TpiKJPB - Ruth - 1

1:1  ¶ Nau em i kamap olsem long taim ol jas i bosim Isrel, long i gat wanpela bikpela taim hangre long dispela hap. Na wanpela man bilong Betlehem-juda i go bilong stap waira long kantri bilong Moap, em, na meri bilong em, na tupela pikinini man bilong em.

1:2  Na nem bilong dispela man em Elimelek, na nem bilong meri bilong en em Neomi, na nem bilong tupela pikinini man bilong en em Malon na Kilion, ol man Efrat bilong Betlehem-juda. Na ol i kam insait long kantri bilong Moap, na stap olsem long dispela hap.

1:3  Na Elimelek, man bilong Neomi, i dai pinis. Na meri i stap yet, na tupela pikinini man bilong em.

1:4  Na tupela i maritim ol meri bilong ol meri bilong Moap. Nem bilong wanpela em Orpa, na nem bilong arapela em Rut. Na ol i sindaun long dispela hap klostu olsem tenpela yia.

1:5  Na Malon na Kilion i dai pinis tu, tupela wantaim. Na meri i stap yet taim tupela pikinini man bilong em na man bilong em i dai pinis.

1:6  ¶ Nau em i kirap wantaim tupela tambu pikinini meri bilong em, inap long em i ken go bek na lusim kantri bilong Moap. Long wanem, em i bin harim long kantri bilong Moap long BIKPELA i bin kam lukim ol lain manmeri bilong Em olsem wanem long givim ol kaikai.

1:7  Olsem na meri i go ausait long ples we em i stap, na tupela tambu pikinini meri bilong em wantaim em. Na ol i go long rot long go bek long hap bilong Juda.

1:8  Na Neomi i tokim tupela tambu pikinini meri bilong em, Goan, yutupela wan wan go bek long haus bilong mama bilong em. BIKPELA i ken mekim gutpela long yutupela, olsem yutupela i bin mekim long ol daiman, na long mi.

1:9  BIKPELA i ken tok orait long yutupela i ken painim malolo, yutupela wan wan, long hauslain bilong man bilong em. Nau em i givim kis long ol. Na ol i apim nek bilong ol, na krai tru.

1:10  Na tupela i tokim em, Tru tumas, mitupela bai go bek wantaim yu i go long lain bilong yu.

1:11  Na Neomi i tok, Tanim gen, tupela pikinini meri bilong mi. Bilong wanem yutupela i laik go wantaim mi? Ating i gat ol pikinini man moa liklik i stap yet long bel bilong mi, inap long ol i ken kamap ol man bilong yutupela?

1:12  Tanim gen, tupela pikinini meri bilong mi, go long rot bilong yutupela. Long wanem, mi lapun tumas long kisim man gen. Sapos mi ken tok, Mi gat hop, na sapos mi ken kisim man gen tu long tude nait, na tu mi ken karim ol pikinini man,

1:13  Ating yutupela bai stap yet inap long ol i kamap bikpela pinis? Ating yutupela bai pas long kisim ol man long wetim ol? Nogat, tupela pikinini meri bilong mi. Long wanem, em i givim bel sori long mi planti, taim mi tingim yutupela, long han bilong BIKPELA i go ausait na birua long mi.

1:14  Na ol i apim nek bilong ol, na krai tru gen. Na Orpa i givim kis long tambu mama bilong em. Tasol Rut i holimpas em strong.

1:15  Na em i tok, Lukim, tambu susa bilong yu i go bek pinis long ol lain bilong em, na long ol god bilong em. Yu mas go bek na bihainim tambu susa bilong yu.

1:16  Na Rut i tok, No ken mekim strongpela askim long mi mas lusim yu, o long mi mas go bek long bihainim yu. Long wanem, wanem ples yu bai go, Mi bai go. Na we yu bai stap, Mi bai stap. Lain bilong yu bai stap lain bilong mi, na God bilong yu bai stap God bilong mi.

1:17  We yu bai dai, mi bai dai, na long dispela hap ol bai planim mi. BIKPELA i mekim olsem long mi, na moa tu, sapos dai wanpela tasol i no brukim yu na mi.

1:18  Taim Neomi i luksave long em i gat strongpela tingting tru long go wantaim em, orait em i no toktok long em moa.

1:19  ¶ Olsem na tupela i go inap long ol i kamap long Betlehem. Na em i kamap olsem, taim ol i kamap long Betlehem, long olgeta bilong biktaun i kirap long sait bilong tupela, na ol i tok, Dispela em i Neomi?

1:20  Na em i tokim ol, No ken kolim mi Neomi, kolim mi Mara. Long wanem, Man i Gat Olgeta Strong i bin mekim samting i pait tru long mi.

1:21  Mi bin go ausait pulap, na BIKPELA i bin bringim mi long ples gen emti. Bilong wanem nau yupela i kolim mi Neomi, taim yupela i luksave olsem BIKPELA i bin tokaut birua long mi, na Man i Gat Olgeta Strong i bin givim hevi long mi?

1:22  Olsem na Neomi i kam bek, na meri Moap Rut, tambu pikinini meri bilong em, wantaim em, husat i kam bek ausait long kantri bilong Moap. Na ol i kam long Betlehem long stat bilong taim bilong kamautim bali.