CopSahBible2 - I Samuel - 8

8:1  ⲁⲥϣⲱⲡⲉ ⲇⲉ ⲛⲧⲉⲣⲉⲥⲁⲙⲟⲩⲏⲗ ⲣϩⲗⲗⲟ ⲁϥⲕⲁⲑⲓⲥⲧⲁ ⲛⲛⲉϥϣⲏⲣⲉ ⲛⲇⲓⲕⲁⲥⲧⲏⲥ ⲉϫⲙ ⲡ

8:2  ⲁⲩⲱ ⲛⲁⲓ ⲛⲉ ⲛⲣⲁⲛ ⲛⲛⲉϥϣⲏⲣⲉ ⲡϣⲣⲡⲙⲓⲥⲉ ⲡⲉ ⲓⲱⲏⲗ ⲁⲩⲱ ⲡⲙⲉϩⲥⲛⲁⲩ ⲡⲉ ⲁⲃⲓⲁ ⲉⲩⲟ ⲛⲣⲉϥϯϩⲁⲡ ϩⲛ ⲃⲏⲣⲥⲁⲃⲉⲉ

8:3  ⲛⲉϥϣⲏⲣⲉ ⲇⲉ ⲙⲡⲟⲩⲙⲟⲟϣⲉ ⲕⲁⲧⲁ ⲧⲉϥⲟⲑⲉ ⲁⲗⲗⲁ ⲁⲩⲣⲟⲕⲧⲟⲩ ⲉⲃⲟⲗ ϩⲛ ⲧⲙⲉ ⲁⲩⲱ ⲛⲉⲩϫⲓⲇⲱⲣⲟⲛ ⲉⲙⲉⲩⲥⲟⲟⲩⲧⲛ ⲉⲃⲟⲗ ⲙⲡϩⲁⲡ

8:4  ⲁⲩⲱ ⲛϣⲏⲣⲉ ⲙⲡ ⲁⲩⲥⲱⲟⲩϩ ⲉϩⲟⲩⲛ ⲉⲛⲉⲩⲉⲣⲏⲩ ⲁⲩⲉⲓ ⲉϩⲣⲁⲓ ⲉⲁⲣⲙⲁⲑⲁⲉⲓⲙ ⲉⲣⲁⲧϥ ⲛⲥⲁⲙⲟⲩⲏⲗ

8:5  ⲡⲉϫⲁⲩ ⲛⲁϥ ϫⲉ ⲉⲓⲥ ϩⲏⲏⲧⲉ ⲛⲧⲟⲕ ⲁⲕⲣϩⲗⲗⲟ ⲛⲉⲕϣⲏⲣⲉ ⲇⲉ ⲙⲡⲟⲩⲙⲟⲟϣⲉ ⲕⲁⲧⲁ ⲧⲉⲕⲟⲑⲉ ⲧⲉⲛⲟⲩ ϭⲉ ⲧⲱⲟⲩⲛ ⲛⲅⲕⲁⲑⲓⲥⲧⲁ ⲉϫⲱⲛ ⲛⲟⲩⲣⲣⲟ ⲉⲧⲣⲉϥϯϩⲁⲡ ⲉⲣⲟⲛ ⲛⲑⲉ ⲛⲛⲉⲕⲉϩⲉⲑⲛⲟⲥ

8:6  ⲁⲩⲱ ⲡϣⲁϫⲉ ⲁϥϣⲱⲡⲉ ⲙⲡⲟⲛⲏⲣⲟⲛ ⲛⲁϩⲣⲉⲛ ⲥⲁⲙⲟⲩⲏⲗ ⲛⲧⲉⲣⲟⲩϫⲟⲟⲥ ϫⲉ ⲙⲁ ⲛⲁⲛ ⲛⲟⲩⲣⲣⲟ ⲉⲃⲟⲗ ϩⲓϫⲱⲛ ⲉⲧⲣⲉϥϯϩⲁⲡ ⲉⲣⲟⲛ ⲁⲩⲱ ⲥⲁⲙⲟⲩⲏⲗ ⲁϥϣⲗⲏⲗ ⲉϩⲣⲁⲓ ⲉⲡϫⲟⲉⲓⲥ

