CopSahBible2 - I Samuel - 16

16:1  ⲡⲉϫⲉⲡϫⲟⲉⲓⲥ ⲇⲉ ⲛⲥⲁⲙⲟⲩⲏⲗ ϫⲉ ϣⲁ ⲧⲛⲁⲩ ⲉⲕⲣϩⲏⲃⲉ ⲛⲧⲟⲕ ⲉϫⲛ ⲥⲁⲟⲩⲗ ⲁⲩⲱ ⲁⲛⲟⲕ ⲁⲓⲥⲟϣⲃϥ ⲉⲧⲣⲉϥⲣⲣⲣⲟ ⲧⲉⲛⲟⲩ ϭⲉ ⲙⲟⲩϩ ⲙⲡⲉⲕⲧⲁⲡ ⲛⲛⲉϩ ⲛⲅⲉⲓ ⲛⲧⲁϫⲟⲟⲩⲕ ϣⲁ ⲉⲓⲥⲥⲁⲓ ⲉϩⲣⲁⲓ ⲉⲃⲏⲑⲗⲉⲉⲙ ϫⲉ ⲁⲓϯϩⲧⲏⲓ ϩⲛ ⲛⲉϣⲏⲣⲉ ⲛⲓⲉⲥⲥⲁⲓ ⲉⲟⲩⲁ ⲉϥⲛⲁⲣⲣⲣⲟ ϩⲁⲣⲁⲧ

16:2  ⲡⲉϫⲉⲥⲁⲙⲟⲩⲏⲗ ⲙⲡϫⲟⲉⲓⲥ ϫⲉ ⲉⲓⲛⲁⲃⲱⲕ ⲛⲁϣ ⲛϩⲉ ⲁⲩⲱ ⲛⲧⲉⲥⲁⲟⲩⲗ ⲥⲱⲧⲙ ⲛϥⲙⲟⲟⲩⲧ ⲡⲉϫⲉⲡϫⲟⲉⲓⲥ ⲛⲁϥ ϫⲉ ϫⲓ ⲛⲙⲙⲁⲕ ⲛⲟⲩⲃⲁϩⲥⲉ ⲛⲉϩⲉ ⲛⲅϫⲟⲟⲥ ϫⲉ ⲛⲧⲁⲓⲉⲓ ⲉⲣⲑⲩⲥⲓⲁ ⲙⲡϫⲟⲉⲓⲥ

16:3  ⲛⲅⲧⲱϩⲙ ⲛⲓⲉⲥⲥⲁⲓ ⲉⲧⲉⲑⲩⲥⲓⲁ ⲁⲩⲱ ϯⲛⲁⲧⲁⲙⲟⲕ ⲉⲛⲉⲧⲉⲕⲛⲁⲁⲁⲩ ⲛⲅⲧⲱϩⲥ ⲙⲡⲉϯⲛⲁⲧⲁⲙⲟⲕ ⲉⲣⲟϥ

16:4  ⲁⲩⲱ ⲥⲁⲙⲟⲩⲏⲗ ⲁϥⲉⲓⲣⲉ ⲛϩⲱⲃ ⲛⲓⲙ ⲛⲧⲁⲡϫⲟⲉⲓⲥ ϫⲟⲟⲩ ⲛⲁϥ ⲁϥⲉⲓ ⲉϩⲣⲁⲓ ⲉⲃⲏⲑⲗⲉⲉⲙ ⲁⲛⲉⲡⲣⲉⲥⲃⲩⲧⲉⲣⲟⲥ ⲛⲧⲡⲟⲗⲓⲥ ⲉⲓⲱⲣⲙ ⲛⲧⲉⲣⲟⲩⲛⲁⲩ ⲉⲣⲟϥ ⲁⲩⲱ ⲡⲉϫⲁⲩ ⲛⲁϥ ϫⲉ ϯⲣⲏⲛⲏ ⲛⲧⲉⲕϩⲓⲏ ⲛⲉⲓ ⲉϩⲟⲩⲛ ⲡⲉⲧⲛⲁⲩ ⲉⲃⲟⲗ

