CopSahBible2 - I Samuel - 22

22:1  ⲇⲁⲩⲉⲓⲇ ⲇⲉ ⲁϥⲙⲟⲟϣⲉ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲁϥⲛⲟⲩϩⲙ ⲁⲩⲱ ⲁϥⲓ ⲉϩⲣⲁⲓ ⲉⲡⲉⲙϩⲁⲁⲩ ⲛⲟⲇⲟⲗⲗⲁⲙ ⲛⲉϥⲥⲛⲏⲩ ⲇⲉ ⲁⲩⲥⲱⲧⲙ ⲙⲛ ⲛⲁⲡⲏⲓ ⲙⲡⲉϥⲉⲓⲱⲧ ⲁⲩⲱ ⲁⲩⲉⲓ ⲉⲣⲁⲧϥ ⲙⲡⲙⲁ ⲉⲧⲙⲙⲁⲩ

22:2  ⲁⲩⲥⲱⲟⲩϩ ⲉϩⲟⲩⲛ ⲉⲣⲟϥ ϩⲙ ⲡⲙⲁ ⲉⲧⲙⲙⲁⲩ ⲛϭⲓ ⲟⲩⲟⲛ ⲛⲓⲙ ⲉⲧϣⲟⲟⲡ ϩⲛ ϩⲉⲛϩⲱϣ ⲁⲩⲱ ⲟⲩⲟⲛ ⲛⲓⲙ ⲉϥϫⲱⲟⲩⲉ ⲁⲩⲱ ⲟⲩⲟⲛ ⲛⲓⲙ ⲉⲛϥⲙⲧⲟⲛ ⲛϩⲏⲧ ⲁⲛ ⲁⲩⲱ ⲉϥⲟ ⲛⲁⲡⲉ ⲉϩⲣⲁⲓ ⲉϫⲱⲟⲩ ⲁⲩϣⲱⲡⲉ ⲛⲙⲙⲁϥ ⲛϭⲓ ⲁϥⲧⲟⲟⲩ ⲛϣⲉ ⲛⲣⲱⲙⲉ

22:3  ⲇⲉ ⲁϥⲡⲱⲱⲛⲉ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲉϩⲣⲁⲓ ⲉⲙⲁⲥⲏⲫⲁ ϩⲙ ⲡⲕⲁϩ ⲙⲙⲱⲁⲃ ⲡⲉϫⲁϥ ⲙⲡⲣⲣⲟ ⲙⲙⲱⲁⲃ ϫⲉ ⲙⲁⲣⲉⲡⲁⲉⲓⲱⲧ ⲙⲛ ⲧⲁⲙⲁⲁⲩ ϭⲱ ϩⲁⲧⲏⲕ ϣⲁⲛϯⲛⲁⲩ ϫⲉ ⲉⲣⲉⲡⲛⲟⲩⲧⲉ ⲛⲁⲣⲟⲩ ⲛⲁⲓ

22:4  ⲁⲩⲱ ⲡϩⲟ ⲙⲡⲣⲣⲟ ⲙⲙⲱⲁⲃ ⲁϥⲥⲉⲡⲥⲱⲡϥ ⲁϥϭⲱ ϩⲁⲧⲏϥ ⲛⲛϩⲟⲟⲩ ⲧⲏⲣⲟⲩ ⲛⲧⲁⲇⲁⲩⲉⲓⲇ ⲁⲁⲩ ⲉϥⲡⲟϣⲥ

22:5  ⲁⲩⲱ ⲅⲁⲇ ⲡⲉⲡⲣⲟⲫⲏⲧⲏⲥ ⲡⲉϫⲁϥ ⲛⲇⲁⲩⲉⲓⲇ ϫⲉ ⲙⲡⲉⲣϩⲙⲟⲟⲥ ϩⲛ ⲧⲉⲓⲡⲉⲣⲓⲱⲭⲏ ⲧⲱⲟⲩⲛ ⲛⲅⲃⲱⲕ ⲉϩⲣⲁⲓ ⲉⲡⲕⲁϩ ⲛⲓⲟⲩⲇⲁ ⲇⲁⲩⲉⲓⲇ ⲇⲉ ⲁϥⲧⲱⲟⲩⲛ ⲁϥⲙⲟⲟϣⲉ ⲁϥⲓ ⲁϥⲟⲩⲱϩ ϩⲛ ⲟⲩⲡⲟⲗⲓⲥ ϫⲉ ⲥⲁⲣⲓⲭ

