CSlElizabeth - Exodus - 21

21:1  И сия оправдания, яже да положиши пред ними:

21:2  аще стяжеши раба Евреина, шесть лет да поработает тебе, в седмое же лето отпустиши его свободна туне:

21:3  аще сам един внидет, то един и изыдет: аще же жена внидет с ним, то и жена отидет с ним:

21:4  аще же господин даст ему жену, и родит ему сыны или дщери, жена и дети да будут господину его, сам же един да отидет.

21:5  Аще же отвещав раб речет: возлюбих господина моего и жену мою и дети моя, не отхожду свободен:

21:6  да приведет его господин его пред судище Божие, и тогда приведет его пред двери на праг, и да провертит ему ухо господин его шилом, и да поработает ему во веки.

21:7  Аще же кто продаст свою дщерь в рабыню, да не отидет, якоже отходят рабыни:

21:8  аще не угодит пред очима господина своего, юже он взяти в жену обеща, да отпустит ю: языку же чуждему господин да не продаст ея, понеже отверже ю:

21:9  аще же сыну своему обещал ю, по обыкновению дщерей да сотворит ей:

21:10  аще же другую поймет себе, потребных и одежд и союбщения ея да не лишит:

21:11  аще же сих трех не сотворит ей, да отидет без сребра туне.

21:12  И аще кого кто ударит, и умрет, смертию да умрет (и той):

21:13  аще же не хотя, но Бог предаде в руце его, дам тебе место, в неже убежит тамо убивый:

21:14  аще же кто приложит убити ближняго своего лестию и прибегнет ко олтарю, от олтаря Моего да возмеши того умертвити.

21:15  Иже биет отца своего или матерь свою, смертию да умрет.

21:16  Иже злословит отца своего или матерь свою, смертию да умрет.

21:17  Аще кто кого украдет от сынов Израилевых, и соодолев сему продаст его, и обрящется у него, смертию да скончается.

21:18  Аще же сварятся два мужа, и ударит един другаго каменем или пястию, и не умрет, но сляжет на одре:

21:19  аще востав человек походит вне о жезле, неповинен будет ударивый его: точию за неделание его да даст цену и на цельбу.

21:20  Аще же кто ударит раба своего или рабу свою жезлом, и умрет от руки его, судом да отмстится:

21:21  аще же преживет день един или два, да не мстится: сребро бо его есть.

21:22  Аще же биются два мужа, и поразят жену непраздну, и изыдет младенец ея неизображен, тщетою да отщетится: якоже наложит муж жены тоя, подобающее да отдаст:

21:23  аще же изображен будет, да даст душу за душу,

21:24  око за око, зуб за зуб, руку за руку, ногу за ногу,

21:25  жжение за жжение, язву за язву, вред за вред.

21:26  Аще же кто исткнет око рабу своему или око рабыни своей и ослепит, свободны да отпустит я за око их:

21:27  аще же зуб рабу своему или зуб рабе своей избиет, свободны да отпустит я за зуб их.

21:28  Аще же вол убодет мужа или жену, и умрет, камением да побиется вол той, и да не снедят мяса его, господин же вола неповинен будет:

21:29  аще же вол бодлив будет прежде вчерашняго и третияго дне, и возвестят господину его, и не заключит его, и убиет мужа или жену: вол камением да побиется, и господин его купно да умрет:

21:30  аще же окуп наложится ему, да даст окуп за душу свою, елико наложат ему:

21:31  аще же сына или дщерь убодет, по сему же суду да сотворят ему:

21:32  аще же раба или рабу убодет вол, сребра тридесять дидрахм да даст господину их, и вол камением да побиется.

21:33  Аще же кто отверзет яму или ископает яму и не покрыет ея, и впадется в ню телец или осля,

21:34  господин ямы отдаст (цену), сребро даст господину их: умершее же ему да будет.

21:35  Аще же чий вол убодет вола ближняго, и умрет, да продадут вола живаго, и да разделят цену его, и вола умершаго да разделят:

21:36  аще же знаемь есть вол, яко бодлив есть прежде вчерашняго и третияго дне, и глаголаша господину его, и той не заключит его: да отдаст вола за вола, мертвый же ему да будет.