8:7  ⲡⲉϫⲉⲡϫⲟⲉⲓⲥ ⲇⲉ ⲛⲥⲁⲙⲟⲩⲏⲗ ϫⲉ ⲥⲱⲧⲙ ⲛⲥⲁ ⲡⲉϩⲣⲟⲟⲩ ⲙⲡⲗⲁⲟⲥ ⲕⲁⲧⲁ ⲑⲉ ⲉⲧⲟⲩϣⲁϫⲉ ⲛⲙⲙⲁⲕ ϫⲉ ⲛⲧⲟⲕ ⲁⲛ ⲡⲉ ⲛⲧⲁⲕⲥⲟϣϥⲕ ⲉⲧⲉⲙⲣⲣⲣⲟ ⲉϫⲱⲟⲩ

8:8  ⲕⲁⲧⲁ ϩⲱⲃ ⲛⲓⲙ ⲛⲧⲁⲩⲁⲁⲩ ⲛⲁⲓ ⲛϫⲓⲛ ⲉⲡⲉϩⲟⲟⲩ ⲛⲧⲁⲓⲉⲛⲧⲟⲩ ⲉⲃⲟⲗ ϩⲙ ⲡⲕⲁϩ ⲛⲕⲏⲙⲉ ϣⲁ ⲉϩⲣⲁⲓ ⲉⲡⲟⲟⲩ ⲛϩⲟⲟⲩ ⲁⲩⲱ ⲁⲩⲕⲁⲁⲧ ⲛⲥⲱⲟⲩ ⲁⲩⲣϩⲙϩⲁⲗ ⲛϩⲉⲛⲕⲉⲛⲟⲩⲧⲉ ⲧⲁⲓ ⲧⲉ ⲑⲉ ⲉⲧⲟⲩⲉⲓⲣⲉ ⲙⲙⲟⲥ ⲛⲁⲕ ϩⲱⲱⲕ

8:9  ⲧⲉⲛⲟⲩ ϭⲉ ⲥⲱⲧⲙ ⲛⲥⲁ ⲡⲉⲩϩⲣⲟⲟⲩ ϩⲛ ⲟⲩⲙⲛⲧⲙⲛⲧⲣⲉ ⲇⲉ ⲁⲣⲓⲙⲛⲧⲣⲉ ⲛⲁⲩ ⲁⲩⲱ ⲛⲅⲧⲁⲩⲟ ⲉⲣⲟⲟⲩ ⲙⲡⲇⲓⲕⲁⲓⲱⲙⲁ ⲙⲡⲣⲣⲟ ⲡⲁⲓ ⲉⲧⲛⲁⲣⲣⲣⲟ ⲉϩⲣⲁⲓ ⲉϫⲱⲟⲩ

8:10  ⲁⲩⲱ ⲥⲁⲙⲟⲩⲏⲗ ⲁϥⲧⲁⲩⲟ ⲙⲡϣⲁϫⲉ ⲧⲏⲣϥ ⲙⲡϫⲟⲉⲓⲥ ⲉⲡⲗⲁⲟⲥ ⲛⲉⲧⲁⲓⲧⲉⲓ ⲛⲧⲟⲟⲧϥ ⲛⲟⲩⲣⲣⲣⲟ ⲉϩⲣⲁⲓ ⲉϫⲱⲟⲩ

8:11  ⲉϥϫⲱ ⲙⲙⲟⲥ ϫⲉ ⲡⲁⲓ ⲡⲉ ⲡⲇⲓⲕⲁⲓⲱⲙⲁ ⲙⲡⲣⲣⲟ ⲡⲁⲓ ⲉⲧⲛⲁⲣⲣⲣⲟ ⲉϫⲛⲧⲏⲩⲧⲛ ⲛⲉⲧⲛϣⲏⲣⲉ ϥⲛⲁϥⲓⲧⲟⲩ ⲛⲧⲉⲧⲏⲩⲧⲛ ⲛϥⲕⲁⲁⲩ ϩⲁⲣⲁⲧⲟⲩ ⲛⲛⲉϥϩⲁⲣⲙⲁ ⲙⲛ ⲛⲉϥϩⲓⲡⲡⲉⲩⲥ ⲁⲩⲱ ⲉⲩⲡⲏⲧ ϩⲓⲑⲏ ⲛⲛⲉϥϩⲁⲣⲙⲁ