22:6  ⲥⲁⲟⲩⲗ ⲇⲉ ⲁϥⲥⲱⲧⲙ ϫⲉ ⲁⲩⲉⲓⲙⲉ ⲉⲇⲁⲩⲉⲓⲇ ⲙⲛ ⲛⲉⲕⲉⲣⲱⲙⲉ ⲉⲧⲛⲙⲙⲁϥ ⲁⲩⲱ ⲥⲁⲟⲩⲗ ⲛⲉϥϩⲙⲟⲟⲥ ϩⲙ ⲡⲃⲟⲩⲛⲟⲥ ϩⲁ ⲧⲥⲉϯⲱϩⲉ ⲉⲧϩⲛⲃⲁⲉⲙⲁ ⲉⲣⲉⲧⲉϥⲗⲟⲅⲭⲏ ϩⲛ ⲧⲉϥϭⲓϫ ⲁⲩⲱ ⲛⲉϥϩⲙϩⲁⲗ ⲧⲏⲣⲟⲩ ⲛⲉⲩⲁϩⲉⲣⲁⲧⲟⲩ ⲙⲡⲉϥⲉⲙⲧⲟ ⲉⲃⲟⲗ

22:7  ⲡⲉϫⲉⲥⲁⲟⲩⲗ ⲛⲛⲉϥϩⲙϩⲁⲗ ⲉⲧⲁϩⲉⲣⲁⲧⲟⲩ ⲙⲡⲉϥⲙⲧⲟ ⲉⲃⲟⲗ ϫⲉ ⲥⲱⲧⲙ ⲉⲛϣⲏⲣⲉ ⲛⲃⲉⲛⲓⲁⲙⲓⲛ ⲉⲛⲉⲛⲁⲙⲉ ϥⲛⲁϯ ⲛⲏⲧⲛ ⲧⲏⲣⲧⲛ ⲛϭⲓ ⲡϣⲏⲣⲉ ⲛⲓⲉⲥⲥⲁⲓ ⲛϩⲉⲛⲥⲱϣⲉ ⲙⲛ ϩⲉⲛⲙⲁ ⲛⲉⲗⲟⲟⲗⲉ ⲁⲩⲱ ⲛⲧⲱⲧⲛ ⲧⲏⲣⲧⲛ ⲉⲛⲉϥⲛⲁⲣⲧⲏⲩⲧⲛ ⲛⲭⲓⲗⲓⲁⲣⲭⲟⲥ ϩⲓ ϩⲩⲕⲁⲧⲟⲛⲧⲁⲣⲭⲟⲥ

22:8  ϫⲉ ⲛⲧⲱⲧⲛ ⲧⲏⲣⲧⲛ ⲧⲉⲧⲛⲟ ⲛⲕⲣⲟϥ ⲉⲣⲟⲓ ⲉⲙⲛⲗⲁⲁⲩ ⲙⲙⲱⲧⲛ ⲧⲁⲙⲟ ⲙⲙⲟⲓ ⲛⲧⲉⲣⲉⲡⲁϣⲏⲣⲉ ⲥⲙⲛⲇⲓⲁⲑⲏⲕⲏ ⲙⲛ ⲡϣⲏⲣⲉ ⲛⲓⲉⲥⲥⲁⲓ ⲙⲛⲗⲁⲁⲩ ⲛϩⲏⲧⲧⲏⲩⲧⲛ ϫⲏⲃ ⲛϩⲏⲧ ⲉϩⲣⲁⲓ ⲉϫⲱⲓ ⲉⲧⲣⲉϥⲧⲟⲩⲛⲓⲁⲧ ⲉⲃⲟⲗ ϫⲉ ⲁⲡⲁϣⲏⲣⲉ ⲧⲟⲩⲛⲉⲥⲡⲁϩⲙϩⲁⲗ ⲉϩⲣⲁⲓ ⲉϫⲱⲓ ⲉⲩϫⲁϫⲉ ⲛⲑⲉ ⲙⲡⲟⲟⲩ ⲛϩⲟⲟⲩ

