LinVB - Zechariah - 11

11:1  Fungola bizibeli bya yo, Libano, móto mosilisa sédere ya yo !

11:2  Nzete ya sipresi ikimela mpo ya nzete ya sédere ikwei, mpe nzete inene iye bakati ! Bino, nzete ya wenge ya Basan, bolela, zambi bakati zamba lya bino mobimba.

11:3  Boyoka bokimeli bwa bakengeli ba mpata, zambi bokonzi bwa bango bosili. Boyoka boleli bwa bana ba nkosi, zambi lokumu la Yordane losili.

11:4  Yawe Nzambe wa ngai alobi boye : « Kende koleisa mpata iye bali­ngi koboma.

11:5  Bato basombi mpata, bazali koboma yango, mpe moto moko apekisi bango te ; ntango bateki yango balobi : ‘Batondo Nza­mbe, nakomi moto wa nkita’, mpe bakengeli bayoki ata mawa te. »

11:6  Ya­ngo wana Yawe alobi : « Ngai mpe nakoyokela bato ba ekolo eye mawa te. Nakokaba bango banso o maboko ma bato basusu mpe ma mokonzi wa bango. Bango bako­nyata ekolo, kasi nakobikisa yango o maboko ma bango te. »

11:7  Bongo nakomi mokengeli wa mpata iye bato ba mombongo balingaki koboma. Nakamati mangenda mabale ; natangi lingenda lyoko na nko­mbo ‘Bolamu’, lingenda lisusu ‘Lisanga’ ; nakei koleisa mpata.

11:8  Nalongoli bakengeli basato se na sanza yoko. Kasi nalembi mpata mpo iyoki ngai mpi.

11:9  Nalobi : « Nakoleisa mpata lisusu te : eye ezali ya kokufa, ekufa ; eye ezali ya kobeba, ebeba ; mpata ikotikala, itikala koliana. »

11:10  Nakamati lingenda lya ngai, liye nata­nga­ki ‘Bolamu’, nabuki lyango biteni biteni mpo ’te naboma bondeko nakataki na bikolo biye binso.

11:11  Bo­ngo mokolo mona nabomi bondeko bwango. Bato ba mombongo bazalaki kotala ngai, bayebaki ’te ezalaki Yawe moto alobi bongo.

11:12  Na­lobi na bango : « Soko bolingi, bopesa ngai lifuta lya ngai. Soko bolingi te, botika. » Bameki bozito bwa lifuta lya ngai, bapesi ngai mitako mya palata ntuku isato.

11:13  Yawe alobi na ngai : « Bwakela motuli lifuta liye, bango bamonoki ’te ekoki na ngai ! » Bongo nakamati mitako mya palata ntuku isato, nabwaki myango o Ndako ya Yawe mpo ’te bapesa myango na motuli.

11:14  Na nsima nabuki mpe lingenda lya mabale nkombo ’te ‘Lisanga’, mpo ’te naboma bondeko kati ya Yuda na Israel.

11:15  Yawe alobi na ngai : « Lata lokola mokengeli azangi mayele,

11:16  za­mbi nakopesa ekolo eye mokengeli oyo akopangana te na mpata eza­ngi, eye ebungi akoluka yango te, eye ezoki akosalisa yango te, eye elembi akomeme yango te ; kasi akolia iye ya mafuta, mpe akokata yango matambi.

11:17  Mawa na mokengeli wa mpamba, oyo akotika etonga ya ye ! Mopanga mobete loboko la ye mpe liso lya ye lya mobali ; loboko la ye lokauka, liso lya ye lya mobali likufa ! »