SPVar - Exodus - 4

4:1  ויען משה ויאמר והן לא יאמנו לי ולא ישמעו בקולי כי יאמרו לא נראה אליך יהוה

4:2  ויאמר אליו יהוה מה זה בידך ויאמר מטה

4:3  ויאמר השליכהו ארצה וישלכהו ארצה ויהי לנחש וינס משה מפניו

4:4  ויאמר יהוה אל משה שלח ידך ואחז בזנבו וישלח ידו ויחזק בו ויהי למטה בכפו

4:5  למען יאמנו כי נראה אליך יהוה אלהי אבתם אלהי אברהם ואלהי יצחק ואלהי יעקב

4:6  ויאמר יהוה לו עוד הבא נא ידך בחיקך ויבא ידו בחיקו ויוצאה מחיקו והנה ידו מצרעת כשלג

4:7  ויאמר השב ידך אל חיקך וישב ידו אל חיקו ויוציאה מחיקו והנה שבה כבשרו

4:8  והיה אם לא יאמנו לך ולא ישמעו לקול האות הראישון והאמנו לקול האות האחרון

4:9  והיה אם לא יאמנו גם לשני האתות האלה ולא ישמעו לקולך ולקחת ממימי היאר ושפכת היבשה והיו המים אשר תקח מן היאר יהיו לדם ביבשת

4:10  ויאמר משה אל יהוה בי אדני לא איש דברים אנכי גם מתמול גם משלשום גם מאז דברך אל עבדך כי כבד פה וכבד לשון אנכי

4:11  ויאמר יהוה אליו מי שם פה לאדם או מי ישים אלם או חרש או פקח או עור הלא אנכי יהוה

4:12  ועתה לך ואנכי אהיה עם פיך והוריתך אשר תדבר

4:13  ויאמר בי אדני שלח נא ביד תשלח

4:14  ויחר אף יהוה במשה ויאמר הלוא אהרן אחיך הלוי ידעתי כי דבר ידבר הוא וגם הנה הוא יצא לקראתך וראך ושמח בלבבו

4:15  ודברת אליו ושמת את הדברים בפיו ואנכי אהיה עם פיך ועם פיו והוריתי אתכם את אשר תעשון

4:16  ודבר הוא לך אל העם והיה הוא יהיה לך לפה ואתה תהיה לו לאלהים

4:17  ואת המטה הזה תקח בידך אשר תעשה בו את האתות

4:18  וילך משה וישב אל יתרו חתנו ויאמר לו אלכה נא ואשובה אל אחי אשר במצרים ואראה העודם חיים ויאמר יתרו למשה לך לשלום

4:19  ויאמר יהוה אל משה במדין לך שוב מצריםה כי מתו כל האנשים המבקשים את נפשך

4:20  ויקח משה את אשתו ואת בניו וירכבם על החמור וישב ארץ מצרים ויקח משה את מטה האלהים בידו

4:21  ויאמר יהוה אל משה בלכתך לשוב מצרימה ראה את כל המפתים אשר שמתי בידך ועשיתם לפני פרעה ואני אחזק את לבו ולא ישלח את העם

4:22  ואמרת אל פרעה כה אמר יהוה בני בכרי ישראל

4:23  ואמר אליך שלח את בני ויעבדני ותמאן לשלחו הנה אנכי הרג את בנך בכרך

4:24  ויהי בדרך במלון ויפגשהו יהוה ויבקש המיתו

4:25  ותקח צפורה צר ותכרת את ערלת בנה ותגע לרגליו ותאמר כי חתן דמים אתה לי

4:26  וירף ממנה אז אמרה חתן דמים למלות

4:27  ויאמר יהוה אל אהרן לך לקראת משה המדברה וילך ויפגשהו בהר האלהים וישק לו

4:28  ויגד משה לאהרן את כל דברי יהוה אשר שלחו ואת כל האתות אשר צוהו

4:29  וילכו משה ואהרן ויאספו את כל זקני בני ישראל

4:30  וידבר אהרן את כל הדברים אשר דבר יהוה אל משה ויעש האתות לעיני העם

4:31  ויאמנו העם וישמעו כי פקד יהוה את בני ישראל וכי ראה את ענים ויקדו וישתחוו