16:5  ⲡⲉϫⲁϥ ⲛⲁⲩ ϫⲉ ϯⲣⲏⲛⲏ ⲛⲧⲁⲓⲉⲓ ⲉⲣⲑⲩⲥⲓⲁ ⲙⲡϫⲟⲉⲓⲥ ⲧⲃⲃⲉⲧⲏⲩⲧⲛ ⲛⲧⲉⲧⲛⲉⲩⲫⲣⲁⲛⲉ ⲛⲙⲙⲁⲓ ⲙⲡⲟⲟⲩ ⲁⲩⲱ ⲁϥⲧⲃⲃⲟ ⲛⲓⲉⲥⲥⲁⲓ ⲙⲛ ⲛⲉϥϣⲏⲣⲉ ⲁϥⲧⲁϩⲙⲟⲩ ⲉⲧⲉⲑⲩⲥⲓⲁ

16:6  ⲁⲥϣⲱⲡⲉ ⲇⲉ ⲛⲧⲉⲣⲟⲩⲉⲓ ⲉϩⲟⲩⲛ ⲁϥⲛⲁⲩ ⲉⲉⲗⲓⲁⲃ ⲡⲉϫⲁϥ ⲉⲧⲃⲏⲏⲧϥ ϫⲉ ⲉⲓⲥ ⲡⲉⲭⲣⲥ ⲣⲱ ⲙⲡϫⲟⲉⲓⲥ ⲙⲡⲉϥⲙⲧⲟ ⲉⲃⲟⲗ

16:7  ⲡⲉϫⲉⲡϫⲟⲉⲓⲥ ⲛⲥⲁⲙⲟⲩⲏⲗ ϫⲉ ⲙⲡⲉⲣϭⲱϣⲧ ⲉϫⲙ ⲡⲉϥⲥⲁ ⲟⲩⲇⲉ ⲉϫⲛ ⲧϭⲟⲧ ⲛⲧⲉϥϣⲓⲏ ϫⲉ ϥⲣⲥⲟϣϥ ⲛⲁϩⲣⲁⲓ ϫⲉ ⲛⲑⲉ ⲁⲛ ⲉⲧⲉⲣⲉⲛⲉⲣⲱⲙⲉ ϭⲱϣⲧ ⲉⲡϩⲟ ⲉⲣⲉⲡⲛⲟⲩⲧⲉ ϩⲱⲱϥ ϭⲱϣⲧ ϫⲉ ⲉⲣⲉⲛⲣⲱⲙⲉ ϭⲱϣⲧ ⲉⲡϩⲟ ⲙⲙⲁⲧⲉ ⲡⲛⲟⲩⲧⲉ ⲇⲉ ⲛⲧⲟϥ ⲉϥϭⲱϣⲧ ⲉⲡϩⲏⲧ

16:8  ⲁⲩⲱ ⲓⲉⲥⲥⲁⲓ ⲁϥⲙⲟⲩⲧⲉ ⲉⲁⲙⲓⲛⲁⲇⲁⲃ ⲁϥⲉⲓ ⲁϥⲁϩⲉⲣⲁⲧϥ ϩⲓⲑⲏ ⲛⲥⲁⲙⲟⲩⲏⲗ ⲡⲉϫⲉⲥⲁⲙⲟⲩⲏⲗ ϫⲉ ⲙⲡⲉⲡϫⲟⲉⲓⲥ ⲥⲉⲧⲡⲡⲉⲓⲕⲉⲧ

