CopSahBible2 - I Samuel - 5

5:1  ⲛⲁⲗⲗⲟⲫⲩⲗⲟⲥ ⲇⲉ ⲁⲩϫⲓ ⲛⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲉⲃⲟⲗ ϩⲛ ⲁⲃⲉⲛⲉⲍⲉⲣ ⲁⲩϫⲓⲧⲥ ⲉϩⲟⲩⲛ ⲉⲁⲍⲱⲧⲟⲥ

5:2  ⲁⲩⲱ ⲛⲁⲗⲗⲟⲫⲩⲗⲟⲥ ⲁⲩϫⲓ ⲛⲧⲕⲟⲓⲃⲱⲧⲟⲥ ⲙⲡϫⲟⲉⲓⲥ ⲁⲩϫⲓⲧⲥ ⲉϩⲟⲩⲛ ⲉⲡⲏⲓ ⲛⲇⲁⲅⲱⲛ ⲁⲩⲧⲁϩⲟⲥ ⲉⲣⲁⲧⲥ ϩⲁⲧⲛ ⲇⲁⲅⲱⲛ

5:3  ⲁⲩⲱ ⲛⲣⲱⲙⲉ ⲛⲁⲍⲱⲧⲟⲥ ⲁⲩϣⲟⲣⲡⲟⲩ ⲁⲩⲡⲱⲧ ⲉϩⲟⲩⲛ ⲉⲡⲏⲓ ⲛⲇⲁⲅⲱⲛ ⲁⲩⲛⲁⲩ ⲁⲩⲱ ⲉⲓⲥ ⲇⲁⲅⲱⲛ ⲛⲉϥⲛⲏϩ ϩⲓϫⲙ ⲡⲉϥϩⲟ ϩⲓⲑⲏ ⲛⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲁⲩⲧⲟⲩⲛⲉⲥⲇⲁⲅⲱⲛ ⲇⲉ ⲁⲩⲧⲁϩⲟϥ ⲉⲣⲁⲧϥ ϩⲙ ⲡⲉϥⲙⲁ ⲁⲩⲱ ⲧϭⲓϫ ⲙⲡϫⲟⲉⲓⲥ ⲁⲥⲉⲛϣⲟⲧ ⲉϫⲛ ⲛⲉⲣⲱⲙⲉ ⲛⲁⲍⲱⲧⲟⲥ ⲁⲥⲃⲁⲥⲁⲛⲓⲍⲉ ⲙⲙⲟⲟⲩ ⲁⲩⲱ ⲁⲥⲑⲉⲙⲕⲟⲟⲩ ⲉⲛⲉⲩⲙⲁ ⲛⲉϩⲙⲟⲟⲥ ⲁⲍⲱⲧⲟⲥ ⲙⲛ ⲛⲉⲥⲕⲉⲧⲟϣ

5:4  ⲁⲩⲱ ⲛⲧⲉⲣⲟⲩϣⲟⲣⲡⲟⲩ ⲟⲛ ⲉϩⲧⲟⲟⲩⲉ ⲉⲓⲥ ⲇⲁⲅⲱⲛ ⲛⲉϥⲛⲏϫ ϩⲓϫⲙ ⲡⲉϥϩⲟ ϩⲓⲑⲏ ⲛⲧⲕⲟⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ ⲁⲩⲱ ⲧⲁⲡⲉ ⲛⲇⲁⲅⲱⲛ ⲙⲛ ⲧⲉϩⲓⲱⲙⲉ ⲥⲛⲧⲉ ⲛⲛⲉϥϭⲓϫ ⲛⲉⲩⲛⲏϩ ⲉⲃⲟⲗ ⲡⲟⲩⲁ ⲡⲟⲩⲁ ϩⲓⲑⲏ ⲛⲧⲕⲉⲛϩⲏ ⲁⲩⲱ ⲡⲕⲉϭⲃⲟⲓ ⲥⲛⲁⲩ ⲛⲛⲉϥϭⲓϫ ⲛⲉⲩⲛⲏϫ ϩⲓϫⲛ ⲧⲉⲡⲛⲏ ⲛⲧⲕⲉⲛϩⲏ ⲡⲗⲏⲛ ⲡⲧⲕⲁⲥ ⲙⲡϫⲓⲥⲉ ⲛⲇⲁⲅⲱⲛ ⲙⲡⲉϥϩⲉ

