CSlElizabeth - Exodus - 18

18:1  Услыша же Иофор, иерей Мадиамский, тесть Моисеов, вся, елика сотвори Господь Израилю Своим людем, яко изведе Господь Израиля из Египта:

18:2  и поя Иофор, тесть Моисеов, Сепфору, жену Моисеову, по отпущении ея,

18:3  и два сына ея: имя единому от них Гирсам, глаголя: пришлец бых в земли чуждей,

18:4  и имя второму Елиезер, глаголя: Бог бо отца моего помощник мой и избави мя из руки фараони.

18:5  И прииде Иофор, тесть Моисеов, и сынове и жена к Моисею в пустыню, идеже ополчися при горе Божией.

18:6  Возвестиша же Моисею, глаголюще: се, Иофор, тесть твой, идет к тебе, и жена твоя, и оба сына твоя с ним.

18:7  Изыде же Моисей во сретение тестю своему и поклонися ему и целова его, и приветствоваша друг друга: и введе их Моисей в кущу.

18:8  И поведа Моисей тестю своему вся, елика сотвори Господь фараону и всем Египтяном Израиля ради, и весь труд бывший им на пути, и яко избави их Господь от руки фараони и от руки Египетския.

18:9  Ужасеся же Иофор о всех благих, яже сотвори им Господь, яко избави их Господь от руки Египетския и от руки фараони,

18:10  и рече Иофор: благословен Господь, яко избави люди Своя из руки Египетския и из руки фараони:

18:11  ныне уведех, яко велик Господь паче всех богов, сего ради, яко налегоша на них.

18:12  И взя Иофор тесть Моисеов всесожжения и жертвы Богу: прииде же Аарон и вси старцы Израилевы ясти хлеба с тестем Моисеовым пред Богом.

18:13  И бысть на утрие, седе Моисей судити люди: стояху же пред Моисеом вси людие от утра до вечера.

18:14  Видев же Иофор вся, елика творяше людем, рече: что сие, еже ты твориши людем? Почто ты един седиши, вси же людие предстоят тебе от утра до вечера?

18:15  Рече же Моисей тестю: понеже приходят людие ко мне просити суда от Бога:

18:16  егда бо бывает им распря, и приходят ко мне, разсуждаю коемуждо и сказую им повеления Божия и закон Его.

18:17  Рече же тесть Моисеов к нему: не право ты твориши глагол сей:

18:18  трудом утрудишися несносным и ты, и вси людие сии, иже суть с тобою: тяжек тебе глагол сей, не возможеши творити ты един:

18:19  ныне убо послушай мене и присоветую тебе, и будет Бог с тобою: буди ты людем в тех яже к Богу, и донесеши словеса их к Богу,

18:20  и засвидетелствуй им повеления Божия и закон Его, и повеждь им пути Его, имиже пойдут, и дела, яже сотворят:

18:21  ты же усмотри себе от всех людий мужы сильны, Бога боящыяся, мужы праведны, ненавидящыя гордости, и поставиши их над ними тысященачалники и стоначалники, и пятьдесятоначалники и десятоначалники и писмовводители,

18:22  и судят людий по вся часы: слово же неудоборешителное донесут к тебе: малыя же суды да судят они, и облегчат тя и спомогут тебе:

18:23  аще слово сие сотвориши, укрепит тя Бог, и возможеши настоятелствовати, и вси людие сии приидут во свое место с миром.

18:24  Послуша же Моисей гласа тестя своего и сотвори вся, елика рече ему:

18:25  и избра Моисей мужы сильны от всего Израиля, и сотвори я над ними тысященачалники и стоначалники, и пятьдесятоначалники и десятоначалники и писмовводители:

18:26  и суждаху людем по вся часы: всякое же слово неудоборешителное доносиша к Моисею, всякое же слово легкое суждаху сами.

18:27  Отпусти же Моисей тестя своего, и отиде в землю свою.