SPVar - Leviticus - 25

25:1  וידבר יהוה אל משה בהר סיני לאמר

25:2  דבר אל בני ישראל ואמרת אליהם כי תבאו אל הארץ אשר אני נתן לכם ושבתה הארץ שבת ליהוה

25:3  שש שנים תזרע שדך ושש שנים תזמר כרמך ואספת את תבואתה

25:4  ובשנה השביעת שבת שבתון יהיה לארץ שבת ליהוה שדך לא תזרע וכרמך לא תזמר

25:5  ואת ספחי קצירך לא תקצר ואת ענבי נזירך לא תבצר שנת שבתון יהיה לארץ

25:6  והיתה שבת הארץ לכם לאכלה לך ולעבדיך ולאמהתיך ולשכיריך ולתושביך הגרים עמך

25:7  ולבהמתך ולחיה אשר בארצך תהיה כל תבואתה לאכל

25:8  וספרת לך שבע שבתות שנים שבע שנים שבע פעמים והיו לך ימי שבע שבתות השנים תשע וארבעים שנה

25:9  והעברת שופר תרועה בחדש השביעי בעשור לחדש ביום הכפרים תעבירו שופר בכל ארצכם

25:10  וקדשתם את שנת החמשים שנה וקראתם דרור בארץ לכל ישביה יובל הוא תהיה לכם ושבתם איש אל אחזתו ואיש אל משפחתו תשבו

25:11  יובל הוא שנת החמשים שנה תהיה לכם לא תזרעו ולא תקצרו את ספחיה ולא תבצרו את נזריה

25:12  כי יובל הוא קדש תהיה לכם מן השדה תאכלו את תבואתה

25:13  בשנת היובל הזאת תשבו איש אל אחזתו

25:14  וכי תמכר ממכר לעמיתך או קנה מיד עמיתך אל תונו איש את אחיו

25:15  במספר שנים אחר היובל תקנה מאת עמיתך במספר שני תבואת ימכר לך

25:16  לפי רב השנים תרבה מקנתו ולפי מעט השנים תמעיט מקנתו כי מספר תבואת הוא מכר לך

25:17  ולא תונו איש את עמיתו ויראת מאלהיך כי אני יהוה אלהיכם

25:18  ועשיתם את חקתי ואת משפטי תשמרו ועשיתם אתם וישבתם על הארץ לבטח

25:19  ונתנה הארץ פריה ואכלתם לשבע וישבתם לבטח עליה

25:20  וכי תאמרו מה נאכל בשנה השביעית הן לא נזרע ולא נאסף את תבואתנו

25:21  וצויתי את ברכתי לכם בשנה הששית ועשתה את תבואתה לשלש השנים

25:22  וזרעתם את השנה השמינית ואכלתם מן התבואתה ישן עד השנה התשעית עד בא תבואתה תאכלו ישן

25:23  והארץ לא תמכר לצמיתת כי לי הארץ כי גרים ותושבים אתם עמדי

25:24  ובכל ארץ אחזתכם גאלה תתנו לארץ

25:25  וכי ימך אחיך ומכר מאחזתו ובא גאלו הקרוב אליו וגאל את ממכר אחיו

25:26  ואיש כי לא יהיה לו גאל והשיגה ידו ומצא כדי גאלתו

25:27  וחשב את שני ממכרו והשיב את העדף לאיש אשר מכר לו ושב לאחזתו

25:28  ואם לא מצא ידו די השיב לו והיה ממכרו ביד הקנה אתו עד שנת היובל ויצא ביובל ושב לאחזתו

25:29  ואיש כי ימכר בית מושב עיר חומה והיתה גאלתו עד תם שנת ממכרו ימים תהיה גאלתו

25:30  ואם לא יגאל עד מלאת לו שנה תמימה וקם הבית אשר בעיר אשר לו חומה לצמיתת לקנה אתו לדרתיו לא יצא ביובל

25:31  ובתי החצרים אשר אין להם חומה סביב על שדה הארץ יחשבו גאלה תהיה לו וביובל יצא

25:32  וערי הלוים בתי ערי אחזתם גאלת עולם תהיה ללוים

25:33  ואשר יגאל מן הלוים ויצא ממכר בית ועיר אחזתו ביובל כי בתי ערי הלוים היא אחזתם בתוך בני ישראל

25:34  ושדה מגרש עריהם לא ימכרו כי אחזת עולם היא להם

25:35  וכי ימך אחיך ומטה ידו עמך וחזקת בו גר ותושב וחי אחיך עמך

25:36  אל תקח מאתו נשך ותרבית ויראת מאלהיך וחי אחיך עמך

25:37  את כספך לא תתן לו בנשך ובתרבית לא תתן אכלך

25:38  אני יהוה אלהיכם אשר הוצאתי אתכם מארץ מצרים לתת לכם את ארץ כנען להיות לכם לאלהים

25:39  וכי ימך אחיך עמך ונמכר לך לא תעבד בו עבדת עבד

25:40  כשכיר כתושב יהיה עמך עד שנת היובל יעבד עמך

25:41  ויצא מעמך הוא ובניו עמו ושב אל משפחתו ואל אחזת אבתיו ישוב

25:42  כי עבדי הם אשר הוצאתי אתם מארץ מצרים לא ימכרו ממכרת עבד

25:43  לא תרדה בו בפרך ויראת מאלהיך

25:44  ועבדיך ואמהתיך אשר יהיו לך מאת הגוים אשר סביבתיכם מהם תקנהו עבד ואמה

25:45  וגם מבני התושבים הגרים עמכם מהם תקנהו וממשפחתם אשר עמכם אשר הולדו בארצכם והיו לכם לאחזה

25:46  והתנחלתם אתם לבניכם אחריכם לרשת אחזה לעלם בהם תעבדו ובאחיכם בני ישראל איש באחיו לא תרדה בו בפרך

25:47  וכי תשיג יד גר ותושב עמך ומך אחיך עמו ונמכר לגר ולתושב עמך או לעקר משפחת גר

25:48  אחרי נמכר גאלה תהיה לו אחד מאחיו יגאלנו

25:49  או דדו או בן דדו יגאלנו או משאר בשרו ממשפחתו יגאלנו או השיגה ידו ונגאל

25:50  וחשב עם קנהו משנת המכרו לו עד שנת היובל והיה כסף ממכרו במספר שנים כימי שכיר יהיה עמו

25:51  אם עוד רבות בשנים לפיהן ישיב גאלתו מכסף מקנתו

25:52  ואם מעט נשאר בשנים עד שנת היובל וחשב לו כפי שניו ישיב את גאלתו

25:53  כשכיר שנה בשנה יהיה עמו לא ירדנו בפרך לעיניך

25:54  ואם לא יגאל באלה ויצא בשנת היובל הוא ובניו עמו

25:55  כי לי בני ישראל עבדים עבדי הם אשר הוצאתי אתם מארץ מצרים אני יהוה אלהיכם