CSlElizabeth - Exodus - 2

2:1  Бяше же некто от племене Левиина, иже поя от дщерей Левииных, и имяше ю:

2:2  и зача во чреве и роди мужеский пол. Видевше же его лепа, крыша его три месяцы:

2:3  и понеже не можаху его ктому крыти, взя ему мати его ковчежец ситовый и помаза и клеем и смолою, и вложи отроча в него, и положи его в лучице при реце:

2:4  и наблюдаше сестра его издалеча, да уведает, что будет ему.

2:5  Сниде же дщерь фараонова измытися на реку, и рабыни ея прохождаху при реце. И видевши ковчежец в лучице, пославши рабыню, взя и.

2:6  Отверзши же, видит отроча плачущееся в ковчежце, и пощаде е дщерь фараоня, и рече: от детей Еврейских сие.

2:7  И рече сестра его дщери фараонове: хощеши ли, призову ти жену кормилицу от Еврей, и воздоит ти отроча?

2:8  И рече ей дщерь фараонова: иди. Шедши же отроковица, призва матерь отрочате.

2:9  Рече же к ней дщерь фараонова: соблюди ми отроча сие и воздой ми е: аз же дам ти мзду. Взя же отроча жена и дояше е.

2:10  Возмужавшу же отрочати, введе е ко дщери фараонове, и бысть ей в сына, и нарече имя ему Моисей, глаголющи: от воды взях его.

2:11  Бысть же во дни многия оны, велик быв Моисей, изыде к братиям своим, сыном Израилевым. Разумев же болезнь их, виде человека Египтянина биюща некоего Евреанина от братии его сынов Израилевых.

2:12  Обозревся же семо и овамо, ни когоже виде: и поразив Египтянина, скры его в песце.

2:13  Изшед же во вторый день, виде два мужа Евреанина биющася и глагола обидящему: чесо ради ты биеши искренняго?

2:14  Он же рече: кто тя постави князя и судию над нами? Еда убити мя ты хощеши, имже образом убил еси вчера Египтянина? Убояся же Моисей и рече: аще сице явлен бысть глагол сей?

2:15  Услыша же фараон глагол сей и искаше убити Моисеа. Отиде же Моисей от лица фараонова и вселися в земли Мадиамстей: пришед же в землю Мадиамскую седе при кладязе.

2:16  Священнику же Мадиамскому беша седмь дщерей, пасущих овцы отца своего Иофора: пришедшя же черпаху, дондеже наполниша корыта, напоити овцы отца своего Иофора.

2:17  Пришедше же пастырие изгнаша я. Востав же Моисей избави их, и налия им и напои овцы их.

2:18  Приидоша же к Рагуилу отцу своему. Он же рече им: что яко ускористе приити днесь?

2:19  Оныя же рекоша: человек Египтянин избави нас от пастырей, и начерпа нам и напои овцы нашя.

2:20  Он же рече дщерем своим: и где есть? И вскую сице остависте человека? Призовите убо его, да яст хлеб.

2:21  Вселися же Моисей у человека: и даде Сепфору дщерь свою Моисею в жену.

2:22  Во чреве же заченши жена роди сына, и нарече Моисей имя ему Гирсам, глаголя: яко пришлец есмь в земли чуждей. Еще же заченши роди сына втораго, и нарече имя ему Елиезер, глаголя: Бог бо отца моего помощник мой и избави мя из руки фараоновы.

2:23  По днех же многих тех, умре царь Египетский, и возстенаша сынове Израилевы от дел и возопиша, и взыде вопль их к Богу от дел.

2:24  И услыша Бог стенание их: и помяну Бог завет Свой иже ко Аврааму и Исааку и Иакову,

2:25  и призре Бог на сыны Израилевы, и познан бысть ими.