CopSahBible2 - I Samuel - 20

20:1  ⲇⲁⲩⲉⲓⲇ ⲇⲉ ⲁϥⲡⲱⲧ ⲉⲃⲟⲗ ϩⲛ ⲁⲩⲁⲑ ⲛⲧⲉ ϩⲣⲁⲙⲙⲁ ⲁⲩⲱ ⲁϥⲓ ⲉϩⲟⲩⲛ ⲉϩⲣⲁϥ ⲛⲓⲱⲛⲁⲑⲁⲛ ⲡⲉϫⲁϥ ⲛⲁϥ ϫⲉ ⲟⲩ ⲡⲉ ⲛⲧⲁⲓⲁⲁϥ ⲁⲩⲱ ⲟⲩ ⲡⲉ ⲡⲁϫⲓⲛϭⲟⲛⲥ ⲛⲧⲁⲓⲁⲁϥ ⲏ ⲡⲁⲛⲟⲃⲉ ⲟⲩ ⲡⲉ ⲙⲡⲉⲙⲧⲟ ⲉⲃⲟⲗ ⲙⲡⲉⲕⲉⲓⲱⲧ ϫⲉ ϥⲕⲱⲧⲉ ⲛⲥⲁ ⲧⲁⲯⲩⲭⲏ ⲉϥⲓⲧⲥ

20:2  ⲡⲉϫⲉⲓⲱⲛⲁⲑⲁⲛ ϫⲉ ⲙⲡⲉⲕⲣⲗⲁⲁⲩ ⲛⲅⲛⲁⲙⲟⲩ ⲁⲛ ⲉⲓⲥ ϩⲏⲏⲧⲉ ⲡⲁⲉⲓⲱⲧ ⲛϥⲛⲁⲣⲗⲁⲁⲩ ⲁⲛ ⲛϣⲁϫⲉ ⲟⲩⲇⲉ ⲟⲩⲛⲟϭ ⲟⲩⲇⲉ ⲟⲩⲕⲟⲩⲓ ⲙⲡⲉϥϭⲟⲗⲡϥ ⲉⲛⲁⲙⲁⲁϫⲉ ⲁⲩⲱ ϭⲉ ⲉⲣⲉⲡⲁⲉⲓⲱⲧ ⲛⲁϩⲉⲡⲡⲉⲓϣⲁϫⲉ ⲉⲣⲟⲓ ⲉⲛϥϣⲟⲟⲡ ⲁⲛ ⲣⲱ

20:3  ⲇⲁⲩⲉⲓⲇ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲓⲱⲛⲁⲑⲁⲛ ϫⲉ ⲡⲉⲕⲉⲓⲱⲧ ⲥⲟⲟⲩⲛ ϫⲉ ⲁⲓϭⲉⲛⲭⲁⲣⲓⲥ ⲛⲁϩⲣⲁⲕ ⲁⲩⲱ ⲁⲡⲉⲕⲉⲓⲱⲧ ϫⲟⲟⲥ ϫⲉ ⲙⲡⲣⲧⲣⲉⲓⲱⲛⲁⲑⲁⲛ ⲉⲓⲙⲉ ⲉⲡⲉⲓϣⲁϫⲉ ϫⲉ ⲛⲛⲉϥⲧⲁⲙⲉⲇⲁⲩⲉⲓⲇ ⲉⲣⲟϥ ⲁⲗⲗⲁ ⲡϫⲟⲉⲓⲥ ⲟⲛϩ ⲁⲩⲱ ⲧⲉⲕⲯⲩⲭⲏ ⲟⲛϩ ϫⲉ ⲕⲁⲧⲁ ⲑⲉ ⲛⲧⲁⲓϫⲟⲟⲥ ⲁⲧⲉϥⲕⲁⲕⲓⲁ ϫⲱⲕ ⲉⲃⲟⲗ ϩⲛ ⲧⲁⲙⲏⲧⲉ ⲁⲩⲱ ϩⲛ ⲧⲙⲏⲧⲉ ⲙⲡⲙⲟⲩ

20:4  ⲡⲉϫⲉⲓⲱⲛⲁⲑⲁⲛ ⲛⲇⲁⲩⲉⲓⲇ ϫⲉ ⲟⲩ ⲡⲉⲧⲉⲣⲉⲧⲉⲕⲯⲩⲭⲏ ⲟⲩⲁϣϥ ⲛⲧⲁⲁⲁϥ ⲛⲙⲙⲁⲕ

20:5  ⲡⲉϫⲉⲇⲁⲩⲉⲓⲇ ⲛⲓⲱⲛⲁⲑⲁⲛ ϫⲉ ⲉⲓⲥ ⲥⲟⲩⲁ ⲣⲁⲥⲧⲉ ⲁⲩⲱ ⲁⲛⲟⲕ ⲛϯⲛⲁⲧⲱϣ ⲁⲛ ⲉϩⲙⲟⲟⲥ ⲉϩⲣⲁⲓ ⲉⲟⲩⲱⲙ ⲙⲛ ⲡⲣⲣⲟ ⲉⲕⲉϫⲟⲟⲩⲧ ⲉⲃⲟⲗ ⲛⲧⲁϩⲟⲡⲧ ϣⲁ ⲡⲛⲁⲩ ⲙⲡⲉⲕⲃⲁ ϩⲛ ⲧⲥⲱϣⲉ

