Geez - Judges - 15

15:1  ወእምድኅረ ፡ መዋዕል ፡ አመ ፡ ማአረረ ፡ ስርናይ ፡ ኀወጻ ፡ ሶምሶን ፡ ለብእሲቱ ፡ ወአምጽኣ ፡ ላቲ ፡ ማሕሥአ ፡ ጠሊ ፡ ወይቤ ፡ እባእ ፡ ኀበ ፡ ብእሲትየ ፡ ውስተ ፡ ጽርሕ ፡ ወከልኦ ፡ አቡሃ ፡ በዊአ ፡ ኀቤሃ ።

15:2  ወይቤሎ ፡ አቡሃ ፡ እስመ ፡ ትቤ ፡ ጸላእክዋ ፡ ወሀብክዎ ፡ ለካልእከ ፡ ወባሕቱ ፡ [ነያ ፡] እኅታ ፡ እንተ ፡ ትንእሳ ፡ ወትሤንያ ፡ ወትኩንከ ፡ ህየንቴሃ ።

15:3  ወይቤ ፡ ሶምሶን ፡ ንጹሕ ፡ አነ ፡ ምዕረ ፡ እምነ ፡ አሎፍል ፡ እስመ ፡ አነ ፡ እገብር ፡ እኪተ ፡ ምስሌክሙ ።

15:4  ወሖረ ፡ ሶምሶን ፡ ወአኀዘ ፡ ሠለስተ ፡ ምእተ ፡ ቈናጽለ ፡ ወነሥአ ፡ መኃትወ ፡ ወአሰረ ፡ ውስተ ፡ አዝናቢሆሙ ፡ ወወደየ ፡ አሐተ ፡ ማኅቶተ ፡ ማእከለ ፡ ክልኤቱ ፡ አዝናቢሆሙ ።

15:5  ወአኅተወ ፡ እሳተ ፡ ውስተ ፡ ውእቱ ፡ መኃትው ፡ ወፈነዎሙ ፡ ውስተ ፡ ክልስስታት ፡ ዘአሎፍል ፡ ወአውዐዩ ፡ ሠዊተ ፡ ወክምረ ፡ ዘተዐፅደ ፡ ወዘይቀውም ፡ ወዘውጡሕ ፡ ወአዕጻዳተ ፡ ወይን ፡ ወዘዘይት ።

15:6  ወይቤሉ ፡ አሎፍል ፡ መኑ ፡ ገብረ ፡ ዘንተ ፡ ወይቤልዎሙ ፡ ሶምሶን ፡ ሐሙሁ ፡ ለተምናታዊ ፡ እስመ ፡ ሄድዎ ፡ ብእሲቶ ፡ ወወሀብዋ ፡ ለካልኡ ፡ ወዐርጉ ፡ አሎፍል ፡ ወአውዐዩ ፡ ቤተ ፡ አቡሃ ፡ ወኪያሃኒ ፡ ወአቡሃኒ ፡ በእሳት ።

15:7  ወይቤሎሙ ፡ ሶምሶን ፡ እመሰ ፡ ገበርክሙ ፡ [ዘንተ ፡] ኢይፈቅድ ፤ በቀልየሰ ፡ እምነ ፡ አሐዱ ፡ ወለኵልክሙ ፡ እምረሰይኩ ።

15:8  ወዘበጦሙ ፡ ሶምሶን ፡ ውስተ ፡ አቍያጸ ፡ እገሪሆሙ ፡ ወኮነ ፡ ዐቢይ ፡ ቀትል ፡ ወወረደ ፡ ሶምሶን ፡ ወነበረ ፡ ውስተ ፡ ፈለግ ፡ ውስተ ፡ በአተ ፡ ኤጣም ።

15:9  ወዐርጉ ፡ አሎፍል ፡ ወኀደሩ ፡ ላዕለ ፡ ይሁዳ ፡ ወተዐዝሩ ፡ ላዕለ ፡ ሌ[ሒ] ።

15:10  ወይቤልዎሙ ፡ ኵሉ ፡ ሰብአ ፡ ይሁዳ ፡ ለምንት ፡ ዐረግሙ ፡ ላዕሌነ ፡ ወይቤሉ ፡ አሎፍል ፡ ከመ ፡ ንእስሮ ፡ ለሶምሶን ፡ ዐረግነ ፡ ወንግበሮ ፡ በከመ ፡ ገብረነ ።

15:11  ወወረዱ ፡ ሠላሳ ፡ ምእት ፡ ብእሲ ፡ እምነ ፡ ይሁዳ ፡ ኀበ ፡ በአተ ፡ ኰኵሕ ፡ ዘኤጣም ፡ ወይቤልዎ ፡ ለሶምሶን ፡ ኢታአምርኑ ፡ ከመ ፡ አሎፍል ፡ ይኴንኑነ ፡ ለምንት ፡ ከመዝ ፡ ገበርከ ፡ ላዕሌነ ፡ ወይቤሎሙ ፡ ሶምሶን ፡ በከመ ፡ ገብሩ ፡ ላዕሌክሙ ፡ ከማሁ ፡ ገበርኩ ፡ ላዕሌሆሙ ።

