CopSahBible2 - I Samuel - 12

12:1  ⲡⲉϫⲉⲥⲁⲙⲟⲩⲏⲗ ⲛⲛⲣⲱⲙⲉ ⲧⲏⲣⲟⲩ ⲙⲡ ϫⲉ ⲉⲓⲥ ϩⲏⲏⲧⲉ ⲁⲓⲥⲱⲧⲙ ⲉⲡⲉⲧⲛϩⲣⲟⲟⲩ ϩⲛ ϩⲱⲃ ⲛⲓⲙ ⲛⲧⲁⲧⲉⲧⲛϫⲟⲟⲩ ⲛⲁⲓ ⲁⲓⲕⲱ ⲛⲟⲩⲣⲣⲟ ⲉϫⲛⲧⲏⲩⲧⲛ

12:2  ⲧⲉⲛⲟⲩ ϭⲉ ⲉⲓⲥ ⲡⲉⲧⲛⲣⲣⲟ ϥⲛⲁⲙⲟⲟϣⲉ ϩⲓϩⲏ ⲙⲙⲱⲧⲛ ⲁⲛⲟⲕ ⲇⲉ ⲁⲓⲣϩⲗⲗⲟ ⲉⲓⲛⲁϩⲙⲟⲟⲥ ⲛⲧⲁⲙⲧⲟⲛ ⲙⲙⲟⲓ ⲁⲩⲱ ⲉⲓⲥ ⲛⲁϣⲏⲣⲉ ϩⲛ ⲧⲉⲧⲛⲙⲏⲧⲉ ⲁⲛⲟⲕ ϩⲱ ⲉⲓⲥ ϩⲏⲏⲧⲉ ⲁⲓϣⲱⲡⲉ ϩⲛ ⲧⲉⲧⲛⲙⲏⲧⲉ ϫⲓⲛ ⲧⲁⲙⲛⲧⲕⲟⲩⲓ ϣⲁ ⲉϩⲣⲁⲓ ⲉⲡⲟⲟⲩ ⲛϩⲟⲟⲩ

12:3  ⲉⲓⲥ ϩⲏⲏⲧⲉ ⲁⲛⲟⲕ ⲙⲡⲟⲟⲩ ϯⲁϩⲉⲣⲁⲧ ⲙⲡⲉⲧⲛⲙⲧⲟ ⲉⲃⲟⲗ ⲁϫⲓ ⲟⲩϣⲁϫⲉ ⲉⲧⲃⲏⲏⲧ ϩⲓⲑⲏ ⲙⲡϫⲟⲉⲓⲥ ⲁⲩⲱ ϩⲓⲑⲏ ⲙⲡⲉϥⲭⲣⲏⲥⲧⲟⲥ ⲁⲓϫⲓⲙⲁⲥⲉ ⲛⲧⲉ ⲗⲁⲁⲩ ⲙⲙⲱⲧⲛ ⲏ ⲁⲓϫⲓⲟⲩⲉⲓⲱ ⲛⲧⲉ ⲗⲁⲁⲩ ⲙⲙⲱⲧⲛ ⲏ ⲁⲓϫⲓⲗⲁⲁⲩ ⲙⲙⲱⲧⲛ ⲛϫⲛⲁϩ ⲏ ⲁⲓⲑⲙⲕⲉⲗⲁⲁⲩ ⲏ ⲁⲓϫⲓⲧⲁⲓⲟ ⲛⲧⲉ ⲗⲁⲁⲩ ⲏ ⲟⲩⲧⲟⲟⲩⲉ ⲁⲓϫⲓⲧϥ ⲛⲧⲉ ⲗⲁⲁⲩ ⲉϣϫⲉ ⲁϩⲉ ⲁϫⲓⲥ ⲁⲩⲱ ϯⲛⲁⲧⲟⲩⲉⲓⲟϥ ⲛⲏⲧⲛ