16:9  ⲁⲩⲱ ⲉⲓⲉⲥⲥⲁⲓ ⲁϥⲧⲁϩⲟ ⲉⲣⲁⲧϥ ⲛⲥⲁⲙⲁ ⲡⲉϫⲉⲥⲁⲙⲟⲩⲏⲗ ϫⲉ ⲙⲡⲉⲡϫⲟⲉⲓⲥ ⲥⲉⲧⲡⲡⲉⲓⲕⲉⲧ

16:10  ⲓⲉⲥⲥⲁⲓ ⲇⲉ ⲁϥⲧⲁϩⲟ ⲉⲣⲁⲧϥ ⲙⲡⲉϥⲥⲁϣϥ ⲛϣⲏⲣⲉ ϩⲓⲑⲏ ⲛⲥⲁⲙⲟⲩⲏⲗ ⲡⲉϫⲉⲥⲁⲙⲟⲩⲏⲗ ϫⲉ ⲙⲡⲉⲡϫⲟⲉⲓⲥ ⲥⲉⲧⲡⲗⲁⲁⲩ ϩⲛ ⲛⲁⲓ

16:11  ⲡⲉϫⲉⲥⲁⲙⲟⲩⲏⲗ ⲛⲓⲉⲥⲥⲁⲓ ϫⲉ ⲉⲓⲉ ⲁⲛⲉⲕϣⲏⲣⲉ ⲟⲩⲱ ⲡⲉϫⲉⲓⲉⲥⲥⲁⲓ ⲛⲁϥ ϫⲉ ⲉⲧⲓ ⲡⲕⲟⲩⲓ ⲉⲛⲁⲓ ϥϣⲟⲟⲡ ⲁⲩⲱ ⲉⲓⲥ ϩⲏⲏⲧⲉ ϥⲙⲟⲟⲛⲉ ϩⲛ ⲛⲉⲥⲟⲟⲩ ⲡⲉϫⲉⲥⲁⲙⲟⲩⲏⲗ ⲛⲓⲉⲥⲥⲁⲓ ϫⲉ ϫⲟⲟⲩ ⲛⲅⲙⲟⲩⲧⲉ ⲉⲣⲟϥ ϫⲉ ⲛⲧⲛⲛⲁⲛⲟϫⲛ ⲁⲛ ⲉⲟⲩⲱⲙ ϣⲁⲛⲧⲉϥⲉⲓ

16:12  ⲁⲩⲱ ⲁϥϫⲟⲟⲩ ⲁϥⲛⲧϥ ⲉϩⲣⲁⲓ ⲡⲁⲓ ⲇⲉ ⲛⲉⲩⲙⲏⲣϣ ⲡⲉ ⲉϥⲟ ⲛⲥⲁⲓⲏ ⲛⲃⲁⲗ ⲉⲛⲁⲛⲟⲩϥ ⲉⲛⲁⲩ ⲉⲣⲟϥ ⲛⲁϩⲣⲁϥ ⲙⲡϫⲟⲉⲓⲥ ⲡⲉϫⲉⲡϫⲟⲉⲓⲥ ⲥⲁⲙⲟⲩⲏⲗ ϫⲉ ⲧⲱⲟⲩⲛ ⲛⲅⲧⲱϩⲥ ⲛⲇⲁⲩⲉⲓⲇ ⲡⲁⲓ ⲅⲁⲣ ⲟⲩⲁⲅⲁⲑⲟⲥ ⲡⲉ

16:13  ⲁⲩⲱ ⲥⲁⲙⲟⲩⲏⲗ ⲁϥϫⲓ ⲙⲡⲧⲁⲡ ⲛⲛⲉϩ ⲁϥⲧⲱϩⲥ ⲛ ϩⲛ ⲧⲙⲏⲧⲉ ⲛⲛⲉϥⲥⲛⲏⲩ ⲁⲩⲱ ⲡⲉ ⲙⲡϫⲟⲉⲓⲥ ⲁϥⲃⲱϭⲉ ⲉϫⲛ ⲇⲁⲩⲉⲓⲇ ⲛϫⲓⲛ ⲡⲉϩⲟⲟⲩ ⲉⲧⲙⲙⲁⲩ ϣⲁ ⲃⲟⲗ ⲥⲁⲙⲟⲩⲏⲗ ⲇⲉ ⲁϥⲃⲱⲕ ⲉϩⲣⲁⲓ ⲉⲁⲣⲙⲁⲑⲁⲉⲓⲙ

