Kekchi - I Chronicles - 23

23:1  Ac ti̱x chic laj David. Joˈcan nak quixxakab laj Salomón li ralal chokˈ xreyeb laj Israel chok re̱kaj.

23:2  Li rey David quixtakla xchˈutubanquileb chixjunileb li nequeˈcˈamoc be saˈ xya̱nkeb laj Israel. Quixchˈutubeb ajcuiˈ laj tij ut chixjunileb laj levita.

23:3  Quixtakla rajlanquileb chixjunileb li ralal xcˈajol laj Leví li cuanqueb laje̱b xcaˈcˈa̱l chihab reheb, joˈ ajcuiˈ li numenakeb laje̱b xcaˈcˈa̱l chihab. Nak queˈajla̱c cuanqueb cuakxaklaju xcaˈcˈa̱l mil (38,000) chi cui̱nk.

23:4  Li rey David quixye nak li ca̱hib xcaˈcˈa̱l mil teˈcˈanjelak re xyi̱banquil li templo ut li cuakib mil teˈcˈanjelak chi takla̱nc ut chi rakoc a̱tin.

23:5  Ut ca̱hib mil teˈcˈacˈale̱nk saˈ eb li oqueba̱l. Ut eb li ca̱hib mil chic teˈxlokˈoni li Ka̱cuaˈ riqˈuin xchˈeˈbal li cuajb li quixqˈue chi yi̱ba̱c laj David.

23:6  Ut laj David quixjachi ruheb ut quixqˈueheb chi chˈu̱tal eb li ralal xcˈajol laj Leví, aˈ yal jarub li ralal laj Leví. Li oxib chi ralal, aˈaneb laj Gersón, laj Coat ut laj Merari.

23:7  Eb li ralal laj Gersón, aˈaneb laj Laadán ut laj Simei.

23:8  Oxibeb li ralal laj Laadán. Li xbe̱n, aˈan laj Jehiel; li xcab, aˈan laj Zetam; ut li rox, aˈan laj Joel.

23:9  Oxibeb li ralal laj Simei. Aˈaneb laj Selomit, laj Haziel, ut laj Harán. Aˈaneb li queˈtaklan saˈ xbe̱neb li ralal xcˈajol laj Laadán.

23:10  Ca̱hibeb li ralal laj Simei. Aˈaneb laj Jahat, laj Zina, laj Jeús, ut laj Bería. Aˈaneb aˈin li ca̱hib chi ralal laj Simei.

23:11  Laj Jahat, aˈan li asbej. Laj Zina, aˈan li xcab. Abanan laj Jeús ut laj Bería incˈaˈ queˈcuan nabal ralal xcˈajoleb. Joˈcan nak queˈajla̱c chi jun cabal ajcuiˈ.

23:12  Ut eb li ralal laj Coat ca̱hibeb. Aˈaneb laj Amram, laj Izhar, laj Hebrón ut laj Uziel.

23:13  Eb li ralal laj Amram, aˈan laj Aarón ut laj Moisés. Laj Aarón, joˈ eb ajcuiˈ li ralal xcˈajol, aˈaneb li queˈsiqˈueˈ ruheb chi cˈanjelac chi junelic chiru li Dios chokˈ aj tij re xba̱nunquil li santil cˈanjel li kˈaxal lokˈ. Queˈxakaba̱c chixcˈatbal li incienso ut chi cˈanjelac chiru li Ka̱cuaˈ ut chixtzˈa̱manquil chiru li Ka̱cuaˈ nak ta̱rosobtesiheb li tenamit.

23:14  Eb li ralal xcˈajol laj Moisés, laj cˈanjel chiru li Dios, ajlanbileb saˈ xya̱nkeb li ralal xcˈajol laj Leví.

23:15  Eb li ralal laj Moisés, aˈaneb laj Gersón ut laj Eliezer.

23:16  Li xbe̱n ralal laj Gersón, aˈan laj Sebuel li nacˈamoc be.

23:17  Ut li ralal laj Eliezer, aˈan laj Rehabías li nacˈamoc be. Laj Eliezer incˈaˈ chic quicuan ralal xcˈajol. Abanan laj Rehabías, aˈan nabal li ralal xcˈajol queˈcuan.

23:18  Li xbe̱n ralal laj Izhar, aˈan laj Selomit, li nacˈamoc be.

23:19  Aˈaneb aˈin li ralal laj Hebrón: li xbe̱n, aˈan laj Jerías; li xcab, aˈan laj Amarías; li rox, aˈan laj Jahaziel; ut li xca̱, aˈan laj Jecamán.