12:4  ⲡⲉϫⲁⲩ ⲧⲏⲣⲟⲩ ⲉϩⲟⲩⲛ ϩⲛ ⲥⲁⲙⲟⲩⲏⲗ ϫⲉ ⲙⲡⲉⲕϫⲓⲧⲛ ⲛϭⲟⲛⲥ ⲛⲗⲁⲁⲩ ⲁⲩⲱ ⲙⲡⲉⲕⲙⲟⲕϩⲉⲛ ⲛⲗⲁⲁⲩ ⲁⲩⲱ ⲙⲡⲉⲕⲑⲙⲕⲉⲗⲁⲁⲩ ⲁⲩⲱ ⲙⲡⲉⲕϫⲓⲗⲁⲁⲩ ⲛⲧⲉ ⲗⲁⲁⲩ ⲛⲣⲱⲙⲉ

12:5  ⲡⲉϫⲉⲥⲁⲙⲟⲩⲏⲗ ⲉϩⲟⲩⲛ ϩⲙ ⲡⲗⲁⲟⲥ ϫⲉ ⲡϫⲟⲉⲓⲥ ϥⲟ ⲛⲙⲛⲧⲣⲉ ϩⲛ ⲧⲉⲧⲛⲙⲏⲧⲉ ⲙⲡⲟⲟⲩ ⲁⲩⲱ ⲡⲉϥⲭⲣⲏⲥⲧⲟⲥ ⲟ ⲙⲙⲛⲧⲣⲉ ϫⲉ ⲙⲡⲟⲟⲩ ⲛϩⲟⲟⲩ ⲙⲡⲉⲧⲛϩⲉ ⲉϩⲱⲃ ⲛϫⲓⲛϭⲟⲛⲥ ϩⲛ ⲛⲁϭⲓϫ ⲡⲉϫⲁⲩ ⲧⲏⲣⲟⲩ ϫⲉ ϥⲟ ⲙⲙⲛⲧⲣⲉ

12:6  ⲡⲉϫⲉⲥⲁⲙⲟⲩⲏⲗ ⲉϩⲟⲩⲛ ϩⲙ ⲡⲗⲁⲟⲥ ⲉϥϫⲱ ⲙⲙⲟⲥ ϫⲉ ⲡϫⲟⲉⲓⲥ ⲡⲛⲟⲩⲧⲉ ⲡⲉⲛⲧⲁϥⲧⲁⲙⲓⲉⲙⲱⲩⲥⲏⲥ ⲙⲛ ⲁⲁⲣⲱⲛ ⲡⲉⲛⲧⲁϥⲉⲓⲛⲉ ⲛⲛⲉⲛⲉⲓⲟⲧⲉ ⲉⲃⲟⲗ ϩⲛ ⲕⲏⲙⲉ

12:7  ⲧⲉⲛⲟⲩ ϭⲉ ⲁϩⲉⲣⲁⲧⲧⲏⲩⲧⲛ ⲁⲩⲱ ϯⲛⲁϩⲁⲡ ⲉⲣⲱⲧⲛ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛⲧⲁⲧⲁⲩⲟ ⲉⲣⲱⲧⲛ ⲛⲧⲇⲓⲕⲁⲓⲟⲥⲩⲛⲏ ⲧⲏⲣⲥ ⲙⲡϫⲟⲉⲓⲥ ⲛⲉϩⲃⲏⲩⲉ ⲛⲧⲁϥⲁⲁⲩ ⲛⲏⲧⲛ ⲙⲛ ⲛⲉⲧⲛⲉⲓⲟⲧⲉ

