SPVar - Exodus - 27

27:1  ועשית מזבח עצי שטים חמש אמות ארך וחמש אמות רחב רבוע יהיה המזבח ושלש אמות קומתו

27:2  ועשית קרנתיו על ארבע פנתיו ממנו תהיינה קרנתיו וצפית אתו נחשת

27:3  ועשית סירתיו לדשנו ויעיו ומזרקתיו ומזלגתיו ומחתיתיו לכל כליו תעשה נחשת

27:4  ועשית לו מכבר מעשה רשת נחשת ועשית על הרשת ארבע טבעות נחשת על ארבע קצתיו

27:5  ונתתה אתו תחת כרכב המזבח מלמטה והיתה הרשת עד חצי המזבח

27:6  ועשית בדים למזבח בדי עצי שטים וצפית אתם נחשת

27:7  והבאת את הבדים בטבעות והיו הבדים על שתי צלעות המזבח בשאת אתו

27:8  נבוב לוחת תעשה אתו כאשר הראה אתך בהר וכן יעשו

27:9  ועשית את חצר המשכן לפאת נגבה תימנה קלעים לחצר שש משזר מאה באתה ארך לפאה האחת

27:10  ועמדיו עשרים ואדניהם עשרים נחשת וויהם וחשקיהם כסף

27:11  וכן לפאת צפונה בארך קלעים מאה באמה עמודיהם עשרים ואדניהם עשרים נחשת וויהם וחשקיהם לסף

27:12  ורחב החצר לפאת יםה קלעים חמשים אמה עמדיהם עשרה ואדניהם עשרה נחשת

27:13  ורחב החצר לפאת קדמה מזרחה חמשים אמה

27:14  חמש עשרה אמה קלעים לכתף עמדיהם שלשה ואדניהם שלשה נחשת

27:15  ולפאת השנית חמש עשרה אמה קלעים עמודיהם שלשה ואדניהם שלשה נחשת

27:16  ולשער החצר מסך עשרים אמה תכלת וארגמן ותולעת שני ושש משזר מעשה רקם עמודיהם ארבעה ואדניהם ארבעה נחשת

27:17  כל עמודי החצר סביב מחשקים כסף וויהם כסף ואדניהם נחשת

27:18  ארך החצר מאה באמה ורחב חמשים באמה וקומה חמש אמות שש משזר ואדניהם נחשת ועשית את

27:19  כל כלי המשכן בכל עבדתו ובכל יתדתיו וכל יתדות החצר נחשת ועשית בגדי תכלת וארגמן ותולעת שני לשדת בהם בקדש

27:20  ואתה תצוה את בני ישראל ויקחו אליך שמן זית זך כתית למאור להעלות נר תמיד

27:21  באהל מועד מחוץ לפרכת אשר על העדות יערך אתו אהרן ובניו מערב עד בקר לפני יהוה חקת עולם לדרתיכם מאת בני ישראל