15:12  ወይቤልዎ ፡ ከመ ፡ ንእስርከ ፡ ወረድነ ፡ ወናግብእከ ፡ ውስተ ፡ እዴሆሙ ፡ ለአሎፍል ፡ ወይቤሎሙ ፡ ሶምሶን ፡ መሐሉ ፡ ሊተ ፡ አንትሙ ፡ ከመ ፡ ኢትቅትሉኒ ፡ አንትሙ ፡ ወአግብኡኒ ፡ ሎሙ ፡ ወአንትሙሰ ፡ ኢትትራከቡ ፡ ምስሌየ ።

15:13  ወመሐሉ ፡ ሎቱ ፡ ወይቤልዎ ፡ አልቦ ፡ ዳእሙ ፡ ነአስረከ ፡ በማእስር ፡ ወናገብአከ ፡ ውስተ ፡ እዴሆሙ ፡ ወቀቲለሰ ፡ ኢንቀትለከ ፡ ወአሰርዎ ፡ በክልኤቱ ፡ መፃምድ ፡ ሐደስት ፡ ወአውፅአዎ ፡ እምነ ፡ ይእቲ ፡ ኰኵሕ ።

15:14  ወበጽሐ ፡ እስከነ ፡ ኀበ ፡ ዐጽመ ፡ መንከስ ፡ ወወውዑ ፡ አሎፍል ፡ ወተቀበልዎ ፡ ወሮጹ ፡ ላዕሌሁ ፡ ወመጽአ ፡ ላዕሌሁ ፡ መንፈሰ ፡ እግዚአብሔር ፡ ወኮኑ ፡ እልክቱ ፡ መፃምድ ፡ እለ ፡ ውስተ ፡ መዝራእቱ ፡ ከመ ፡ ሶበ ፡ ያጼኑ ፡ እሳተ ፡ ኀሠር ፡ ወተፈትሐ ፡ ማኅሜሁ ፡ እምነ ፡ መዝራእቱ ።

15:15  ወረከበ ፡ ዐጽመ ፡ መንከስ ፡ ዘአድግ ፡ ግዱፈ ፡ ውስተ ፡ ፍኖት ፡ ወአትሐተ ፡ እዴሁ ፡ ወተመጠዋ ፡ ወቀተለ ፡ ባቲ ፡ ዐሠርተ ፡ ምእተ ፡ ብእሴ ።

15:16  ወይቤ ፡ ሶምሶን ፡ በዐጽመ ፡ መንከሰ ፡ አድግ ፡ ደምስሶ ፡ ደምሰስክዎሙ ፡ እስመ ፡ በዐጽመ ፡ መንከሰ ፡ አድግ ፡ ቀተልኩ ፡ ዐሠርተ ፡ ምእተ ፡ ብእሴ ።

15:17  ወእምዝ ፡ ሶበ ፡ አኅለቀ ፡ ነቢበ ፡ ገደፋ ፡ ለይእቲ ፡ ዐጽመ ፡ መንከስ ፡ እምነ ፡ እዴሁ ፡ ወሰመዮ ፡ ለውእቱ ፡ መካን ፡ ቀትለ ፡ ዐጽመ ፡ መንከስ ።

15:18  ወጸምአ ፡ ጥቀ ፡ ወጸርኀ ፡ ኀበ ፡ እግዚአብሔር ፡ ወይቤ ፡ አንተ ፡ አግባእከ ፡ ውስተ ፡ እደ ፡ ገብርከ ፡ ዛተ ፡ ሕይወተ ፡ ዐባየ ፡ ወይእዜሰ ፡ እመውት ፡ በጽምእ ፡ ወእወድቅ ፡ ውስተ ፡ እዴሆሙ ፡ ለቈላፍያን ።

15:19  ወአርኀወ ፡ እግዚአብሔር ፡ ንቅዐታ ፡ ለይእቲ ፡ ዐጽመ ፡ መንከስ ፡ ወወፅአ ፡ እምኔሃ ፡ ማይ ፡ ወሰትየ ፡ ወገብአት ፡ ነፍሱ ፡ ወአዕረፈ ፡ በበይነ ፡ ዝንቱ ፡ ተሰምየ ፡ ስሙ ፡ ለውእቱ ፡ መካን ፡ ነቅዐ ፡ ዐጽመ ፡ መንከስ ፡ እስከ ፡ ዮም ።

15:20  ወኰነኖሙ ፡ ለእስራኤል ፡ በመዋዕለ ፡ አሎፍል ፡ ፳ዓመተ ።