12:8  ⲛⲑⲉ ⲛⲧⲁⲓⲁⲕⲱⲃ ⲙⲛ ⲛⲉϥϣⲏⲣⲉ ⲃⲱⲕ ⲉϩⲟⲩⲛ ⲉⲕⲏⲙⲉ ⲁⲩⲱ ⲁⲕⲏⲙⲉ ⲑⲃⲃⲓⲟⲟⲩ ⲁⲛⲉⲛⲉⲓⲟⲧⲉ ⲱϣ ⲉⲃⲟⲗ ⲉϩⲣⲁⲓ ⲉⲡϫⲟⲉⲓⲥ ⲁⲩⲱ ⲁⲡϫⲟⲉⲓⲥ ϫⲟⲟⲩ ⲙⲙⲱⲩⲥⲏⲥ ⲙⲛ ⲁⲁⲣⲱⲛ ⲁⲩⲉⲓⲛⲉ ⲛⲛⲉⲛⲉⲓⲟⲧⲉ ⲉⲃⲟⲗ ϩⲛ ⲕⲏⲙⲉ ⲁⲡϫⲟⲉⲓⲥ ⲧⲣⲉⲩⲟⲩⲱϩ ϩⲙ ⲡⲉⲓⲙⲁ

12:9  ⲁⲩⲱ ⲁⲩⲣⲡⲱⲃϣ ⲙⲡϫⲟⲉⲓⲥ ⲡⲉⲩⲛⲟⲩⲧⲉ ⲁⲡϫⲟⲉⲓⲥ ⲧⲁⲁⲩ ⲉϩⲣⲁⲓ ⲉⲧⲟⲟⲧϥ ⲛⲥⲓⲥⲁⲣⲁ ⲡⲁⲣⲭⲏⲥⲧⲣⲁⲧⲏⲅⲟⲥ ⲛⲓⲁⲃⲓⲥ ⲡⲣⲣⲟ ⲛⲁⲥⲱⲣ ⲁⲩⲱ ⲉϩⲣⲁⲓ ⲉⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲉϩⲣⲁⲓ ⲉⲧⲟⲟⲧϥ ⲙⲡⲣⲣⲟ ⲙⲙⲱⲁⲃ ⲁϥⲙⲓϣⲉ ⲛⲙⲙⲁⲩ

12:10  ⲁⲩⲱ ⲁⲩⲱϣ ⲉⲃⲟⲗ ⲉϩⲣⲁⲓ ⲉⲡϫⲟⲉⲓⲥ ⲉⲩϫⲱ ⲙⲙⲟⲥ ϫⲉ ⲁⲛⲣⲛⲟⲃⲉ ϫⲉ ⲁⲛⲕⲱ ⲛⲥⲱⲛ ⲙⲡϫⲟⲉⲓⲥ ⲁⲩⲱ ⲁⲛⲣϩⲙϩⲁⲗ ⲛⲛⲉⲃⲁϩⲁⲗⲓⲙ ⲙⲛ ⲛⲉⲙⲁ ⲛϣⲏⲛ ⲧⲉⲛⲟⲩ ϭⲉ ⲛⲟⲩϩⲙ ⲙⲙⲟⲛ ⲉⲧⲟⲟⲧⲟⲩ ⲛⲛⲉⲛϫⲁϫⲉ ⲁⲩⲱ ⲧⲉⲛⲛⲁⲣϩⲙϩⲁⲗ ⲛⲁⲕ

12:11  ⲁⲡϫⲟⲉⲓⲥ ⲇⲉ ϫⲟⲟⲩ ⲛϩⲓⲉⲣⲟⲃⲁⲁⲗ ⲙⲛ ⲃⲁⲣⲁⲕ ⲙⲛ ⲓⲉⲫⲑⲁⲉ ⲙⲛ ⲥⲁⲙⲟⲩⲏⲗ ⲁⲩⲱ ⲁϥⲛⲉϩⲙⲧⲏⲩⲧⲛ ⲛⲧⲟⲟⲧⲟⲩ ⲛⲛⲉⲧⲛϫⲁϫⲉ ⲉⲧⲕⲱⲧⲉ ⲉⲣⲱⲧⲛ ⲁⲩⲱ ⲛⲉⲧⲉⲧⲛϣⲟⲟⲡ ⲡⲉ ⲉⲧⲉⲧⲛⲥⲙⲟⲛⲧ