20:6  ⲁⲩⲱ ϩⲛ ⲟⲩϣⲓⲛⲉ ⲉⲣϣⲁⲛⲡⲉⲕⲉⲓⲱⲧ ϣⲓⲛⲉ ⲛⲥⲱⲓ ⲉⲕⲉϫⲟⲟⲥ ⲛⲁϥ ϫⲉ ϩⲛ ⲟⲩⲟⲩⲱϣ ⲁϥⲁⲝⲓⲟⲩ ⲙⲙⲟⲓ ⲉⲕⲁⲁϥ ⲉⲃⲱⲕ ϣⲁ ⲃⲏⲑⲗⲉⲉⲙ ⲧⲉϥⲡⲟⲗⲓⲥ ϫⲉ ⲟⲩⲑⲩⲥⲓⲁ ⲕⲁⲧⲁ ⲡⲧⲱϣ ⲛⲛϩⲟⲟⲩ ⲧⲉⲧⲛⲁϣⲱⲡⲉ ⲙⲙⲁⲩ ⲛⲧⲉⲫⲩⲗⲏ ⲧⲏⲣⲥ

20:7  ⲉϥϣⲁⲛϫⲟⲟⲥ ⲇⲉ ϫⲉ ⲕⲁⲗⲱⲥ ⲙⲁⲣⲉϥⲃⲱⲕ ⲉⲓⲉ ⲟⲩⲛⲟⲩⲉⲓⲣⲏⲛⲏ ϣⲟⲟⲡ ⲙⲡⲉⲕϩⲙϩⲁⲗ ⲉϥⲛⲁϣⲁϫⲉ ⲇⲉ ⲉϥⲛⲁϣⲧ ⲉϩⲟⲩⲛ ⲉϩⲣⲁⲕ ⲉⲓⲉ ⲉⲓⲙⲉ ϫⲉ ⲁⲧⲕⲁⲕⲓⲁ ϫⲱⲕ ⲉⲃⲟⲗ ⲛⲧⲟⲟⲧϥ

20:8  ⲛⲅⲉⲓⲣⲉ ⲛⲧⲟⲕ ⲙⲛ ⲡⲉⲕϩⲙϩⲁⲗ ⲛⲟⲩⲛⲁ ϫⲉ ⲛⲧⲁⲕⲉⲓⲛⲉ ⲉϩⲟⲩⲛ ⲙⲡⲉⲕϩⲙϩⲁⲗ ⲛⲙⲙⲁⲕ ⲉⲩⲇⲓⲁⲑⲏⲕⲏ ⲛⲧⲉ ⲡϫⲟⲉⲓⲥ ⲁⲩⲱ ⲉϣϫⲉ ⲟⲩⲛϫⲓⲛϭⲟⲛⲥ ϫⲓ ⲉϩⲟⲩⲛ ⲉⲡⲉⲕϩⲙϩⲁⲗ ⲙⲟⲩⲟⲩⲧ ⲙⲙⲟⲓ ⲛⲧⲟⲕ ⲁⲩⲱ ⲉⲧⲃⲉ ⲟⲩ ⲕⲛⲁϫⲓⲧ ⲛⲧⲉⲓϩⲉ ⲉⲣⲁⲧϥ ⲙⲡⲉⲕⲉⲓⲱⲧ

20:9  ⲡⲉϫⲉⲓⲱⲛⲁⲑⲁⲛ ⲛⲁϥ ϫⲉ ⲛⲛⲉⲡⲁⲓ ϣⲱⲡⲉ ⲙⲙⲟⲓ ϫⲉ ϩⲛ ⲟⲩⲉⲓⲙⲉ ⲉⲓϣⲁⲛⲉⲓⲙⲉ ϫⲉ ⲁⲡϫⲓⲛϭⲟⲛⲥ ϫⲱⲕ ⲉⲃⲟⲗ ⲛⲧⲟⲟⲧϥ ⲙⲡⲁⲉⲓⲱⲧ ⲉⲧⲣⲉϥⲉⲓ ⲉϩⲣⲁⲓ ⲉϫⲱⲕ ⲉⲛϥϣⲟⲟⲡ ⲁⲛ ϩⲛ ⲛⲉⲕⲡⲟⲗⲓⲥ ⲁⲛⲟⲕ ϯⲛⲁⲧⲁⲙⲟⲕ ⲉⲡⲁⲓ