22:9  ⲁⲩⲱ ⲁϥⲟⲩⲱϣⲃ ⲛϭⲓ ⲇⲱⲏⲕ ⲡⲓⲇⲟⲩⲙⲁⲓⲟⲥ ⲡⲉⲧϩⲓϫⲛⲛⲉⲙⲁⲥⲡⲟⲣⲕ ⲛⲥⲁⲟⲩⲗ ⲉϥϫⲱ ⲙⲙⲟⲥ ϫⲉ ⲁⲓⲛⲁⲩ ⲉⲡϣⲏⲣⲉ ⲛⲓⲉⲥⲥⲁⲓ ⲉⲁϥⲉⲓ ⲉϩⲣⲁⲓ ⲉⲛⲟⲙⲃⲁ ⲉⲣⲁⲧϥ ⲛⲁⲭⲓⲙⲉⲗⲉⲭ ⲡϣⲏⲣⲉ ⲛⲁⲭⲓⲇⲱⲃ ⲡⲟⲩⲏⲏⲃ

22:10  ⲁⲩⲱ ⲁϥϣⲓⲛⲉ ⲙⲡⲛⲟⲩⲧⲉ ⲉⲃⲟⲗ ϩⲓⲧⲟⲟⲧϥ ⲁⲩⲱ ⲁϥϯⲟⲉⲓⲕ ⲛⲁϥ ⲁⲩⲱ ⲧⲥⲏⲃⲉ ⲛⲅⲟⲗⲓⲁⲑ ⲡⲁⲗⲗⲟⲫⲩⲗⲟⲥ ⲁϥⲧⲁⲁⲥ ⲛⲁϥ

22:11  ⲡⲣⲣⲟ ⲇⲉ ⲁϥϫⲟⲟⲩ ⲁϥⲙⲟⲩⲧⲉ ⲉⲁⲭⲓⲙⲉⲗⲉⲭ ⲡϣⲏⲣⲉ ⲛⲁⲭⲓⲇⲱⲃ ⲁⲩⲱ ⲛϣⲏⲣⲉ ⲧⲏⲣⲟⲩ ⲙⲡⲉϥⲉⲓⲱⲧ ⲉⲧⲉⲛⲉⲟⲩⲏⲏⲃ ⲛⲉ ⲉⲧϩⲛⲛⲟⲙⲃⲁ ⲁⲩⲱ ⲁⲩⲉⲓ ⲧⲏⲣⲟⲩ ⲉⲣⲁⲧϥ ⲙⲡⲣⲣⲟ

22:12  ⲥⲁⲟⲩⲗ ⲇⲉ ⲡⲉϫⲁϥ ⲛⲁϥ ϫⲉ ⲥⲱⲧⲙ ⲉⲣⲟⲓ ⲡⲁϣⲏⲣⲉ ⲡϣⲏⲣⲉ ⲛⲁⲭⲓⲇⲱⲃ ⲡⲉϫⲁϥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ⲡϫⲟⲉⲓⲥ ϯⲥⲱⲧⲙ ⲉⲣⲟⲕ ϣⲁϫⲉ

22:13  ⲡⲉϫⲉⲥⲁⲟⲩⲗ ⲛⲁϥ ϫⲉ ⲉⲧⲃⲉ ⲟⲩ ⲛⲧⲟⲕ ⲁⲕϥⲓ ⲙⲛ ⲡϣⲏⲣⲉ ⲛⲓⲉⲥⲥⲁⲓ ⲉϯ ⲛⲙⲙⲁⲓ ⲉⲧⲣⲉⲕϯ ⲛⲁϥ ⲛⲟⲩⲟⲉⲓⲕ ⲙⲛ ⲟⲩⲥⲏϥⲉ ⲁⲩⲱ ⲉϣⲓⲛⲉ ⲙⲡⲛⲟⲩⲧⲉ ⲉⲃⲟⲗ ϩⲓⲧⲟⲟⲧⲕ ⲉⲧⲣⲉⲕⲧⲟⲩⲛⲟⲥϥ ⲛϫⲁϫⲉ ⲉϩⲣⲁⲓ ⲉϫⲱⲓ ⲛⲑⲉ ⲙⲡⲟⲟⲩ ⲛϩⲟⲟⲩ