12:12  ⲁⲧⲉⲧⲛⲛⲁⲩ ⲇⲉ ϫⲉ ⲛⲁⲁⲥ ⲡⲣⲣⲟ ⲛⲛⲉϣⲏⲣⲉ ⲛⲁⲙⲙⲱⲛ ⲁϥⲉⲓ ⲉϫⲛⲧⲏⲩⲧⲛ ⲡⲉϫⲏⲧⲛ ϫⲉ ⲛⲧⲉⲛⲛⲁϭⲱ ⲁⲛ ϩⲓⲛⲁⲓ ⲁⲗⲗⲁ ⲟⲩⲛⲟⲩⲣⲣⲟ ⲛⲁⲣⲣⲟ ⲉϫⲱⲛ ⲉⲡϫⲟⲉⲓⲥ ⲡⲉⲛⲛⲟⲩⲧⲉ ⲡⲉ ⲡⲉⲛⲣⲣⲟ

12:13  ⲧⲉⲛⲟⲩ ϭⲉ ⲉⲓⲥ ⲡⲣⲣⲟ ⲛⲧⲁⲧⲉⲧⲛⲥⲟⲧⲡϥ ⲛⲏⲧⲛ ⲉⲓⲥ ⲡϫⲟⲉⲓⲥ ⲁϥϯ ⲛⲟⲩⲣⲣⲟ ⲉϫⲛⲧⲏⲩⲧⲛ

12:14  ⲁⲣⲓϩⲟⲧⲉ ⲛϩⲏⲧϥ ⲙⲡϫⲟⲉⲓⲥ ⲛⲧⲉⲧⲛⲣϩⲙϩⲁⲗ ⲛⲁϥ ⲛⲧⲉⲧⲛⲥⲱⲧⲙ ⲛⲥⲁ ⲡⲉϥϩⲣⲟⲟⲩ ⲛⲧⲉⲧⲛⲧⲙϯⲧⲱⲛ ⲙⲛ ⲧⲧⲁⲡⲣⲟ ⲙⲡϫⲟⲉⲓⲥ ⲁⲩⲱ ⲛⲧⲱⲧⲛ ⲙⲛ ⲡⲉⲧⲛⲣⲣⲟ ⲉⲧⲛⲁⲣⲣⲟ ⲉϫⲛⲧⲏⲩⲧⲛ ⲛⲧⲉⲧⲛϣⲱⲡⲉ ⲉⲧⲉⲧⲛⲟⲩⲏϩ ⲛⲥⲁ ⲡϫⲟⲉⲓⲥ

12:15  ⲉⲧⲉⲧⲛϣⲁⲛⲧⲙⲥⲱⲧⲙ ⲇⲉ ⲛⲥⲁ ⲡⲉϩⲣⲟⲟⲩ ⲙⲡϫⲟⲉⲓⲥ ⲁⲩⲱ ⲛⲧⲉⲧⲛϯⲧⲱⲛ ⲙⲛ ⲧⲧⲁⲡⲣⲟ ⲙⲡϫⲟⲉⲓⲥ ⲧϭⲓϫ ⲙⲡϫⲟⲉⲓⲥ ⲛⲁϣⲱⲡⲉ ⲉϫⲛⲧⲏⲩⲧⲛ ⲁⲩⲱ ⲉϫⲛ ⲡⲉⲧⲛⲣⲣⲟ

12:16  ⲧⲉⲛⲟⲩ ϭⲉ ⲁϩⲉⲣⲁⲧⲧⲏⲩⲧⲛ ⲛⲧⲉⲧⲛⲛⲁⲩ ⲉⲡⲉⲓⲛⲟϭ ⲛϣⲁϫⲉ ⲡⲁⲓ ⲉⲧⲉⲣⲉⲡϫⲟⲉⲓⲥ ⲛⲁⲁⲁϥ ⲙⲡϩⲁⲁⲧⲉ ⲉⲃⲟⲗ ⲛⲛⲉⲧⲛⲃⲁⲗ