5:5  ⲉⲧⲃⲉ ⲡⲁⲓ ⲛⲉⲟⲩⲏⲏⲃ ⲛⲇⲁⲅⲱⲛ ⲙⲛ ⲟⲩⲟⲛ ⲛⲓⲙ ⲉⲧⲛⲁ ⲉϩⲟⲩⲛ ⲉⲡⲏⲓ ⲛⲇⲁⲅⲱⲛ ⲙⲉϩⲟⲩⲉϩⲣⲁⲧⲟⲩ ⲉϫⲛ ⲡⲉⲛⲛⲏ ϩⲛ ⲁⲍⲱⲧⲟⲥ ϣⲁ ⲉϩⲣⲁⲓ ⲉⲡⲟⲟⲩ ⲛϩⲟⲟⲩ ⲁⲗⲗⲁ ϩⲛ ⲟⲩⲡⲱⲣϫ ⲉϣⲁⲩⲡⲉⲣⲉϣⲣⲁⲧⲟⲩ ⲉⲃⲟⲗ ϩⲛ ⲧⲡⲉⲛⲛⲏ

5:6  ⲁⲩⲱ ⲧϭⲓϫ ⲙⲡϫⲟⲉⲓⲥ ⲁⲥⲉⲛϣⲟⲧ ⲉϫⲛ ⲁⲍⲱⲧⲟⲥ ⲁϥⲑⲙⲕⲟⲟⲩ ⲁϥⲧⲁⲕⲟ ⲛⲛⲉⲩⲉϫⲏⲩ ⲁⲩⲱ ⲛⲧⲉⲩⲭⲱⲣⲁ ⲏ ⲧⲉⲩⲥⲱϣⲉ ⲁⲥⲧⲁⲩⲟ ⲉϩⲣⲁⲓ ⲛϩⲉⲛⲡⲓⲛ ⲁⲩⲛⲟϭ ⲛⲁⲛⲁⲅⲕⲏ ⲙⲙⲟⲩ ϣⲱⲡⲉ ϩⲛ ⲧⲉⲩⲡⲟⲗⲓⲥ

5:7  ⲁⲩⲱ ⲛⲉⲣⲱⲙⲉ ⲛⲁⲍⲱⲧⲟⲥ ⲁⲩⲛⲁⲩ ϫⲉ ⲧⲁⲓ ⲧⲉ ⲑⲉ ⲛⲧⲁⲥϣⲱⲡⲉ ⲡⲉϫⲁⲩ ⲛⲛⲉⲩⲉⲣⲏⲩ ϫⲉ ⲧⲕⲓⲃⲱⲧⲟⲥ ⲙⲡⲛⲟⲩⲧⲉ ⲙⲡ ⲛⲥⲛⲁϣϭⲱ ⲁⲛ ϩⲁⲧⲏⲛ ϫⲉ ⲧⲉϥϭⲓϫ ⲛⲁϣⲧ ϩⲓϫⲱⲛ ⲁⲩⲱ ⲉϫⲛ ⲇⲁⲅⲱⲛ ⲡⲉⲛⲛⲟⲩⲧⲉ

5:8  ⲁⲩϫⲟⲟⲩ ⲇⲉ ⲁⲩⲥⲱⲟⲩϩ ⲉϩⲟⲩⲛ ϣⲁⲣⲟⲟⲩ ⲛⲛⲉⲥⲁⲧⲣⲁⲡⲏⲥ ⲛⲛⲁⲗⲗⲟⲫⲩⲗⲟⲥ ⲡⲉϫⲁⲩ ⲛⲁⲩ ϫⲉ ⲟⲩ ⲡⲉⲧⲉⲛⲛⲁⲁⲁϥ ⲛⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲙⲡ ⲛⲅⲉⲑⲑⲁⲓⲟⲥ ⲇⲉ ⲡⲉϫⲁⲩ ⲛⲁⲩ ϫⲉ ⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲙⲁⲣⲉⲥⲡⲱⲱⲛⲉ ⲛⲥⲉⲓ ϩⲁⲑⲏⲛ ⲁⲩⲱ ⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲁⲥⲡⲱⲱⲛⲉ ⲉϩⲣⲁⲓ ⲉⲅⲉⲑ