20:10  ⲡⲉϫⲉⲇⲁⲩⲉⲓⲇ ⲛⲓⲱⲛⲁⲑⲁⲛ ϫⲉ ⲛⲓⲙ ⲡⲉⲧⲛⲁⲧⲁⲙⲟⲓ ⲉⲡⲁⲓ ⲉⲣϣⲁⲛⲡⲉⲕⲉⲓⲱⲧ ⲧⲁⲩⲉϣⲁϫⲉ ⲛⲁⲕ ⲉϥⲛⲁϣⲧ

20:11  ⲡⲉϫⲉⲓⲱⲛⲁⲑⲁⲛ ⲛ ϫⲉ ⲙⲟⲟϣⲉ ⲙⲁⲣⲟⲛ ⲉⲃⲟⲗ ⲉⲧⲥⲱϣⲉ ⲁⲩⲱ ⲛⲧⲟⲟⲩ ⲙⲡⲉⲥⲛⲁⲩ ⲁⲩⲃⲱⲕ ⲉⲃⲟⲗ ⲉⲧⲥⲱϣⲉ

20:12  ⲡⲉϫⲉⲓⲱⲛⲁⲑⲁⲛ ⲛⲇⲁⲩⲉⲓⲇ ϫⲉ ⲡϫⲟⲉⲓⲥ ⲡⲛⲟⲩⲧⲉ ⲙⲡ ⲥⲟⲟⲩⲛ ϫⲉ ⲇⲓⲁⲛⲁⲕⲣⲓⲛⲉ ⲏ ϯⲛⲁⲧⲱⲕ ⲉϩⲟⲩⲛ ⲉⲡⲁⲉⲓⲱⲧ ⲉⲣϣⲁⲛⲡⲉⲩⲟⲉⲓϣ ϣⲱⲡⲉ ⲛⲁⲁ ϣⲟⲙⲛⲧ ⲛⲥⲟⲡ ⲁⲩⲱ ⲉϣⲱⲡⲉ ⲁⲩϣⲁϫⲉ ⲛⲁⲅⲁⲑⲟⲛ ϣⲱⲡⲉ ⲉⲧⲃⲉ ⲇⲁⲩⲉⲓⲇ ϯⲛⲁⲧⲛⲛⲟⲟⲩ ⲙⲡⲟⲩⲱ ⲛⲁⲕ ⲉⲃⲟⲗ ⲉⲧⲥⲱϣⲉ

20:13  ⲛⲁⲓ ⲇⲉ ⲟⲛ ⲉⲣⲉⲡⲛⲟⲩⲧⲉ ⲁⲁⲩ ⲛⲓⲱⲛⲁⲑⲁⲛ ⲁⲩⲱ ⲛⲉⲓⲕⲟⲟⲩⲉ ⲉϥⲉⲟⲩⲁϩⲟⲩ ⲉⲣⲟⲓ ϫⲉ ⲙⲡⲉⲑⲟⲟⲩ ϯⲛⲁⲧⲁⲙⲟⲕ ⲉⲣⲟⲟⲩ ⲛⲧⲁϭⲟⲗⲡⲟⲩ ⲉⲡⲉⲕⲙⲁⲁϫⲉ ⲛⲧⲁϫⲟⲟⲩⲕ ⲉⲃⲟⲗ ⲛⲅⲃⲱⲕ ϩⲛ ⲟⲩⲉⲓⲣⲏⲛⲏ ⲛⲧⲉⲛϫⲟⲉⲓⲥ ϣⲱⲡⲉ ⲛⲙⲙⲁⲕ ⲕⲁⲧⲁ ⲑⲉ ⲉⲛⲉϥϣⲟⲟⲡ ⲙⲛ ⲡⲁⲉⲓⲱⲧ

20:14  ⲁⲩⲱ ⲉⲧⲓ ⲁⲛⲟⲕ ⲉⲓⲟⲛϩ ⲉⲕⲉⲉⲓⲣⲉ ⲛⲙⲙⲁⲓ ⲛⲟⲩⲛⲁ ϩⲛ ⲟⲩⲙⲟⲩ ⲇⲉ ⲟⲛ ⲉⲓϣⲁⲛⲙⲟⲩ

20:15  ⲛⲛⲉⲕϥⲓ ⲙⲡⲉⲕⲛⲁ ⲉⲃⲟⲗ ϩⲙ ⲡⲁⲏⲓ ⲛϣⲁ ⲉⲛⲉϩ ⲁⲩⲱ ⲉⲣϣⲁⲛⲡϫⲟⲉⲓⲥ ϥⲓ ⲙⲙⲁⲩ ⲛⲛⲉϫⲁϫⲉ ⲛⲇⲁⲩⲉⲓⲇ ⲡⲟⲩⲁ ⲡⲟⲩⲁ ⲉⲃⲟⲗ ϩⲓϫⲙ ⲡϩⲟ ⲙⲡⲕⲁϩ