8:12  ⲉⲧⲣⲉϥϩⲟⲕⲟⲩ ⲟⲛ ⲛϥⲁⲁⲩ ⲛⲁϥ ⲛⲭⲓⲗⲓⲁⲣⲭⲟⲥ ϩⲓ ϩⲏⲕⲁⲧⲟⲛⲧⲁⲣⲭⲟⲥ ⲁⲩⲱ ⲉⲧⲣⲉⲩⲱϩⲥ ⲙⲡⲉϥⲱϩⲥ ⲁⲩⲱ ⲉⲧⲣⲉⲩϫⲱⲱⲗⲉ ⲙⲡⲉϥϫⲱⲱⲗⲉ ⲁⲩⲱ ⲉⲧⲣⲉⲩⲙⲟⲩⲛⲅ ⲛⲛⲉϥⲥⲟⲧⲃⲉϥ ⲙⲙⲓϣⲉ ⲁⲩⲱ ⲛⲥⲟⲧⲃⲉϥ ⲛⲛⲉϥϩⲁⲣⲙⲁ

8:13  ⲁⲩⲱ ⲛⲉⲧⲛⲕⲉϣⲉⲉⲣⲉ ϥⲛⲁϫⲓⲧⲟⲩ ⲉⲧⲣⲉⲩⲡⲉⲥⲧⲥⲟϭⲉⲛ ⲁⲩⲱ ⲉⲧⲣⲉⲩⲥⲁϩⲧⲉ ⲁⲩⲱ ⲉⲧⲣⲉⲩⲧⲱϭ

8:14  ⲛⲉⲧⲛⲕⲉⲓⲱϩⲉ ⲉⲧϫⲏⲩ ⲁⲩⲱ ⲛⲉⲧⲉⲙⲙⲁ ⲛⲉⲗⲟⲟⲗⲉ ⲙⲛ ⲛⲉⲧⲛϣⲛⲏ ⲛϫⲟⲉⲓⲧ ⲉⲧⲛⲁⲛⲟⲩⲟⲩ ϥⲛⲁϫⲓⲧⲟⲩ ⲛϥⲧⲁⲁⲩ ⲛⲛⲉϥϩⲙϩⲁⲗ

8:15  ⲁⲩⲱ ⲡⲉⲧⲛϭⲣⲟϭ ⲙⲛ ⲛⲉⲧⲉⲙⲙⲁ ⲛⲉⲗⲟⲟⲗⲉ ϥⲛⲁϫⲓⲣⲉⲙⲏⲧ ⲙⲙⲟⲟⲩ ⲛϥⲧⲁⲁⲩ ⲛⲛⲉϥϩⲙϩⲁⲗ ⲙⲛ ⲛⲉϥⲥⲓⲟⲩⲣ

8:16  ⲁⲩⲱ ⲛⲉⲧⲛϩⲙϩⲁⲗ ⲛϩⲟⲟⲩⲧ ⲙⲛ ⲛⲉⲧⲛϩⲙϩⲁⲗ ⲛⲥϩⲓⲙⲉ ⲁⲩⲱ ⲛⲉⲧⲛⲁϩⲟⲟⲩ ⲉⲧⲛⲁⲛⲟⲩⲟⲩ ⲙⲛ ⲛⲉⲧⲉⲛⲉⲥⲟⲟⲩ ϥⲛⲁϫⲓⲧⲟⲩ ⲛϥϫⲓⲣⲉⲙⲏⲧ ⲙⲙⲟⲟⲩ ⲉⲛⲉϥϩⲃⲏⲩⲉ

