Kekchi - I Chronicles - 15

15:1  Laj David quixtakla xyi̱banquileb li rochoch Jerusalén, li nequeˈxye “Xtenamit laj David” re. Quixyi̱b ajcuiˈ li naˈajej re ta̱cua̱nk cuiˈ lix Lokˈlaj Ca̱x li Dios ut quixyi̱b li muheba̱l.

15:2  Ut laj David quixye: —Lix Lokˈlaj Ca̱x li Ka̱cuaˈ incˈaˈ naru nacˈameˈ xban yalak ani. Caˈaj eb cuiˈ laj levita naru nequeˈcˈamoc re xban nak aˈaneb li queˈsiqˈueˈ ruheb xban li Ka̱cuaˈ chixcˈambal li Lokˈlaj Ca̱x ut chi cˈanjelac chiru chi junelic, chan.

15:3  Laj David quixchˈutubeb chixjunileb laj Israel aran Jerusalén re nak teˈxcˈam lix Lokˈlaj Ca̱x li Ka̱cuaˈ saˈ li naˈajej li quixyi̱b laj David.

15:4  Ut quixchˈutubeb ajcuiˈ li ralal xcˈajol laj Aarón ut eb laj levita. Aˈaneb aˈin li quixchˈutubeb.

15:5  Saˈ xya̱nkeb li ralal xcˈajol laj Coat cuanqueb jun ciento riqˈuin junmay (120) chi cui̱nk rechˈalaleb rib. Laj Uriel, aˈan li nataklan saˈ xbe̱neb.

15:6  Saˈ xya̱nkeb li ralal xcˈajol laj Merari cuanqueb cuib ciento riqˈuin junmay (220) chi cui̱nk rechˈalaleb rib. Laj Asaías, aˈan li nataklan saˈ xbe̱neb.

15:7  Saˈ xya̱nkeb li ralal xcˈajol laj Gersón, cuanqueb jun ciento riqˈuin laje̱b xcaˈcˈa̱l (130) chi cui̱nk rechˈalaleb rib. Laj Joel, aˈan li nataklan saˈ xbe̱neb.

15:8  Saˈ xya̱nkeb li ralal xcˈajol laj Elizafán, cuanqueb cuib ciento (200) chi cui̱nk rechˈalaleb rib. Laj Semaías, aˈan li nataklan saˈ xbe̱neb.

15:9  Saˈ xya̱nkeb li ralal xcˈajol laj Hebrón, cuanqueb ca̱cˈa̱l (80) chi cui̱nk rechˈalaleb rib. Laj Eliel, aˈan li nataklan saˈ xbe̱neb.

15:10  Saˈ xya̱nkeb li ralal xcˈajol laj Uziel, cuanqueb jun ciento riqˈuin cablaju (112) chi cui̱nk. Laj Aminadab, aˈan li nataklan saˈ xbe̱neb.

15:11  Laj David quixtakla xbokbaleb riqˈuin eb laj tij ut eb laj levita. Eb laj tij, aˈaneb laj Zadoc ut laj Abiatar. Ut eb laj levita, aˈaneb laj Uriel, laj Asaías, laj Joel, laj Semaías, laj Eliel, ut laj Aminadab.

15:12  Quixye reheb: —La̱ex laj cˈamol be chiruheb laj levita. Santobresihomak e̱rib la̱ex ut santobresihomakeb ajcuiˈ laj levitas, le̱ rechˈalal, re nak naru te̱numsi lix Lokˈlaj Ca̱x li Ka̱cuaˈ li kaDios la̱o aj Israel saˈ li naˈajej li xinyi̱b.

15:13  Xban nak ma̱cuaˈ la̱ex li quexcˈamoc re li Lokˈlaj Ca̱x xbe̱n cua, joˈcan nak cuan li quicamsi̱c xban li Ka̱cuaˈ. Incˈaˈ kapatzˈ re chanru takaba̱nu, chan.

15:14  Joˈcan nak eb laj tij ut eb laj levita queˈxsantobresi ribeb re nak naru teˈxcˈam lix Lokˈlaj Ca̱x li Ka̱cuaˈ lix Dioseb laj Israel.

15:15  Eb laj tij, li ralal xcˈajol laj Leví, queˈxcˈam lix Lokˈlaj Ca̱x li Dios chi pakpo saˈ xbe̱neb xtel riqˈuin li cheˈ li nequeˈxpako cuiˈ joˈ quiyeheˈ re laj Moisés xban li Dios.

15:16  Ut laj David quixye reheb li nequeˈcˈamoc be saˈ xya̱nkeb laj levita nak teˈxsicˈ ruheb saˈ xya̱nkeb li rechˈalal li teˈbicha̱nk chi sa saˈ xchˈo̱leb ut teˈxchˈeˈ li arpa, li salterio ut li sursu̱quil chˈi̱chˈ.