20:16  ⲛⲛⲉⲩϥⲓ ⲙⲙⲁⲩ ⲙⲡⲣⲁⲛ ⲛⲓⲱⲛⲁⲑⲁⲛ ⲉⲃⲟⲗ ϩⲙ ⲡⲏⲓ ⲛⲇⲁⲩⲉⲓⲇ ⲁⲩⲱ ⲉⲣⲉⲡϫⲟⲉⲓⲥ ⲕⲱⲧⲉ ⲛⲧⲟⲟⲧϥ ⲛ ⲛⲥⲁ ⲛⲉϥϫⲁϫⲉ

20:17  ⲓⲱⲛⲁⲑⲁⲛ ⲇⲉ ⲟⲛ ⲁϥⲟⲩⲱϩ ⲉⲧⲟⲟⲧϥ ⲉⲱⲣⲕ ⲛⲇⲁⲩⲉⲓⲇ ⲉⲃⲟⲗ ϫⲉ ϥⲙⲉ ⲙⲙⲟϥ ⲁⲩⲱ ⲁϥⲙⲉⲣⲉⲧⲉⲯⲩⲭⲏ ⲙⲡⲉⲧⲙⲉ ⲙⲙⲟϥ

20:18  ⲉⲣⲉⲓⲱⲛⲁⲑⲁⲛ ϫⲱ ⲙⲙⲟⲥ ⲛⲁϥ ϫⲉ ⲣⲁⲥⲧⲉ ⲡⲉ ⲥⲟⲩⲁ ⲙⲡⲉⲃⲟⲧ ⲁⲩⲱ ⲥⲉⲛⲁϣⲓⲛⲉ ϫⲉ ⲥⲉⲛⲁϯϩⲧⲏⲩ ⲉⲧⲉⲕⲕⲁⲑⲉⲇⲣⲁ

20:19  ⲉⲧⲣⲉⲕⲣⲙⲉϩϣⲟⲙⲛⲧ ⲉⲕϩⲙⲟⲟⲥ ⲉϩⲣⲁⲓ ⲉⲕⲉⲉⲓ ⲉϩⲣⲁⲓ ⲉⲡⲉⲕⲙⲁ ⲡⲉⲛⲧⲁⲕϩⲟⲡⲕ ⲛϩⲏⲧϥ ϩⲙ ⲡⲉϩⲟⲟⲩ ⲛⲧⲉⲣⲅⲁⲥⲓⲁ ⲛⲅϩⲙⲟⲟⲥ ⲉϩⲣⲁⲓ ϩⲁⲧⲙ ⲡⲉⲣⲅⲁⲃ ⲉⲧⲙⲙⲁⲩ

20:20  ⲁⲛⲟⲕ ϯⲛⲁⲟⲩⲁϩⲙⲉⲧ ⲛϣⲟⲙⲛⲧ ⲛⲥⲟⲡ ⲉⲓⲛⲟⲩϫⲉ ⲉⲃⲟⲗ ⲛⲛⲉⲥⲟⲧⲉ ⲉⲓⲛⲟⲩϫⲉ ⲙⲙⲟⲟⲩ ⲉⲁⲙⲁⲧⲧⲁⲣⲓ

20:21  ⲁⲩⲱ ⲉⲓⲥ ϩⲏⲏⲧⲉ ⲡⲁϩⲙϩⲁⲗ ϯⲛⲁⲟⲩⲁⲧⲃⲉϥ ⲉⲃⲟⲗ ⲉⲓϫⲱ ⲙⲙⲟⲥ ϫⲉ ⲁⲙⲟⲩ ⲛⲅⲛⲁⲩ ⲉⲛⲁⲓ ⲉⲛⲥⲟⲧⲉ ⲁⲩⲱ ⲉⲓϣⲁⲛϣⲁϫⲉ ⲙⲛ ⲡϣⲏⲣⲉ ϣⲏⲙ ⲉⲓϫⲱ ⲙⲙⲟⲥ ϫⲉ ⲉⲣⲉⲡⲥⲟⲧⲉ ϩⲓ ⲡⲓⲥⲁ ⲙⲙⲟⲕ ⲁⲩⲱ ⲡⲉⲓⲕⲉⲥⲁ ϫⲓⲧⲥ ⲛⲅⲉⲓ ⲉⲓⲉ ⲧⲱⲟⲩⲛ ⲛⲅⲉⲓ ϫⲉ ϯⲣⲏⲛⲏ ϣⲟⲟⲡ ⲛⲁⲕ ⲁⲩⲱ ⲙⲛ ϣⲁϫⲉ ϣⲟⲟⲡ ⲉϥϩⲟⲟⲩ ⲉⲧⲃⲏⲏⲧⲕ ⲉⲓⲥ ⲡϫⲟⲉⲓⲥ ⲟⲛϩ