16:14  ⲁⲩⲱ ⲡⲉ ⲙⲡϫⲟⲉⲓⲥ ⲁϥⲥⲁϩⲱⲱϥ ⲉⲃⲟⲗ ⲛⲥⲁⲟⲩⲗ ⲁⲩⲱ ⲁⲩ ⲙⲡⲟⲛⲏⲣⲟⲛ ⲱϫⲧ ⲙⲙⲟϥ ⲛⲧⲟⲟⲧϥ ⲙⲡϫⲟⲉⲓⲥ

16:15  ⲛϩⲙϩⲁⲗ ⲇⲉ ⲛⲥⲁⲟⲩⲗ ⲡⲉϫⲁⲩ ⲛⲁϥ ϫⲉ ⲉⲓⲥ ϩⲏⲏⲧⲉ ⲟⲩⲛⲟⲩ ⲙⲡⲟⲛⲏⲣⲟⲛ ϫⲱⲧ ⲙⲙⲟⲕ ⲛⲧⲟⲟⲧϥ ⲙⲡϫⲟⲉⲓⲥ

16:16  ⲙⲁⲣⲉⲛⲉⲕϩⲙϩⲁⲗ ⲧⲁⲩⲉⲟⲩϣⲁϫⲉ ⲙⲡⲉⲕⲙⲧⲟ ⲉⲃⲟⲗ ⲁⲩⲱ ⲛⲥⲉⲕⲱⲧⲉ ⲛⲥⲁ ⲟⲩⲣⲱⲙⲉ ⲉϥⲥⲟⲟⲩⲛ ⲙⲯⲁⲗⲗⲉⲓ ϩⲛ ⲟⲩⲕⲓⲑⲁⲣⲁ ⲛⲧⲉⲛⲛⲧϥ ⲉϩⲟⲩⲛ ⲙⲡⲉⲛϫⲟⲉⲓⲥ ⲁⲩⲱ ⲉⲣϣⲁⲛⲡⲉ ⲙⲡⲟⲛⲏⲣⲟⲛ ⲉⲓ ⲉϫⲱⲕ ⲉϥⲉⲯⲁⲗⲗⲉⲓ ϩⲛ ⲧⲉϥϭⲓⲛⲩⲣⲁ ⲛϥϯⲉⲙⲧⲟⲛ ⲛⲁⲕ

16:17  ⲡⲉϫⲉⲥⲁⲟⲩⲗ ϭⲉ ⲛⲛⲉϥϩⲙϩⲁⲗ ϫⲉ ⲁⲛⲁⲩ ϭⲉ ⲛⲁⲓ ⲙⲡⲣⲱⲙⲉ ⲉϥⲥⲟⲟⲩⲛ ⲙⲯⲁⲗⲗⲉⲓ ⲕⲁⲗⲱⲥ ⲛⲧⲉⲧⲛⲛⲧϥ ⲉϩⲟⲩⲛ ⲛⲁⲓ

16:18  ⲟⲩⲁ ⲇⲉ ⲛⲛⲉϥϩⲙϩⲁⲗ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲁϥ ϫⲉ ⲉⲓⲥ ϩⲏⲏⲧⲉ ⲁⲓⲛⲁⲩ ⲉⲩϣⲏⲣⲉ ⲛⲧⲉ ⲉⲓⲥⲥⲁⲓ ⲡⲉ ⲉⲃⲟⲗ ϩⲛ ⲃⲏⲑⲗⲉⲉⲙ ⲛⲧⲟϥ ϥⲥⲟⲟⲩⲛ ⲙⲯⲁⲗⲗⲉⲓ ⲡⲣⲱⲙⲉ ⲇⲉ ⲟⲩⲣⲙⲛϩⲏⲧ ⲡⲉ ⲁⲩⲱ ⲟⲩⲣⲱⲙⲉ ⲡⲉ ⲙⲡⲟⲗⲉⲙⲓⲥⲧⲏⲥ ⲉⲩⲥⲱⲫⲟⲥ ⲡⲉ ϩⲙ ⲡⲉϥϣⲁϫⲉ ⲉⲩⲣⲱⲙⲉ ⲡⲉ ⲛⲁⲅⲁⲑⲟⲥ ϩⲙ ⲡⲛⲁⲩ ⲉⲣⲟϥ ⲁⲩⲱ ⲡϫⲟⲉⲓⲥ ⲛⲙⲙⲁϥ

