SPVar - Leviticus - 2

2:1  ונפש כי תקריב קרבן מנחה ליהוה סלת יהיה קרבנו ויצק עליה שמן ונתן עליה לבונה מנחה היא

2:2  והביאה אל בני אהרן הכהנים וקמץ ממנה מלוא קמצו מסלתה ומשמנה על כל לבונתה והקטיר הכהן את אזכרתה המזבחה אשה ריח ניחח ליהוה

2:3  והנותרת מן המנחה לאהרן ולבניו קדש קדשים מאשי יהוה

2:4  וכי תקריב קרבן מנחה מאפה תנור סלת חלות מצות בללות בשמן ורקיקי מצות משחים בשמן

2:5  ואם מנחה על מחבת קרבנך סלת בלולה בשמן מצה תהיה

2:6  פתת אתה פתים ויצקת עליה שמן מנחה היא

2:7  ואם מנחה מרחשת קרבנך סלת בשמן תעשה

2:8  והבאת את המנחה אשר יעשה מאלה ליהוה והקריבה אל הכהן והגישה אל המזבח

2:9  והרים הכהן מן המנחה את אזכרתה והקטיר המזבחה אשה ריח ניחח ליהוה

2:10  והנותרת מן המנחה לאהרן ולבניו קדש קדשים מאשי יהוה

2:11  כל המנחה אשר תקריבו ליהוה לא תעשה חמץ כי כל שאר וכל דבש לא תקריבו ממנו אשה ליהוה

2:12  קרבן ראשית תקריבו אתם ליהוה ואל המזבח לא יעלו לריח ניחח

2:13  וכל קרבן מנחתך במלח תמלח ולא תשבית מלח ברית אלהיך מעל מנחתך על כל קרבנך תקריב מלח

2:14  ואם תקריב מנחת בכרים ליהוה אביב קלי באש גרש כרמל תקריב את מנחת בכריך

2:15  ונתתה עליה שמן ושמת עליה לבונה מנחה היא

2:16  והקטיר הכהן את אזכרתה מגרשה ומשמנה על כל לבונתה אשה ליהוה