20:22  ⲛⲉⲓϣⲁϫⲉ ⲇⲉ ⲉⲓϣⲁⲛϫⲟⲟⲩ ⲙⲡϩⲙϩⲁⲗ ϫⲉ ⲉⲣⲉⲡⲥⲟⲧⲉ ϩⲓ ⲡⲓⲥⲁ ⲙⲙⲟⲕ ⲁⲩⲱ ⲥⲟⲩⲏⲩ ⲙⲙⲟⲕ ⲉⲓⲉ ⲧⲱⲟⲩⲛ ⲛⲅⲃⲱⲕ ϫⲉ ⲁⲡϫⲟⲉⲓⲥ ϫⲟⲟⲩⲕ ⲉⲃⲱⲕ

20:23  ⲁⲩⲱ ⲉⲧⲃⲉ ⲡϣⲁϫⲉ ⲛⲧⲁⲛϫⲟⲟϥ ⲁⲛⲟⲕ ⲛⲙⲙⲁⲕ ⲉⲓⲥ ⲡϫⲟⲉⲓⲥ ⲟ ⲙⲙⲛⲧⲣⲉ ϩⲛ ⲧⲁⲙⲏⲧⲉ ⲙⲛ ⲧⲉⲕⲙⲏⲧⲉ ⲛϣⲁ ⲉⲛⲉϩ

20:24  ⲇⲉ ⲁϥϩⲟⲡϥ ϩⲛ ⲧⲥⲱϣⲉ ϩⲏ ⲇⲉ ⲙⲡⲉⲃⲟⲧ ⲛⲧⲉⲣⲉϥϣⲱⲡⲉ ⲡⲣⲣⲟ ⲁϥⲃⲱⲕ ⲉϩⲟⲩⲛ ⲉϫⲛ ⲧⲉⲧⲣⲁⲡⲉⲍⲁ ⲉⲟⲩⲱⲙ

20:25  ⲁⲩⲱ ⲡⲣⲣⲟ ⲁϥϩⲙⲟⲟⲥ ϩⲓϫⲛ ⲧⲉϥⲕⲁⲑⲉⲇⲣⲁ ⲛⲑⲉ ⲛϣⲁϥⲁⲁⲥ ⲇⲉ ⲙⲡⲥⲟⲡ ⲉϣⲁϥϩⲙⲟⲟⲥ ϩⲓϫⲛ ⲧⲕⲁⲑⲉⲇⲣⲁ ϩⲁⲧⲉ ⲧϫⲟ ⲁⲩⲱ ⲓⲱⲛⲁⲑⲁⲛ ⲁϥϩⲙⲟⲟⲥ ϩⲓϩⲏ ⲙⲙⲟϥ ⲛⲥⲁ ⲟⲩⲛⲁⲙ ⲁⲃⲉⲛⲛⲏⲣ ϩⲱⲱϥ ⲁϥϩⲙⲟⲟⲥ ⲛⲥⲁ ϩⲃⲟⲩⲣ ⲙⲡⲣⲣⲟ ⲡⲙⲁ ⲛⲉϩⲙⲟⲟⲥ ⲇⲉ ⲛ ⲁϥϯϩⲧⲏϥ ⲉⲣⲟϥ

20:26  ⲁⲩⲱ ⲙⲡⲉⲥⲁⲟⲩⲗ ϫⲉ ⲗⲁⲁⲩ ⲛϣⲁϫⲉ ϩⲙ ⲡⲉϩⲟⲟⲩ ⲉⲧⲙⲙⲁⲩ ϫⲉ ⲛⲧⲁϥϫⲟⲟⲥ ϫⲉ ⲙⲉϣⲁⲕ ⲟⲩⲧⲱϣ ⲛϫⲱϩⲙ ⲡⲉ ⲛⲧⲁϥϣⲱⲡⲉ ⲙⲙⲟϥ ⲉⲧⲓ ⲉϥϣⲟⲟⲡ ϩⲙ ⲡϫⲱϩⲙ ⲙⲡⲁⲧⲉϥⲉⲓⲁⲁϥ ⲉⲃⲟⲗ

20:27  ⲁⲥϣⲱⲡⲉ ⲇⲉ ⲙⲡⲉϥⲣⲁⲥⲧⲉ ⲙⲡⲙⲉϩϩⲟⲟⲩ ⲥⲛⲁⲩ ⲙⲡⲉⲃⲟⲧ ⲁⲩϯϩⲧⲏⲩ ⲉⲡⲙⲁ ⲛ ⲡⲉϫⲉⲥⲁⲟⲩⲗ ⲛⲓⲱⲛⲁⲑⲁⲛ ⲡⲉϥϣⲏⲣⲉ ϫⲉ ⲉⲧⲃⲉ ⲟⲩ ⲣⲱ ⲙⲡⲉⲡϣⲏⲣⲉ ⲛⲓⲉⲥⲥⲁⲓ ⲉⲓ ⲛⲥⲁϥ ⲙⲛ ⲡⲟⲟⲩ ⲉϩⲙⲟⲟⲥ ⲉⲧⲉⲧⲣⲁⲡⲉⲍⲁ ⲉⲟⲩⲱⲙ