22:14  ⲡⲟⲩⲏⲏⲃ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲙⲡⲣⲣⲟ ϫⲉ ⲛⲓⲙ ⲡⲉ ⲡⲕⲉⲟⲩⲁ ⲉⲧⲟ ⲛϩⲟⲧ ⲛⲑⲉ ⲛⲇⲁⲩⲉⲓⲇ ϩⲛ ⲛⲉⲕϩⲙϩⲁⲗ ⲧⲏⲣⲟⲩ ⲉⲁϥϫⲓ ⲛⲧϣⲉⲉⲣⲉ ⲙⲡⲣⲣⲟ ⲉϥⲟ ⲛⲁⲣⲭⲱⲛ ⲉϫⲙ ⲡⲉϥⲙⲏⲏϣⲉ ⲧⲏⲣϥ ⲁⲩⲱ ⲉϥⲱⲉⲓ ϩⲙ ⲡⲉⲕⲏⲓ ⲧⲏⲣϥ

22:15  ⲁⲩⲱ ⲉⲛⲉⲙⲡⲟⲟⲩ ⲙⲙⲁⲧⲉ ⲡⲉⲛⲧⲁⲓϫⲟⲛⲧ ⲉϣⲓⲛⲉ ⲛⲁϥ ⲙⲡⲛⲟⲩⲧⲉ ⲙⲡⲉⲣϭⲱⲛⲧ ⲡⲣⲣⲟ ⲁⲩⲱ ⲙⲡⲣⲧⲣⲉⲟⲩϣⲁϫⲉ ⲉⲓ ⲉⲃⲟⲗ ϩⲛ ⲣⲱϥ ⲙⲡⲣⲣⲟ ⲉϫⲙ ⲡⲉⲕϩⲙϩⲁⲗ ⲁⲩⲱ ⲡⲏⲓ ⲧⲏⲣϥ ⲙⲡⲁⲉⲓⲱⲧ ϫⲉ ⲡⲉⲕϩⲙϩⲁⲗ ⲉⲧⲉⲁⲛⲟⲕ ⲡⲉ ⲛϯⲥⲟⲟⲩⲛ ⲁⲛ ⲉϩⲱⲃ ⲛⲉⲓⲙⲓⲛⲉ ⲟⲩⲇⲉ ϫⲓⲛ ⲟⲩⲕⲟⲩⲓ ⲛϣⲁϫⲉ ϣⲁ ⲟⲩⲛⲟϭ

22:16  ⲡⲣⲣⲟ ⲇⲉ ⲥⲁⲟⲩⲗ ⲡⲉϫⲁϥ ϫⲉ ϩⲛ ⲟⲩⲙⲟⲩ ⲕⲛⲁⲙⲟⲩ ⲁⲭⲓⲙⲉⲗⲉⲭ ⲙⲛ ⲡⲏⲓ ⲙⲡⲉⲕⲉⲓⲱⲧ

22:17  ⲁⲩⲱ ⲡⲣⲣⲟ ⲡⲉϫⲁϥ ⲛⲛⲉⲧⲁϩⲉⲣⲁⲧⲟⲩ ⲙⲡⲉϥⲉⲃⲟⲗ ϫⲉ ϯ ⲙⲡⲉⲧⲉⲛⲟⲩⲟⲓ ⲉϩⲟⲩⲛ ⲉⲛⲉⲟⲩⲏⲏⲃ ⲙⲡϫⲟⲉⲓⲥ ⲛⲧⲉⲧⲛⲙⲟⲟⲩⲧⲟⲩ ϫⲉ ⲧⲟⲟⲧⲟⲩ ⲥⲙⲟⲛⲧ ⲙⲛ ⲇⲁⲩⲉⲓⲇ ⲁⲩⲱ ⲛⲧⲟⲟⲩ ⲁⲩⲉⲓⲙⲉ ϫⲉ ϥⲡⲏⲧ ⲛⲧⲟⲟⲧ ⲁⲩⲱ ⲙⲡⲟⲩⲧⲁⲙⲟⲓ ⲙⲡⲟⲩⲣϩⲛⲁⲩ ⲇⲉ ⲛϭⲓ ⲛϩⲙϩⲁⲗ ⲙⲡⲣⲣⲟ ⲉⲉⲛⲧⲟⲟⲧⲟⲩ ⲉϫⲛ ⲛⲉⲟⲩⲏⲏⲃ ⲙⲡϫⲟⲉⲓⲥ ⲉⲙⲟⲟⲧⲟⲩ

