SPVar - Exodus - 2

2:1  וילך איש מבית לוי ויקח את בת לוי

2:2  ותהר האשה ותלד בן ותרא אתו כי טוב הוא ותצפנהו שלשה ירחים

2:3  ולא יכלה עוד הצפנהו ותקח לו אמו תבת גמא ותחמרה בחמר ובזפת ותשם בה את הילד ותשם בסף על שפת היאר

2:4  ותתיצב אחתו מרחק לדעה מה יעשה לו

2:5  ותרד בת פרעה לרחץ על היאר ונערתיה הלכת על יד היאר ותרא את התבה בתוך הסף ותשלח את אמתה ותקחה

2:6  ותפתחה ותרא את הילד והנה נער בכה ותחמל עליו בת פרעה ותאמר מילדי העברים זה

2:7  ותאמר אחתו אל בת פרעה האלך וקראתי לך אשה מינקת מן העבריות ותינק לך את הילד

2:8  ותאמר לה בת פרעה לכי ותלך העלמה ותקרא את אם הילד

2:9  ותאמר לה בת פרעה הלכי את הילד הזה והינקהו לי ואני אתן את שכרך ותקח האשה את הילד ותניקהו

2:10  ויגדל הנער ותבאהו אל בת פרעה ויהי לה לבן ותקרא את שמו משה ותאמר כי מן המים משיתיו

2:11  ויהי בימים ההם ויגדל משה ויצא אל אחיו וירא בסבלתם וירא איש מצרי מכה איש עברי מאחיו

2:12  ויפן כה וכה וירא כי אין איש ויך את המצרי ויטמנהו בחול

2:13  ויצא ביום השני והנה שני אנשים עברים נצים ויאמר לרשע למה תכה רעך

2:14  ויאמר מי שמך לאיש שר ולשפט עלינו הלהרגני אתה אמר כאשר הרגת את המצרי ויירא משה ויאמר אכן נודע הדבר

2:15  וישמע פרעה את הדבר הזה ויבקש להרג את משה ויברח משה מפני פרעה וישב בארץ מדין וישב על הבאר

2:16  ולכהן מדין שבע בנות ותבאנה ותדלנה ותמלאנה את הרהטים להשקות את צאן אביהן

2:17  ויבאו הרעים ויגרשום ויקם משה ויושען וישק את צאנם

2:18  ותבאנה אל רעואל אביהן ויאמר מדוע מהרתן בא היום

2:19  ותאמרנה איש מצרי הצילנו מיד הרעים וגם דלה דלא לנו וישק את הצאן

2:20  ויאמר אל בנתיו ואיה למה זה עזבתן את האיש קראן לו ויאכל לחם

2:21  ויאל משה לשבת את האיש ויתן את צפורה בתו למשה לאשה

2:22  ותלד בן ויקרא את שמו גרשם כי אמר גר הייתי בארץ נכריה

2:23  ויהי בימים הרבים ההם וימת מלך מצרים ויאנחו בני ישראל מן העבדה ויצעקו ותעל שועתם אל האלהים מן העבדה

2:24  וישמע אלהים את נקאתם ויזכר אלהים את בריתו את אברהם ואת יצחק ואת יעקב

2:25  וירא אלהים את בני ישראל וידע אלהים