20:28  ⲓⲱⲛⲁⲑⲁⲛ ⲇⲉ ⲁϥⲣⲟⲩⲱ ⲛⲥⲁⲟⲩⲗ ⲉϥϫⲱ ⲙⲙⲟⲥ ϫⲉ ⲇⲁⲩⲉⲓⲇ ⲁϥⲁⲝⲓⲟⲩ ⲙⲙⲟⲓ ⲉⲧⲣⲉϥⲃⲱⲕ ⲉϩⲣⲁⲓ ϣⲁ ⲃⲏⲑⲗⲉⲉⲙ ⲧⲉϥⲡⲟⲗⲓⲥ

20:29  ⲉϥϫⲱ ⲙⲙⲟⲥ ⲛⲁⲓ ϫⲉ ⲕⲁⲁⲧ ⲛⲧⲁⲃⲱⲕ ⲙⲡⲟⲟⲩ ϫⲉ ⲟⲩⲑⲩⲥⲓⲁ ⲧⲉⲧⲛⲁϣⲱⲡⲉ ⲛⲧⲉⲫⲩⲗⲏ ϩⲛ ⲧⲡⲟⲗⲓⲥ ⲁⲩⲱ ⲛⲁⲥⲛⲏⲩ ϩⲱⲛ ⲉⲧⲟⲟⲧ ⲉⲧⲃⲉ ⲡⲁⲓ ⲧⲉⲛⲟⲩ ϭⲉ ⲉϣⲱⲡⲉ ⲁⲓϭⲉⲛⲭⲁⲣⲓⲥ ⲛⲁϩⲣⲁⲕ ⲉⲓⲉ ϯⲛⲁⲧⲱϣ ⲉⲃⲱⲕ ⲛⲧⲁⲛⲁⲩ ⲉⲛⲁⲥⲛⲏⲩ ⲉⲧⲃⲉ ⲡⲁⲓ ⲙⲡⲉϥϩⲙⲟⲟⲥ ⲉⲧⲉⲧⲣⲁⲡⲉⲍⲁ ⲙⲡⲣⲣⲟ

20:30  ⲁⲩⲱ ⲥⲁⲟⲩⲗ ⲁϥϭⲱⲛⲧ ⲉⲙⲁⲧⲉ ϩⲛ ⲟⲩⲟⲣⲅⲏ ⲉⲓⲱⲛⲁⲑⲁⲛ ⲡⲉϫⲁϥ ⲉϩⲟⲩⲛ ⲉϩⲣⲁϥ ϫⲉ ⲡϣⲏⲣⲉ ⲛⲛⲉϩⲓⲟⲙⲉ ⲉⲧⲛⲏϫ ⲉⲃⲟⲗ ⲙⲏ ⲛϯⲥⲟⲟⲩⲛ ⲅⲁⲣ ⲁⲛ ϫⲉ ⲛⲧⲟⲕ ⲕⲟ ⲛϣⲃⲏⲣ ⲉⲡϣⲏⲣⲉ ⲛⲓⲉⲥⲥⲁⲓ ⲉⲩϣⲓⲡⲉ ⲛⲁⲕ ⲁⲩⲱ ⲉⲩϣⲓⲡⲉ ⲙⲡϭⲱⲗⲡ ⲉⲃⲟⲗ ⲛⲧⲉⲕⲙⲁⲁⲩ

20:31  ϫⲉ ⲛⲉϩⲟⲟⲩ ⲧⲏⲣⲟⲩ ⲉⲣⲉⲡϣⲏⲣⲉ ⲛⲓⲉⲥⲥⲁⲓ ⲛⲁⲁⲁⲩ ⲉϥⲟⲛϩ ⲛϩⲏⲧⲟⲩ ϩⲓϫⲙ ⲡⲕⲁϩ ⲛⲅⲛⲁⲥⲁⲁϩⲉ ⲁⲛ ⲛⲧⲟⲕ ⲙⲛ ⲧⲉⲕⲙⲛⲧⲣⲣⲟ ⲧⲉⲛⲟⲩ ϭⲉ ϫⲟⲟⲩ ⲉⲧⲣⲉⲩⲉⲛⲡϣⲏⲣⲉ ϣⲏⲙ ϫⲉ ⲡⲁⲓ ⲟⲩϣⲏⲣⲉ ⲡⲉ ⲉϥⲙⲡϣⲁ ⲙⲡⲙⲟⲩ

20:32  ⲁⲩⲱ ⲓⲱⲛⲁⲑⲁⲛ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲙⲡⲉϥⲉⲓⲱⲧ ϫⲉ ⲉⲧⲃⲉ ⲟⲩ ⲉϥⲛⲁⲙⲟⲩ ⲟⲩ ⲡⲉ ⲡⲛⲟⲃⲉ ⲛⲧⲁϥⲁⲁϥ