8:17  ⲁⲩⲱ ⲛⲉⲧⲛⲟϩⲉ ⲛⲉⲥⲟⲟⲩ ϥⲛⲁϫⲓⲣⲉⲙⲏⲧ ⲙⲙⲟⲟⲩ ⲛⲧⲱⲧⲛ ϩⲱⲧⲧⲏⲩⲧⲛ ⲧⲉⲧⲛⲛⲁϣⲱⲡⲉ ⲛⲁϥ ⲛϩⲙϩⲁⲗ

8:18  ⲁⲩⲱ ⲛⲧⲉⲧⲛⲱϣ ⲉⲃⲟⲗ ⲙⲡⲉϩⲟⲟⲩ ⲉⲧⲙⲙⲁⲩ ϩⲓⲑⲏ ⲙⲡⲉⲧⲛⲣⲣⲟ ⲡⲁⲓ ⲛⲧⲁⲧⲉⲧⲛⲥⲟⲧⲡϥ ⲛⲏⲧⲛ ⲛⲧⲉⲧⲙⲡϫⲟⲉⲓⲥ ⲥⲱⲧⲙ ⲉⲣⲱⲧⲛ ⲙⲡⲉϩⲟⲟⲩ ⲉⲧⲙⲙⲁⲩ ϫⲉ ⲛⲧⲱⲧⲛ ⲁⲧⲉⲧⲛⲥⲱⲧⲡ ⲛⲏⲧⲛ ⲛⲟⲩⲣⲣⲟ

8:19  ⲁⲩⲱ ⲙⲡⲉⲡⲗⲁⲟⲥ ⲣϩⲛⲁϥ ⲉⲥⲱⲧⲙ ⲛⲥⲁ ⲥⲁⲙⲟⲩⲏⲗ ⲡⲉϫⲁⲩ ⲛⲁϥ ϫⲉ ⲛⲧⲉⲛⲛⲁϭⲱ ⲁⲛ ϩⲓⲛⲁⲓ ⲁⲗⲗⲁ ⲟⲩⲛⲟⲩⲣⲣⲟ ⲛⲁϫⲡⲉϣⲱⲡⲉ ϩⲓϫⲱⲛ

8:20  ⲛⲧⲉⲛⲣⲑⲉ ϩⲱⲱⲛ ⲛⲛⲉⲕⲉϩⲉⲑⲛⲟⲥ ⲧⲏⲣⲟⲩ ⲛⲧⲉⲡⲉⲛⲣⲣⲟ ϯϩⲁⲡ ⲉⲣⲟⲛ ⲁⲩⲱ ⲛϥⲙⲟⲟϣⲉ ϩⲓϩⲏ ⲙⲙⲟⲛ ⲛϥⲙⲓϣⲉ ⲙⲛ ⲡⲡⲟⲗⲉⲙⲟⲥ ⲉⲧⲛⲁⲧⲱⲟⲩⲛ ⲉϫⲱⲛ

8:21  ⲁⲩⲱ ⲥⲁⲙⲟⲩⲏⲗ ⲁϥⲥⲱⲧⲙ ⲉⲛⲉϣⲁϫⲉ ⲧⲏⲣⲟⲩ ⲙⲡⲗⲁⲟⲥ ⲁϥⲧⲁⲩⲟⲟⲩ ⲉⲛⲉⲙⲁⲁϫⲉ ⲙⲡϫⲟⲉⲓⲥ

8:22  ⲡⲉϫⲉⲡϫⲟⲉⲓⲥ ⲛⲥⲁⲙⲟⲩⲏⲗ ϫⲉ ⲥⲱⲧⲙ ⲛⲥⲁ ⲡⲉⲩϩⲣⲟⲟⲩ ⲛⲅⲧⲱϩⲥ ⲛⲟⲩⲣⲣⲟ ⲉϫⲱⲟⲩ ⲁⲩⲱ ⲥⲁⲙⲟⲩⲏⲗ ⲡⲉϫⲁϥ ⲛⲛⲣⲱⲙⲉ ⲧⲏⲣⲟⲩ ⲙⲡ ϫⲉ ⲙⲁⲣⲉⲡⲟⲩⲁ ⲡⲟⲩⲁ ⲙⲙⲱⲧⲛ ⲃⲱⲕ ⲉϩⲣⲁⲓ ⲉⲧⲉϥⲡⲟⲗⲓⲥ