ Na em i kamap olsem, taim ol i kam pinis, long em i lukim Eliap, na tok, Tru tumas, man BIKPELA i makim i stap long ai bilong Em.

16:7  Tasol BIKPELA i tokim Samyuel, No ken lukluk long pes bilong em, o long longpela bilong bodi bilong em. Bilong wanem, Mi bin tok nogat long em. Long wanem, BIKPELA i no lukim samting olsem man i lukim. Long wanem, man i save lukluk long ausait lukluk bilong man, tasol BIKPELA i save lukluk long bel.

16:8  Nau Jesi i singautim Abinadap, na mekim em i wokabaut long ai bilong Samyuel. Na em i tok, Na tu BIKPELA i no bin makim dispela.

16:9  Nau Jesi i mekim Sama long wokabaut klostu. Na em i tok, Na tu BIKPELA i no bin makim dispela.

16:10  Na gen, Jesi i mekim sevenpela pikinini man bilong em i wokabaut long ai bilong Samyuel. Na Samyuel i tokim Jesi, BIKPELA i no bin makim ol dispela.

16:11  Na Samyuel i tokim Jesi, Ating olgeta pikinini bilong yu i stap long hia? Na em i tok, Pikinini i yangpela moa i stap yet, na, lukim, em i lukautim ol sipsip. Na Samyuel i tokim Jesi, Salim man na kisim em. Long wanem, yumi bai i no inap sindaun inap long em i kam long hia.

16:12  Na em i salim tok, na ol i bringim em i kam insait. Na em i retpela, na i gat naispela pes olgeta, na em i nambawan long lukluk long em. Na BIKPELA i tok, Kirap, makim em. Long wanem, em dispela man tasol.

16:13  Nau Samyuel i kisim kom wel, na makim em namel long ol brata bilong em. Na Spirit bilong BIKPELA i kam antap long Devit long dispela de i go. Olsem na Samyuel i kirap, na go long Rama.

16:14  ¶ Tasol Spirit bilong BIKPELA i lusim Sol, na wanpela spirit nogut i kam long BIKPELA i givim trabel long em.

16:15  Na ol wokboi bilong Sol i tokim em, Lukim nau, wanpela spirit nogut i kam long BIKPELA i givim trabel long yu.

16:16  Nau larim bikman bilong mipela tok strong long ol wokboi bilong yu, husat i stap long ai bilong yu, long painim man husat i saveman stret bilong paitim harp. Na em bai kamap olsem, taim dispela spirit nogut i kam long God i stap antap long yu, long em bai paitim harp wantaim han bilong em, na yu bai stap gutpela.

16:17  Na Sol i tokim ol wokboi bilong em, Redim long mi nau wanpela man husat i ken pilai gut, na bringim em long mi.

16:18  Nau wanpela bilong ol wokboi i bekim, na tok, Lukim, mi bin lukim pikinini man bilong Jesi, man Betlehem, husat i saveman stret bilong pilai, na strongpela man bilong pait, na man bilong bikpela pait, na man bilong yusim save long ol samting, na man i fit tru, na BIKPELA i stap wantaim em.

16:19  Olsem na Sol i salim ol mausman long Jesi, na tok, Salim pikinini man bilong yu Devit i kam long mi, husat i stap wantaim ol sipsip.

16:20  Na Jesi i kisim wanpela donki i pulap wantaim bret, na skin meme wain, na pikinini meme, na salim ol long han bilong pikinini man bilong em Devit i go long Sol.

16:21  Na Devit i kamap long Sol, na sanap long ai bilong em. Na em i laikim em bikpela tru. Na em i kamap man bilong karim klos pait bilong em.

16:22  Na Sol i salim tok long Jesi, i spik, Larim Devit, mi askim yu plis, sanap long ai bilong mi. Long wanem, em i bin painim pinis gutpela amamas long ai bilong mi.

16:23  Na em i kamap olsem, taim dispela spirit nogut i kam long God i stap antap long Sol, long Devit i kisim harp, na paitim wantaim han bilong em. Olsem tasol Sol i kisim strong gen, na em i stap gutpela, na dispela spirit nogut i lusim em.