20:33  ⲁⲩⲱ ⲥⲁⲟⲩⲗ ⲁϥϥⲓ ⲉϩⲣⲁⲓ ⲛⲧⲉϥⲗⲟⲅⲭⲏ ⲉⲛⲟϫⲥ ⲛⲥⲁ ⲓⲱⲛⲁⲑⲁⲛ ⲉⲙⲟⲟⲩⲧϥ ⲓⲱⲛⲁⲑⲁⲛ ⲇⲉ ⲁϥⲉⲓⲙⲉ ϫⲉ ⲁⲧⲕⲁⲕⲓⲁ ϫⲱⲕ ⲉⲃⲟⲗ ⲛⲧⲟⲟⲧϥ ⲙⲡⲉϥⲉⲓⲱⲧ ⲉⲧⲣⲉϥⲙⲟⲩⲟⲩⲧ ⲛⲇⲁⲩⲉⲓⲇ

20:34  ⲓⲱⲛⲁⲑⲁⲛ ⲇⲉ ⲁϥⲁⲛⲅϥ ⲉϩⲣⲁⲓ ϩⲓϫⲛ ⲧⲉⲧⲣⲁⲡⲉⲍⲁ ϩⲛ ⲧⲟⲣⲅⲏ ⲙⲡⲉϥϭⲱⲛⲧ ⲉⲙⲡⲉϥϩⲙⲟⲟⲥ ⲉϩⲣⲁⲓ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲉⲧⲉⲡⲉⲥⲛⲁⲩ ⲡⲉ ⲙⲡⲉⲃⲟⲧ ⲉⲟⲩⲉⲙⲟⲉⲓⲕ ⲙⲛ ⲡⲉϥⲉⲓⲱⲧ ⲉⲃⲟⲗ ϫⲉ ⲁϥⲟⲩⲱⲗⲥ ⲛϩⲏⲧ ⲉϫⲛ ⲇⲁⲩⲉⲓⲇ ϫⲉ ⲁⲧⲕⲁⲕⲓⲁ ⲙⲡⲉϥⲉⲓⲱⲧ ϫⲱⲕ ⲉⲃⲟⲗ ⲉϫⲱϥ

20:35  ⲁⲥϣⲱⲡⲉ ⲇⲉ ⲉϩⲧⲟⲟⲩⲉ ⲙⲡⲉϥⲣⲁⲥⲧⲉ ⲓⲱⲛⲁⲑⲁⲛ ⲁϥⲃⲱⲕ ⲉⲃⲟⲗ ⲉⲧⲥⲱϣⲉ ⲕⲁⲧⲁ ⲡⲧⲁⲥⲥⲉ ⲛⲧⲁϥⲧⲁⲁϥ ⲛⲇⲁⲩⲉⲓⲇ ϩⲛ ⲟⲩⲙⲛⲧⲙⲛⲧⲣⲉ ⲉⲣⲉⲟⲩϩⲙϩⲁⲗ ⲕⲟⲩⲓ ⲛⲙⲙⲁϥ

20:36  ⲡⲉϫⲉⲓⲱⲛⲁⲑⲁⲛ ⲙⲡϩⲙϩⲁⲗ ϫⲉ ⲃⲟϭⲕ ⲛⲅⲛⲁⲩ ⲛⲁⲓ ⲉⲛⲥⲟⲧⲉ ⲛⲧⲁⲓⲛⲟⲩϫⲉ ⲉⲃⲟⲗ ⲛϩⲏⲧⲟⲩ ⲡϩⲙϩⲁⲗ ⲇⲉ ⲁϥⲡⲱⲧ ⲓⲱⲛⲁⲑⲁⲛ ⲇⲉ ⲛⲉϥⲛⲉϫⲥⲟⲧⲉ ⲉⲁϥⲡⲁⲣⲁⲗⲁⲥⲥⲉ ⲙⲙⲟⲥ

20:37  ⲁⲩⲱ ⲡϩⲙϩⲁⲗ ⲁϥⲓ ⲉϩⲣⲁⲓ ⲉϫⲙ ⲡⲙⲁ ⲉⲧⲉⲣⲉⲡⲥⲟⲧⲉ ⲛϩⲏⲧϥ ⲡⲙⲁ ⲛⲧⲁⲓⲱⲛⲁⲑⲁⲛ ⲛⲟϫⲥ ⲉⲣⲟϥ ⲁⲩⲱ ⲓⲱⲛⲁⲑⲁⲛ ⲁϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉ ⲉⲣⲉⲡⲥⲟⲧⲉ ϩⲓ ⲡⲓⲥⲁ ⲙⲙⲟⲕ ⲁⲩⲱ ⲥⲟⲩⲏⲩ ⲟⲛ ⲙⲙⲟⲕ