12:17  ⲙⲏ ⲙⲡⲱϩⲥ ⲙⲡⲉⲥⲟⲩⲟ ⲁⲛ ⲡⲉ ⲡⲟⲟⲩ ⲉⲓⲥ ϩⲏⲏⲧⲉ ϯⲉⲡⲓⲕⲁⲗⲉⲓ ⲙⲡϫⲟⲉⲓⲥ ⲛϥϯ ⲛⲟⲩϩⲣⲟⲟⲩ ⲙⲛ ⲟⲩϩⲟⲩⲙⲡⲉ ⲛⲧⲉⲧⲛⲉⲓⲙⲉ ⲁⲩⲱ ⲛⲧⲉⲧⲛⲛⲁⲩ ϫⲉ ⲧⲉⲧⲛⲕⲁⲕⲓⲁ ⲛⲧⲁⲧⲉⲧⲛⲁⲁⲥ ⲟⲩⲛⲟϭ ⲧⲉ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲉⲁⲧⲉⲧⲛⲁⲓⲧⲉⲓ ⲛⲟⲩⲣⲣⲟ ⲉϫⲛⲧⲏⲩⲧⲛ

12:18  ⲁⲩⲱ ⲥⲁⲙⲟⲩⲏⲗ ⲁϥⲉⲡⲓⲕⲁⲗⲉⲓ ⲙⲡϫⲟⲉⲓⲥ ⲁⲡϫⲟⲉⲓⲥ ϯ ⲛϩⲉⲛϩⲣⲟⲟⲩ ⲙⲛ ⲟⲩϩⲟⲩⲙⲡⲉ ⲙⲡⲉϩⲟⲟⲩ ⲉⲧⲙⲙⲁⲩ ⲡⲗⲁⲟⲥ ⲇⲉ ⲧⲏⲣϥ ⲁⲩⲣϩⲟⲧⲉ ⲛϩⲏⲧϥ ⲙⲡϫⲟⲉⲓⲥ ⲉⲙⲁⲧⲉ ⲁⲩⲱ ϩⲁⲑⲏ ⲛⲥⲁⲙⲟⲩⲏⲗ

12:19  ⲡⲉϫⲉⲡⲗⲁⲟⲥ ⲧⲏⲣϥ ⲉϩⲟⲩⲛ ϩⲛ ⲥⲁⲙⲟⲩⲏⲗ ϫⲉ ϣⲗⲏⲗ ⲛⲧⲟⲕ ⲉϫⲛ ⲛⲉⲕϩⲙϩⲁⲗ ⲉϩⲣⲁⲓ ⲉⲡϫⲟⲉⲓⲥ ⲡⲉⲕⲛⲟⲩⲧⲉ ϫⲉ ⲛⲛⲉⲛⲙⲟⲩ ⲉⲃⲟⲗ ϫⲉ ⲁⲛⲟⲩⲱϩ ⲉϩⲣⲁⲓ ⲉϫⲛ ⲛⲉⲛⲛⲟⲃⲉ ⲧⲏⲣⲟⲩ ⲁⲩⲱ ⲉϫⲛ ⲧⲉⲛⲕⲁⲕⲓⲁ ⲉⲁⲛⲁⲓⲧⲉⲓ ⲛⲟⲩⲣⲣⲟ ⲉϫⲱⲛ

12:20  ⲡⲉϫⲉⲥⲁⲙⲟⲩⲏⲗ ⲉϩⲟⲩⲛ ϩⲙ ⲡⲗⲁⲟⲥ ϫⲉ ⲙⲡⲉⲣⲣϩⲟⲧⲉ ⲛⲧⲱⲧⲛ ϫⲉ ⲁⲧⲉⲧⲛⲉⲓⲣⲉ ⲛⲧⲉⲓⲕⲁⲕⲓⲁ ⲧⲏⲣⲥ ⲡⲗⲏⲛ ⲙⲡⲉⲣⲡⲱϣⲥ ⲉⲃⲟⲗ ⲉⲥⲁϩⲉⲧⲏⲩⲧⲛ ⲉⲃⲟⲗ ⲙⲡϫⲟⲉⲓⲥ ⲁⲗⲗⲁ ⲁⲣⲓϩⲙϩⲁⲗ ⲙⲡϫⲟⲉⲓⲥ ϩⲙ ⲡⲉⲧⲛϩⲏⲧ ⲧⲏⲣϥ

