Kapingamarangi - I John - 5

5:1  Be koai-hua dela e-hagadonu bolo Jesus la-go di Mesaia, geia di tama ni God. Ma koai dela e-aloho i Tamana, geia e-aloho labelaa i Tama.

5:2  Deenei di hai ga-iloo bolo gidaadou e-aloho i-nia dama a God: gidaadou e-aloho i God ge e-daudali ana haganoho.

5:3  Di aloho i God la-go tadau daudali ana haganoho. Ana haganoho la-hagalee haingadaa.

5:4  Idimaa, nia dama a God huogodoo e-mee di-haga-magedaa henuailala. Gei gidaadou e-haga-magedaa henuailala gi tadau hagadonu.

5:5  Ma koai dela e-mee di-haga-magedaa henuailala? Go tangada hua dela e-hagadonu a Jesus, bolo Mee Tama ni God.

5:6  Jesus Christ go Tama a God ne-hanimoi e-haga-modongoohia go nia wai o dono babdais mo-di hali ono dodo. Hagalee go nia wai la-hua, nia wai mo ono dodo. Di Hagataalunga-Dabu e-haga-modongoohia di mee deenei, bolo e-donu, idimaa, di Hagataalunga le e-donu.

5:7  Nia hagadootonu o Jesus le e-dolu:

5:8  di Hagataalunga, nia wai, mo nia dodo. Nia mee e-dolu aanei e-haga-modongoohia di mee e-dahi.

5:9  Gidaadou e-hagadonu nia haga-modongoohia mai baahi nia daangada, gei nia haga-modongoohia a God i-di gili dana Dama la-koia e-maaloo.

5:10  Tangada ma-ga-hagadonu Tama a God, gei di haga-modongoohia deenei la i ono lodo. Gei tangada dela hagalee hagadonu a God, geia ne-haga-tilikai a God, idimaa, ia hagalee hagadonu di haga-modongoohia a God ne-hai i-di gili dana Dama.

5:11  Di haga-modongoohia la-deenei: God gu-gaamai di mouli dee-odi, gei di mouli deenei la i-baahi dana Dama.

5:12  Maa tangada e-hai-mee gi Tama, geia e-hai-mee gi-di mouli deenei. Maa tangada hagalee hai-mee gi Tama a God, geia dono mouli ai.

5:13  Au e-hihi-adu gi goodou ala gu-hagadonu di ingoo Tama a God, bolo gi-iloo bolo goodou e-hai-mee gi-di mouli dee-odi.

5:14  Dela tadau mee ga-dee-mmaadagu ai gidaadou i-mua o God, idimaa, gidaadou e-hagadonu bolo Mee e-longono tadau dangidangi, maa gidaadou ga-tangi-anga be dana hiihai.

5:15  Maa gidaadou ga-hagadonu bolo Mee e-longono tadau dangidangi i-nia mee huogodoo, gei gidaadou ga-iloo labelaa bolo Mee e-dugu-mai gi gidaadou tadau mee ala e-tangi-ai.

5:16  Maa tangada gaa-mmada gi dono duaahina e-hai di huaidu dela hagalee hidi-ai di made, geia gi-dalodalo ang-gi God, gi-dugu-anga gi mee di mouli. Di-mee deenei ang-gi digau nadau huaidu i-golo, gei nadau huaidu ga-hagalee dagi ginaadou gi-di made. Gei di-maa di huaidu i-golo dela e-hidi-ai di made, gei au hagalee hai-adu gi goodou bolo gi-dalodalo ang-gi God i-di huaidu deelaa.

5:17  Nia haihai-hala huogodoo la nia huaidu, gei di-maa di huaidu i-golo e-hagalee dagi gi-di made.

5:18  Gidaadou gu-iloo bolo tangada dela guu-hai di tama a God, la-hagalee haihai di huaidu, idimaa, Tama a God e-madamada humalia i mee, gei di huaidu e-deemee di-tale gi mee.

5:19  Gidaadou gu-iloo bolo gidaadou nia dama ni God, ma e-aha maa henuailala hagatau la-gu-i-lala nia mogobuna o tangada huaidu.

5:20  Gidaadou gu-iloo bolo di Tama a God la-ne-hanimoi, ne-hai gidaadou gi-iloo nia mee, bolo gidaadou gi-iloo di God e-donu. Gidaadou gu-hagadaubuni ang-gi di God e-donu, i tadau mouli hagadaubuni gi dana Dama go Jesus Christ. Deenei di God donu, ge deenei di mouli dee-odi.

5:21  Agu dama-nei, haga-mogowaa-ina goodou gi-daha mo nia balu-god tilikai!