20:38  ⲓⲱⲛⲁⲑⲁⲛ ⲇⲉ ⲟⲛ ⲁϥⲱϣ ⲉⲃⲟⲗ ⲟⲩⲃⲉ ⲡⲉϥϩⲙϩⲁⲗ ⲉϥⲱϣ ⲉⲃⲟⲗ ⲉϥϫⲱ ⲙⲙⲟⲥ ⲛⲁϥ ϫⲉ ⲧⲁϫⲏ ⲁⲛⲓⲥⲟⲩ ⲁⲩⲱ ⲛⲅⲧⲉⲙⲁϩⲉⲣⲁⲧⲕ ⲛⲗⲁⲁⲩ ⲁⲩⲱ ⲡϩⲙϩⲁⲗ ⲛⲓⲓⲱⲛⲁⲑⲁⲛ ⲁϥⲕⲉⲧϥ ⲛⲥⲟⲧⲉ ⲁϥⲉⲛⲧⲟⲩ ⲉⲣⲁⲧϥ ⲙⲡⲉϥϫⲟⲉⲓⲥ

20:39  ⲡϩⲙϩⲁⲗ ⲇⲉ ⲛⲉϥⲥⲟⲟⲩⲛ ⲁⲛ ⲛⲗⲁⲁⲩ ⲛϩⲱⲃ ⲛⲥⲁ ⲓⲱⲛⲁⲑⲁⲛ ⲙⲛ ⲇⲁⲩⲉⲓⲇ ⲛⲧⲟⲟⲩ ⲉⲧⲥⲟⲟⲩⲛ ⲙⲡⲉⲩϣⲁϫⲉ

20:40  ⲓⲱⲛⲁⲑⲁⲛ ⲇⲉ ⲁϥⲧⲁⲗⲉⲛⲉϥϩⲛⲁⲁⲩ ⲉϫⲙ ⲡⲉϥϩⲙϩⲁⲗ ⲡⲉϫⲁϥ ⲛⲁϥ ϫⲉ ⲙⲟⲟϣⲉ ⲛⲅⲃⲱⲕ ⲉϩⲟⲩⲛ ⲉⲧⲡⲟⲗⲓⲥ

20:41  ⲡϩⲙϩⲁⲗ ⲇⲉ ⲛⲧⲉⲣⲉϥⲣⲡϩⲟⲩⲛ ⲛⲧⲡⲟⲗⲓⲥ ⲇⲁⲩⲉⲓⲇ ⲁϥⲧⲱⲟⲩⲛ ⲁϥⲉⲓ ⲉⲃⲟⲗ ϩⲙ ⲡⲙⲁ ⲉⲛⲉϥⲉⲛϩⲏⲧϥ ⲁϥⲡⲁϩⲧϥ ϩⲓϫⲙ ⲡⲉϥϩⲟ ⲁϥⲟⲩⲱϣⲧ ⲛⲁϥ ⲛϣⲟⲙⲛⲧ ⲛⲥⲟⲡ ⲁⲩⲱ ⲁⲩϯⲡⲉⲓ ⲉⲣⲉⲛⲛⲉⲩⲉⲣⲏⲩ ⲁⲩⲣⲓⲙⲉ ⲟⲛ ⲉϩⲟⲩⲛ ⲉⲛⲉⲩⲉⲣⲏⲩ ϣⲁ ⲟⲩⲛⲟϭ ⲛⲕⲁⲩ

20:42  ⲡⲉϫⲉⲓⲱⲛⲁⲑⲁⲛ ⲛⲇⲁⲩⲉⲓⲇ ϫⲉ ⲃⲱⲕ ϩⲛ ⲟⲩⲉⲓⲣⲏⲛⲏ ⲁⲩⲱ ⲕⲁⲧⲁ ⲑⲉ ⲛⲧⲁⲛⲱⲣⲕ ⲛⲛⲉⲛⲉⲣⲏⲩ ϩⲙ ⲡⲣⲁⲛ ⲙⲡϫⲟⲉⲓⲥ ⲉⲛϫⲱ ⲙⲙⲟⲥ ϫⲉ ⲡϫⲟⲉⲓⲥ ⲉϥⲉϣⲱⲡⲉ ⲙⲙⲛⲧⲣⲉ ϩⲛ ⲧⲁⲙⲏⲧⲉ ⲛⲙⲙⲁⲕ ⲁⲩⲱ ϩⲛ ⲧⲙⲏⲧⲉ ⲙⲡⲉⲕⲥⲡⲉⲣⲙⲁ ⲁⲩⲱ ϩⲛ ⲧⲙⲏⲧⲉ ⲙⲡⲁⲥⲡⲉⲣⲙⲁ ⲛϣⲁ ⲉⲛⲉϩ ⲉϥⲉϣⲱⲡⲉ ⲟⲛ ⲉϥⲟ ⲙⲙⲛⲧⲣⲉ