15:17  Eb laj levita queˈxxakab laj Hemán li ralal laj Joel. Ut queˈxxakab ajcuiˈ laj Asaf li ralal laj Berequías. Aˈan xcomoneb laj Hemán. Ut saˈ xya̱nkeb li ralal xcˈajol laj Merari queˈxxakab laj Etán li ralal laj Cusaías.

15:18  Ut li queˈxakaba̱c chi oque̱nc saˈ li xcab chˈu̱tal, aˈan xcomoneb ajcuiˈ. Aˈaneb laj Zacarías, laj Jaaziel, laj Semiramot, laj Jehiel, laj Uni, laj Eliab, laj Benaía, laj Maasías, laj Matatías, laj Elifelehu, ut laj Micnías. Ut queˈxxakaba̱c ajcuiˈ li nequeˈcuan saˈ li oqueba̱l. Aˈaneb laj Obed-edom ut laj Jeiel.

15:19  Laj Hemán, laj Asaf ut laj Etán, aˈaneb laj bichanel li queˈxakaba̱c chixchˈeˈbal li sursu̱quil chˈi̱chˈ yi̱banbil riqˈuin bronce.

15:20  Ut eb li queˈxakaba̱c chixchˈeˈbal li xbe̱n xcuxil li bich riqˈuin li salterios, aˈaneb laj Zacarías, laj Aziel, laj Semiramot, laj Jehiel, laj Uni, laj Eliab, laj Maasías ut laj Benaía.

15:21  Ut eb li queˈxakaba̱c chixchˈeˈbal li xcab xcuxil li bich riqˈuin li arpa, aˈaneb laj Matatías, laj Elifelehu, laj Micnías, laj Obed-edom, laj Jeiel, ut laj Azazías.

15:22  Ut laj Quenanías xakabanbil chi cˈamoc be saˈ xya̱nkeb li nequeˈcuajbac xban nak aˈan naxnau chi us li cuajbac ut li bicha̱nc.

15:23  Laj Berequías ut laj Elcana, aˈaneb li queˈcˈacˈalen re li Lokˈlaj Ca̱x.

15:24  Ut eb li yo̱queb chixya̱basinquil lix trompeta chiru li Lokˈlaj Ca̱x nak yo̱queb chi xic, aˈan eb laj tij. Aˈan eb laj Sebanías, laj Josafat, laj Natanael, laj Amasai, laj Zacarías, laj Benaía ut laj Eliezer. Ut laj Obed-edom ut laj Jehías, aˈaneb ajcuiˈ li nequeˈcˈacˈalen re li Lokˈlaj Ca̱x.

15:25  Laj David ut eb li nequeˈcˈamoc be saˈ xya̱nkeb laj Israel joˈ eb ajcuiˈ li nequeˈtaklan saˈ xbe̱neb li junju̱nk chˈu̱tal chi soldado queˈco̱eb chi saheb saˈ xchˈo̱l saˈ rochoch laj Obed-edom chirisinquil lix Lokˈlaj Ca̱x li Ka̱cuaˈ.

15:26  Li Dios quitenkˈan reheb laj levita li yo̱queb chixcˈambal li Lokˈlaj Ca̱x Jerusalén. Queˈxmayeja cuukub li toro ut cuukub li carner te̱lom re xlokˈoninquil li Ka̱cuaˈ.

15:27  Li rakˈ laj David cuan chirix yi̱banbil riqˈuin li cha̱bil tˈicr lino. Joˈcaneb ajcuiˈ laj levita li yo̱queb chi pako̱nc re li Lokˈlaj Ca̱x, joˈqueb ajcuiˈ laj bichanel ut laj Quenanías. Aˈan li nacˈamoc be chiruheb laj bichanel. Laj David quirocsi ajcuiˈ li efod yi̱banbil riqˈuin lino.

15:28  Joˈcan nak chixjunileb laj Israel queˈxcˈam lix Lokˈlaj Ca̱x li Ka̱cuaˈ. Japjo̱queb re xban xsahileb saˈ xchˈo̱l. Yo̱queb chixya̱basinquil li xucub ut li trompeta ut yo̱queb chixchˈeˈbal li arpa ut li salterio ut li sursu̱quil chˈi̱chˈ.

15:29  Nak yo̱ chi cuulac saˈ lix tenamit laj David li Lokˈlaj Ca̱x, lix Mical lix rabin laj Saúl qui-iloc saˈ li ventana. Quiril nak laj David yo̱ chi piscˈoc ut yo̱ chi xajoc xban xsahil xchˈo̱l. Ut quichal xjoskˈil saˈ xbe̱n.