16:19  ⲥⲁⲟⲩⲗ ⲇⲉ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲣⲁⲧϥ ⲛⲓⲉⲥⲥⲁⲓ ⲉϥϫⲱ ⲙⲙⲟⲥ ϫⲉ ⲧⲛⲛⲟⲟⲩ ⲛⲁⲓ ⲙⲡⲉⲕϣⲏⲣⲉ ⲗⲁⲩⲉⲓⲇ ⲉⲧϩⲛⲛⲉⲕⲉⲥⲟⲟⲩ

16:20  ⲓⲉⲥⲥⲁⲓ ⲇⲉ ⲁϥϫⲓ ⲛⲟⲩϣⲓ ⲛⲛⲟⲉⲓⲧ ⲙⲛ ⲟⲩϩⲱⲧ ⲛⲏⲣⲡ ⲁⲩⲱ ⲟⲩⲙⲁⲥ ⲛⲃⲁⲁⲙⲡⲉ ⲁϥϫⲟⲟⲩⲥⲟⲩ ⲛⲥⲁⲟⲩⲗ ⲉⲃⲟⲗ ϩⲓⲧⲟⲟⲧϥ ⲛⲇⲁⲩⲉⲓⲇ ⲡⲉϥϣⲏⲣⲉ

16:21  ⲁⲩⲱ ⲇⲁⲩⲉⲓⲇ ⲁϥⲃⲱⲕ ⲉϩⲟⲩⲛ ϣⲁ ⲥⲁⲟⲩⲗ ⲁϥⲁϩⲉⲣⲁⲧϥ ⲙⲡⲉⲙⲧⲟ ⲉⲃⲟⲗ ⲁϥⲙⲉⲣⲓⲧϥ ⲙⲙⲁⲧⲉ ⲁϥϣⲱⲡⲉ ⲉϥϩⲁⲁⲣⲁⲧϥ ⲉϥϥⲓ ⲛⲛⲉϥⲥⲕⲏⲩⲉ

16:22  ⲁⲩⲱ ⲥⲁⲟⲩⲗ ⲁϥϫⲟⲟⲩ ⲉⲣⲁⲧϥ ⲛⲛⲓⲉⲥⲥⲁⲓ ⲉϥϫⲱ ⲙⲙⲟⲥ ⲛⲁϥ ϫⲉ ⲙⲁⲣⲉⲇⲁⲩⲉⲓⲇ ϭⲱ ϩⲁϩⲧⲏⲓ ϫⲉ ⲁϥϭⲛⲭⲁⲣⲓⲥ ⲛⲁϩⲣⲁⲓ

16:23  ⲁⲩⲱ ⲉⲣϣⲁⲛ ⲡⲉ ⲙⲡⲟⲛⲏⲣⲟⲛ ⲉⲓ ⲉϩⲣⲁⲓ ⲉϫⲛ ⲥⲁⲟⲩⲗ ⲇⲁⲩⲉⲓⲇ ϣⲁϥϫⲓ ⲛⲧⲉϥϭⲓⲛⲏⲣⲁ ϩⲛ ⲧⲉϥϭⲓϫ ⲉϥⲯⲁⲗⲗⲉⲓ ⲁⲩⲱ ϣⲁⲣⲉⲥⲁⲟⲩⲗ ⲙⲧⲟⲛ ⲛⲧⲉ ⲡⲁⲓ ϣⲱⲡⲉ ⲛⲁⲅⲁⲑⲟⲛ ⲛⲧⲉ ⲡⲉ ⲙⲡⲟⲛⲏⲣⲟⲛ ⲥⲁϩⲱⲱϥ ⲉⲃⲟⲗ ⲙⲙⲟϥ