5:9  ⲁⲥϣⲱⲡⲉ ⲇⲉ ⲙⲛⲛⲥⲁ ⲉⲧⲣⲉⲥⲡⲱⲱⲛⲉ ⲧϭⲓϫ ⲙⲡϫⲟⲉⲓⲥ ⲁⲥϣⲱⲡⲉ ϩⲓϫⲱⲟⲩ ⲁⲩⲛⲟϭ ⲉⲙⲁⲧⲉ ⲛϣⲧⲟⲣⲧⲣ ϣⲱⲡⲉ ϩⲛ ⲧⲡⲟⲗⲓⲥ ⲁϥⲡⲁⲧⲁⲥⲥⲉ ⲛⲛⲣⲱⲙⲉ ⲛⲧⲡⲟⲗⲓⲥ ⲛϫⲓⲛ ⲉⲡⲉⲩⲕⲟⲩⲓ ϣⲁ ⲡⲉⲩⲛⲟϭ ⲁϥⲑⲙⲕⲟⲟⲩ ⲉⲛⲉⲩⲙⲁ ⲛⲉϩⲙⲟⲟⲥ ⲛⲅⲉⲑⲑⲁⲓⲟⲥ ⲁⲩⲧⲁⲙⲓⲟ ⲛⲁⲩ ⲛϩⲉⲛⲙⲟⲩⲛⲅ ⲙⲙⲁ ⲛϩⲙⲟⲟⲥ

5:10  ⲁⲩⲱ ⲁⲩϫⲟⲟⲩ ⲛⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲉϩⲣⲁⲓ ⲉⲁⲥⲕⲁⲗⲱⲛ ⲛⲣⲱⲙⲉ ⲇⲉ ⲛⲁⲥⲕⲁⲗⲱⲛ ⲁⲩⲱϣ ⲉⲃⲟⲗ ⲉⲩϫⲱ ⲙⲙⲟⲥ ϫⲉ ⲉⲧⲃⲉ ⲟⲩ ⲁⲧⲉⲧⲛⲧⲛⲛⲟⲟⲩ ⲛⲁⲛ ⲛⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲙⲡ ⲉⲙⲟⲟⲩⲧⲛ ⲙⲛ ⲡⲉⲛⲕⲉⲙⲏⲏϣⲉ

5:11  ⲁⲩⲱ ⲁⲩϫⲟⲟⲩ ⲁⲩⲥⲱⲟⲩϩ ⲉϩⲟⲩⲛ ⲛⲛⲉⲥⲁⲧⲣⲁⲡⲏⲥ ⲧⲏⲣⲟⲩ ⲛⲛⲁⲗⲗⲟⲫⲩⲗⲟⲥ ⲡⲉϫⲁⲩ ⲛⲁⲩ ϫⲉ ϫⲟⲟⲩ ⲛⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲙⲡ ⲛⲥⲟⲩⲱϩ ϩⲙ ⲡⲉⲥⲙⲁ ⲛⲥⲧⲙⲙⲟⲟⲩⲧⲛ ⲙⲛ ⲡⲉⲛⲕⲉⲗⲁⲟⲥ ϫⲉ ⲁⲩⲛⲟϭ ⲛⲁⲛⲁⲅⲕⲏ ⲉⲥⲛⲁϣⲧ ⲉⲙⲁⲧⲉ ϣⲱⲡⲉ ϩⲛ ⲧⲡⲟⲗⲓⲥ ⲧⲏⲣⲥ ⲛⲧⲉⲣⲉⲧⲕⲟⲓⲃⲱⲧⲟⲥ ⲙⲡⲛⲟⲩⲧⲉ ⲙⲡ ϣⲱⲡⲉ ϩⲙ ⲡⲙⲁ ⲉⲧⲙⲙⲁⲩ

5:12  ⲁⲩⲱ ⲛⲉⲧⲟⲛϩ ⲙⲡⲟⲩⲙⲟⲩ ⲁⲩϣⲱⲱϭⲉ ⲉⲛⲉⲩⲙⲁ ⲛⲉⲣⲙⲏ ⲁⲩⲱ ⲡⲉϩⲣⲟⲟⲩ ⲛⲧⲃⲁⲥⲁⲛⲟⲥ ⲛⲧⲡⲟⲗⲓⲥ ⲁϥⲃⲱⲕ ⲉϩⲣⲁⲓ ⲉⲧⲡⲉ