23:20  Cuibeb li ralal laj Uziel. Li xbe̱n, aˈan laj Micaía li nacˈamoc be. Ut li xcab, aˈan laj Isías.

23:21  Eb li ralal laj Merari, aˈaneb laj Mahli ut laj Musi. Ut li ralal laj Mahli, aˈaneb laj Eleazar ut laj Cis.

23:22  Laj Eleazar quicam. Ut ma̱ jun li ralal quicuan. Caˈaj cuiˈ xrabin queˈcuan. Ut eb li ralal laj Cis quixcˈameb chokˈ rixakileb. Aˈaneb rechˈalaleb rib.

23:23  Oxibeb li ralal laj Musi. Aˈaneb laj Mahli, laj Edar ut laj Jeremot.

23:24  Aˈaneb aˈin li ralal xcˈajol laj Leví aˈ yal chanru xqˈuialeb li ralal xcˈajol. Queˈtzˈi̱ba̱c xcˈabaˈeb nak queˈajla̱c. Aˈaneb li queˈcˈamoc be. Eb aˈan cuanqueb junmay chihab re joˈ ajcuiˈ li ac numenakeb junmay chihab. Chixjunileb aˈin queˈcˈanjelac saˈ lix templo li Ka̱cuaˈ.

23:25  Laj David quixye: —Li Ka̱cuaˈ li kaDios la̱o aj Israel xoxqˈue chi cua̱nc saˈ tuktu̱quil usilal. Ut aˈan ta̱cua̱nk arin Jerusalén chi junelic, chan.

23:26  Chi joˈcan eb laj levita incˈaˈ chic tento nak teˈxcˈam yalak bar lix tabernáculo li Ka̱cuaˈ, chi moco li cˈaˈru nacˈanjelac saˈ li tabernáculo, chan laj David.

23:27  Ut qui-uxman joˈ quixye laj David nak quixrak lix cˈanjel. Queˈajla̱c chixjunileb li ralal xcˈajol laj Leví li cuanqueb junmay chihab re joˈ eb ajcuiˈ li ac numenakeb junmay.

23:28  Eb li ralal xcˈajol laj Leví queˈcanaba̱c saˈ xcue̱nteb li ralal xcˈajol laj Aarón chi cˈanjelac saˈ lix templo li Ka̱cuaˈ. Cuan queˈcanaba̱c chi cˈanjelac saˈ li neba̱l ut cuanqueb ajcuiˈ li queˈxakaba̱c chi cˈanjelac saˈ eb li naˈajej li cuan cuiˈ li cˈaˈak re ru li nacˈanjelac saˈ li templo. Ut teˈcˈanjelak ajcuiˈ re xsantobresinquil li cˈaˈru nacˈanjelac saˈ li templo. Teˈxba̱nu chixjunil li cˈanjel saˈ lix templo li Dios.

23:29  Aˈaneb li teˈilok re li caxlan cua li naqˈueheˈ saˈ li me̱x ut li cˈaj li nacˈanjelac re li mayej re li ru li acui̱mk. Aˈaneb ajcuiˈ teˈilok re li xyi̱banquil li caxlan cua li ma̱cˈaˈ xchˈamal. Aˈaneb li teˈilok re li mayej li yi̱banbil saˈ li xartin joˈ ajcuiˈ li xbisbal li mayej li ta̱mayeja̱k saˈ lix templo li Dios.

23:30  Rajlal ekˈela ut rajlal ecuu teˈlokˈoni̱nk ut teˈbantioxi̱nk chiru li Ka̱cuaˈ.

23:31  Aˈaneb li teˈcˈatok re li mayejanbil xul chiru li Ka̱cuaˈ saˈ eb li hiloba̱l cutan joˈ ajcuiˈ nak nequeˈxninkˈei lix yoˈlajic li po, joˈ ajcuiˈ saˈ eb li ninkˈe li jun chˈol chic. Ac chˈolchˈo jarubeb li teˈxba̱nu li cˈanjel ut jokˈe teˈcˈanjelak li junju̱nk. Rajlal teˈxba̱nu li cˈanjel aˈan chiru li Ka̱cuaˈ, chan.

23:32  Eb li ralal xcˈajol laj Leví, aˈan eb li queˈiloc re lix templo li Dios joˈ ajcuiˈ li Santil Naˈajej. Nak yo̱queb chi cˈanjelac saˈ li templo, cuanqueb rubel xcuanquil li ralal xcˈajol laj Aarón, li rechˈalaleb.