SPVar - Leviticus - 9

9:1  ויהי ביום השמיני קרא משה לאהרן ולבניו ולזקני ישראל

9:2  ויאמר אל אהרן קח לך עגל בן בקר לחטאת ואיל לעלה תמימם והקריב לפני יהוה

9:3  ואל זקני ישראל תדבר לאמר קחו שעיר עזים לחטאת ועגל וכבש בני שנה תמימם לעלה

9:4  ושור ואיל לשלמים לזבח לפני יהוה ומנחה בלולה בשמן כי היום יהוה נראה אליכם

9:5  ויקחו את אשר צוה משה אל פני אהל מועד ויקרבו כל העדה ויעמדו לפני יהוה

9:6  ויאמר משה זה הדבר אשר צוה יהוה תעשון וירא אליכם כבוד יהוה

9:7  ויאמר משה אל אהרן קרב אל המזבח ועשה את חטאתך ואת עלתך וכפר בעדך ובעד העם ועשה את קרבן העם וכפר בעדם כאשר צוה יהוה

9:8  ויקרב אהרן אל המזבח וישחט את עגל החטאת אשר לו

9:9  ויקרבו בני אהרן את הדם אליו ויטבל אצבעו בדם ויתן על קרנות המזבח ואת הדם יצק אל יסוד המזבח

9:10  ואת החלב ואת הכליות ואת היותרת מן הכבד מן החטאת הקטיר המזבחה כאשר צוה יהוה את משה

9:11  ואת הבשר ואת העור שרף באש מחוץ למחנה

9:12  וישחט את העלה וימציאו בני אהרן אליו את הדם ויזרקהו על המזבח סביב

9:13  ואת העלה המציאו אליו לנתחיה ואת הראש ויקטר המזבחה

9:14  וירחץ את הקרב ואת הכרעים ויקטר על העלה המזבחה

9:15  ויקרב את קרבן העם ויקח את שעיר החטאת אשר לעם וישחטהו ויחטאהו כראישון

9:16  ויקריב את העלה ויעשה כמשפט

9:17  ויקריב את המנחה וימלא כפיו ממנה ויקטר על המזבח מלבד עלת הבקר

9:18  וישחט את השור ואת האיל זבח השלמים אשר לעם וימציאו בני אהרן את הדם אליו ויזרקהו על המזבח סביב

9:19  ואת החלבים מן השור ומן האיל האליה והמכסה והכליות ויותרת הכבד

9:20  וישם את החלבים על החזות ויקטר החלבים המזבחה

9:21  ואת החזות ואת שוק הימין הניף אהרן תנופה לפני יהוה כאשר צוה יהוה את משה

9:22  וישא אהרן את ידו על העם ויברכם וירד מעשות החטאת והעלה והשלמים

9:23  ויבא משה ואהרן אל אהל מועד ויצאו ויברכו את העם וירא כבוד יהוה אל כל העם

9:24  ותצא אש מלפני יהוה ותאכל על המזבח את העלה ואת החלבים ויראו כל העם וירנו ויפלו על פניהם