CSlElizabeth - Job - 35

35:1  Отвещав же еще Елиус, рече:

35:2  что сие мнил еси на суде? Ты кто еси, яко рекл еси: прав есмь пред Господем?

35:3  Или речеши: что сотворю согрешив?

35:4  Аз же ти дам ответ и трием другом твоим.

35:5  Воззри на небо и виждь: смотри же на облаки, коль высоки суть от тебе.

35:6  Аще согрешил еси, что сотвориши? Аще же и много беззаконновал еси, что можеши сотворити?

35:7  Понеже убо праведен еси, что даси Ему? Или что из руки твоея возмет?

35:8  Мужеви подобному тебе нечестие твое, и сыну человеческому правда твоя.

35:9  От множества оклеветаемии воззовут, возопиют от мышцы многих:

35:10  и не рече: где есть Бог сотворивый мя, устрояяй стражбы нощныя,

35:11  отделяяй мя от четвероногих земных и от небесных птиц?

35:12  Тамо воззовут, и не имаши услышати, и от досады злых.

35:13  Безместная бо видети не хощет Господь: Сам бо Вседержитель зритель есть творящих беззаконная, и спасет мя.

35:14  Судися же пред Ним, аще можеши похвалити Его, якоже есть и ныне.

35:15  Яко несть посещаяй гневом Своим, и не позна прегрешения коеголибо зело.

35:16  Иов же всуе отверзает уста своя, неведением словеса отягощает.