12:21  ⲉⲧⲙⲃⲱⲕ ⲉⲟⲩⲉϩⲧⲏⲩⲧⲛ ⲛⲥⲁ ⲛⲉⲧⲛⲥⲉϣⲟⲟⲡ ⲁⲛ ⲛⲥⲉⲛⲁⲉϣⲣⲗⲁⲁⲩ ⲁⲛ ⲛϩⲱⲃ ⲁⲩⲱ ⲛⲥⲉⲛⲁⲉϣⲛⲉϩⲙⲧⲏⲩⲧⲛ ⲁⲛ ⲛϩⲉⲛⲛⲟⲩⲧⲉ ⲅⲁⲣ ⲁⲛ ⲛⲉ

12:22  ϫⲉ ⲙⲡϫⲟⲉⲓⲥ ⲛⲁⲕⲱ ⲛⲥⲱϥ ⲁⲛ ⲙⲡⲉϥⲗⲁⲟⲥ ⲉⲧⲃⲉ ⲡⲉϥⲛⲟϭ ⲛⲣⲁⲛ ϫⲉ ⲛⲑⲉ ⲛⲧⲁⲡϫⲟⲉⲓⲥ ⲉⲓⲣⲉ ⲁϥϣⲉⲡⲧⲏⲩⲧⲛ ⲉⲣⲟϥ ⲉⲧⲃⲉ ⲡⲉϥⲛⲟϭ ⲛⲣⲁⲛ ⲉⲩⲗⲁⲟⲥ ⲛⲁϥ

12:23  ⲁⲛⲟⲕ ϩⲱ ⲛⲛⲉⲥϣⲱⲡⲉ ⲙⲙⲟⲓ ⲣⲛⲟⲃⲉ ⲉⲡϫⲟⲉⲓⲥ ⲉⲕⲁⲧⲟⲟⲧ ⲉⲃⲟⲗ ⲁϫⲛ ϣⲗⲏⲗ ⲉϩⲣⲁⲓ ⲉϫⲛⲧⲏⲩⲧⲛ ⲁⲗⲗⲁ ϯⲛⲁⲣϩⲙϩⲁⲗ ⲙⲡϫⲟⲉⲓⲥ ⲛⲧⲁⲧⲥⲁⲃⲱⲧⲛ ⲉⲧⲉϩⲓⲏ ⲉⲧⲛⲁⲛⲟⲩⲥ ⲁⲩⲱ ⲉⲧⲥⲟⲩⲧⲱⲛ

12:24  ⲡⲗⲏⲛ ⲁⲣⲓϩⲟⲧⲉ ⲛϩⲏⲧϥ ⲙⲡϫⲟⲉⲓⲥ ⲛⲧⲉⲧⲛⲣϩⲙϩⲁⲗ ⲛⲁϥ ϩⲛ ⲟⲩⲙⲉ ⲁⲩⲱ ϩⲙ ⲡⲉⲧⲛϩⲏⲧ ⲧⲏⲣϥ ϫⲉ ⲁⲧⲉⲧⲛⲛⲁⲩ ⲉⲛⲉϣⲡⲏⲣⲉ ⲛⲧⲁϥⲁⲁⲩ ⲛⲙⲙⲏⲧⲛ

12:25  ⲁⲩⲱ ϩⲛ ⲟⲩⲕⲁⲕⲓⲁ ⲉⲧⲉⲧⲛϣⲁⲛⲣⲛⲟⲃⲉ ⲛⲧⲱⲧⲛ ⲙⲛ ⲛⲉⲧⲛⲣⲣⲟ ⲡϫⲟⲉⲓⲥ ⲛⲁⲉⲓⲛⲉ ⲉϫⲛⲧⲏⲩⲧⲛ ⲛⲛⲉⲧⲛϫⲁϫⲉ