Kekchi - I Chronicles - 18

18:1  Mokon chic li rey David quipletic cuiˈchic riqˈuineb laj filisteo ut quinumta saˈ xbe̱neb. Quirisi xcuanquileb ut quixmakˈ chiruheb li tenamit Gat joˈ eb ajcuiˈ li cocˈ cˈaleba̱l cuanqueb chi xjun sutam.

18:2  Ut quinumta ajcuiˈ saˈ xbe̱neb laj Moab. Queˈcana rubel xcuanquil laj David ut queˈxtoj rix lix naˈajeb.

18:3  Ut quinumta ajcuiˈ laj David saˈ xbe̱neb laj Hadad-ezer, lix reyeb laj Soba aran Hamat nak yo̱ raj chi xic chixxakabanquil lix cuanquil saˈ li naˈajej li cuan chire li nimaˈ Eufrates.

18:4  Laj David quixchapeb jun mil li carruaje ut quixchapeb ajcuiˈ cuukub mil (7,000) lix solda̱deb li nequeˈxic chirix cacua̱y. Ut quixchapeb ajcuiˈ junmay mil (20,000) li soldado li nequeˈxic chi rokeb. Quixtok li rokeb chixjunileb lix cacua̱yeb. Abanan incˈaˈ quixtok rokeb li cacua̱y li joˈ qˈuial li teˈcˈanjelak re xquelonquil li jun ciento chi carruaje.

18:5  Eb laj Siria li cuanqueb Damasco queˈchal chixtenkˈanquil laj Hadad-ezer lix reyeb laj Soba. Abanan laj David quinumta saˈ xbe̱neb laj Siria ut quixcamsiheb cuib xcaˈcˈa̱l mil (22,000) chi cui̱nk.

18:6  Chirix aˈan laj David quixyi̱b xnaˈajeb li soldados re teˈcˈacˈale̱nk saˈ li tenamit Damasco li cuan saˈ xcue̱nt Siria. Ut eb laj Siria queˈcana rubel xcuanquil ut queˈxtoj rix lix naˈajeb. Yalak bar co̱ chi pletic laj David, li Ka̱cuaˈ quitenkˈan re re nak us qui-el.

18:7  Laj David quixxoc li chˈi̱chˈ oro li nequeˈxcol cuiˈ re xchˈo̱leb li queˈtaklan saˈ xbe̱neb lix soldados laj Hadad-ezer ut quixcˈameb Jerusalén.

18:8  Ut saˈ li cuib chi tenamit Tibhat ut Cun, li queˈcuan rubel xcuanquil laj Hadad-ezer li rey David quixxoc nabal li chˈi̱chˈ bronce. Ut riqˈuin li chˈi̱chˈ aˈan, laj Salomón quixyi̱b li nimla pila bronce, ut li okech joˈ eb ajcuiˈ li secˈ li queˈcˈanjelac saˈ lix templo li Dios.

18:9  Ut laj Toi, lix reyeb li cuanqueb saˈ li tenamit Hamat, quirabi resil nak laj David quinumta saˈ xbe̱neb chixjunileb lix soldado laj Hadad-ezer, lix reyeb laj Soba.

18:10  Joˈcan nak quixtakla laj Adoram li ralal re nak tixqˈue xsahil xchˈo̱l laj David ut tixye re nak sa saˈ xchˈo̱l laj Toi nak laj David quinumta saˈ xbe̱neb laj Hadad-ezer. Laj Toi quixtakla xma̱tan laj David yi̱banbil riqˈuin bronce, oro, ut plata. Laj Toi ac quipletic riqˈuin laj Hadad-ezer. Joˈcan nak quisahoˈ saˈ xchˈo̱l nak laj David quinumta saˈ xbe̱n.

18:11  Li rey David quixkˈaxtesiheb li ma̱tan aˈan chiru li Ka̱cuaˈ rochben li oro ut li plata li quire̱chani nak quipletic riqˈuineb laj Edom, eb laj Moab, eb laj Amón, eb laj filisteo, ut eb laj Amalec.

18:12  Joˈcan ajcuiˈ laj Abisai lix yum lix Sarvia. Quixcamsiheb cuakxaklaju mil (18,000) laj Edom saˈ li ru takˈa li cuan cuiˈ li atzˈam.

18:13  Li rey David quixyi̱b lix naˈajeb lix soldado saˈ chixjunileb li naˈajej Edom. Ut eb li cuanqueb aran queˈcana rubel xcuanquil laj David. Li Ka̱cuaˈ quitenkˈan re laj David chi numta̱c saˈ xbe̱neb li quicuulac cuiˈ chi pletic.

18:14  Laj David quicuan chokˈ xreyeb laj Israel ut junelic quitaklan saˈ xya̱lal ut saˈ ti̱quilal saˈ xbe̱neb chixjunileb lix tenamit.

18:15  Li nataklan saˈ xbe̱neb li soldado, aˈan laj Joab, xyum lix Sarvia. Ut laj Josafat, ralal laj Ahilud, aˈan li quitzˈi̱ban re li cˈaˈru quicˈulman.

18:16  Laj Sadoc, ralal laj Ahitob, ut laj Abimelec, ralal laj Abiatar, aˈaneb laj tij. Ut laj Savsa, aˈan laj tzˈi̱b.

18:17  Laj Benaía, li ralal laj Joiada, aˈan li quitaklan saˈ xbe̱neb laj cereteo ut eb laj peleteo. Eb li ralal laj David, aˈaneb li ni̱nkeb xcuanquil saˈ xya̱nkeb.