22:18  ⲁⲩⲱ ⲡⲣⲣⲟ ⲡⲉϫⲁϥ ⲛⲇⲱⲏⲕ ⲡⲓⲇⲟⲩⲙⲁⲓⲟⲥ ϫⲉ ⲃⲱⲕ ⲛⲧⲟⲕ ⲛⲅⲙⲟⲩⲟⲩⲧ ⲛⲛⲉⲟⲩⲏⲏⲃ ⲇⲱⲏⲕ ⲇⲉ ⲡⲥⲩⲣⲟⲥ ⲁϥⲃⲱⲕ ⲁϥⲙⲟⲟⲩⲧⲟⲩ ⲁⲩⲱ ⲁϥⲙⲟⲩⲟⲩⲧ ⲙⲡⲉϩⲟⲟⲩ ⲉⲧⲙⲙⲁⲩ ⲛϣⲟⲙⲧⲉ ⲛϣⲉ ϯⲟⲩ ⲛⲣⲱⲙⲉ ⲛⲧⲟⲟⲩ ⲇⲉ ⲧⲏⲣⲟⲩ ⲉⲩϥⲓ ⲉⲫⲟⲩⲇ

22:19  ⲁⲩⲱ ⲛⲟⲙⲃⲁ ⲧⲡⲟⲗⲓⲥ ⲛⲛⲉⲟⲩⲏⲏⲃ ⲁϥⲧⲁⲕⲟⲥ ϩⲛ ⲧⲧⲁⲡⲣⲟ ⲛⲧⲥⲏϥⲉ

22:20  ⲁϥⲟⲩϫⲁⲓ ⲛϭⲓ ⲟⲩϣⲏⲣⲉ ⲛⲟⲩⲱⲧ ⲛⲧⲉ ⲁⲭⲓⲙⲉⲗⲉⲭ ⲡϣⲏⲣⲉ ⲛⲁⲭⲓⲇⲱⲃ ⲉⲡⲉϥⲣⲁⲛ ⲡⲉ ⲁⲃⲓⲁⲑⲁⲣ ⲁϥⲡⲱⲧ ⲉⲣⲁⲧϥ ⲛⲇⲁⲩⲉⲓⲇ

22:21  ⲁⲩⲱ ⲁⲃⲓⲁⲑⲁⲣ ⲁϥⲧⲁⲙⲉⲇⲁⲩⲉⲓⲇ ϫⲉ ⲥⲁⲟⲩⲗ ⲁϥⲙⲟⲩⲟⲩⲧ ⲛⲛⲉⲟⲩⲏⲏⲃ ⲧⲏⲣⲟⲩ ⲙⲡϫⲟⲉⲓⲥ

22:22  ⲡⲉϫⲉⲇⲁⲩⲉⲓⲇ ⲛⲁⲃⲓⲁⲑⲁⲣ ϫⲉ ⲉⲛⲉⲓⲥⲟⲟⲩⲛ ⲙⲡⲉϩⲟⲟⲩ ⲉⲧⲙⲙⲁⲩ ϫⲉ ⲇⲱⲏⲕ ⲡⲥⲩⲣⲟⲥ ⲛⲉϥⲙⲙⲁⲩ ⲁⲩⲱ ϫⲉ ϥⲛⲁⲧⲁⲙⲉⲥⲁⲟⲩⲗ ⲉⲣⲟⲓ ⲁⲛⲟⲕ ⲡⲉ ⲡⲉⲇⲓⲟⲥ ⲛⲛⲉⲯⲩⲭⲏ ⲙⲡⲏⲓ ⲧⲏⲣϥ ⲙⲡⲉⲕⲉⲓⲱⲧ

22:23  ϩⲙⲟⲟⲥ ⲙⲡⲉⲓⲙⲁ ϩⲁϩⲧⲏⲓ ⲛⲅⲧⲙⲣϩⲟⲧⲉ ϫⲉ ⲡⲙⲁ ⲉϯⲛⲁⲕⲱⲧⲉ ⲛⲥⲁ ⲙⲙⲁ ⲙⲡⲱⲧ ⲛⲧⲁⲯⲩⲭⲏ ⲉⲣⲟϥ ϯⲛⲁⲕⲱⲧⲉ ϩⲱⲱϥ ⲛⲥⲁ ⲟⲩⲙⲁ ⲛⲧⲉⲕⲯⲩⲭⲏ ϫⲉ ⲛⲧⲟⲕ ⲁⲕⲡⲱⲧ ⲉⲣⲁⲧ