SPVar - Leviticus - 23

23:1  וידבר יהוה אל משה לאמר

23:2  דבר אל בני ישראל ואמרת אליהם מועדי יהוה אשר תקראו אתם מקראי קדש אלה הם מועדי

23:3  ששת ימים יעשה מלאכה וביום השביעי שבת שבתון מקרא קדש כל מלאכה לא תעשו שבת היא ליהוה בכל מושבתיכם

23:4  ואלה מועדי יהוה מקראי קדש אשר תקראו אתם במועדם

23:5  בחדש הראישון בארבעה עשר יום לחדש בין הערבים פסח ליהוה

23:6  ובחמשה עשר יום לחדש הזה חג המצות ליהוה שבעת ימים מצות תאכלו

23:7  ביום הראישון מקרא קדש יהיה לכם כל מלאכת עבדה לא תעשו

23:8  והקרבתם אשה ליהוה שבעת ימים וביום השביעי מקרא קדש כל מלאכת עבדה לא תעשו

23:9  וידבר יהוה אל משה לאמר

23:10  דבר אל בני ישראל ואמרת אליהם כי תבאו אל הארץ אשר אני נתן לכם וקצרתם את קצירה והבאתם את העמר ראשית קצירכם אל הכהן

23:11  והניף את העמר לפני יהוה לרצונכם ממחרת השבת יניפנו הכהן

23:12  ועשיתם ביום הנפכם את העמר כבש תמים בן שנתו לעלה ליהוה

23:13  ומנחתו שני עשרנים סלת בלולה בשמן אשה ליהוה ריח ניחח ונסכו יין רבעית ההין

23:14  ולחם וקלי וכרמל לא תאכלו עד עצם היום הזה עד הבאכם את קרבן אלהיכם חקת עולם לדרתיכם בכל מושבתיכם

23:15  וספרתם לכם ממחרת השבת מיום הבאכם את עמר התנופה שבע שבתות תמימות תהיינה

23:16  עד ממחרת השבת השביעת תספרו חמשים יום והקרבתם מנחה חדשה ליהוה

23:17  ממושבתיכם תביאו לחם תנופה שתים חלות שני עשרנים סלת תהיינה חמץ תאפינה בכרים ליהוה

23:18  והקרבתם על הלחם שבעה כבשים תמימם בני שנה ופר בן בקר אחד ואילים שנים תמימם יהיו עלה ליהוה ומנחתם ונסכיהם אשה ריח ניחח ליהוה

23:19  ועשיתם שעיר עזים אחד לחטאת ושני כבשים בני שנה לזבח השלמים

23:20  והניף הכהן אתם על לחם הבכרים תנופה לפני יהוה על שני הכבשים קדש יהיו ליהוה לכהן

23:21  וקראתם בעצם היום הזה מקרא קדש יהיה לכם כל מלאכת עבדה לא תעשו חקת עולם בכל מושבתיכם לדרתיכם

23:22  ובקצירכם את קציר ארצכם לא תכלה פאת שדך לקצר ולקט קצירך לא תלקט לעני ולגר תעזב אתם אני יהוה אלהיכם

23:23  וידבר יהוה אל משה לאמר

23:24  דבר אל בני ישראל לאמר בחדש השביעי באחד לחדש יהיה לכם שבתון זכרון תרועה מקרא קדש

23:25  כל מלאכת עבדה לא תעשו והקרבתם אשה ליהוה

23:26  וידבר יהוה אל משה לאמר

23:27  אך בעשור לחדש השביעי הזה יום כפרים הוא מקרא קדש יהיה לכם ועניתם את נפשתיכם והקרבתם אשה ליהוה

23:28  וכל מלאכה לא תעשו בעצם היום הזה כי יום כפרים הוא לכפר עליכם לפני יהוה אלהיכם

23:29  כי כל הנפש אשר לא תענה בעצם היום הזה ונכרתה מעמיה

23:30  וכל הנפש אשר תעשה כל מלאכה בעצם היום הזה והאבדתי את הנפש ההיא מקרב עמיה

23:31  וכל מלאכה לא תעשו חקת עולם לדרתיכם בכל מושבתיכם

23:32  שבת שבתון הוא לכם ועניתם את נפשתיכם בתשעה לחדש בערב מערב עד ערב תשביתו שבתכם

23:33  וידבר יהוה אל משה לאמר

23:34  דבר אל בני ישראל לאמר בחמשה עשר יום לחדש השביעי הזה חג הסכות שבעת ימים ליהוה

23:35  ביום הראישון מקרא קדש כל מלאכת עבדה לא תעשו

23:36  שבעת ימים תקריבו אשה ליהוה ביום השמיני מקרא קדש יהיה לכם והקרבתם אשה ליהוה עצרת היא וכל מלאכת עבדה לא תעשו

23:37  אלה מועדי יהוה אשר תקראו אתם מקראי קדש להקריב אשה ליהוה עלה ומנחה זבח ונסכים דבר יום ביומו

23:38  מלבד שבתות יהוה ומלבד כל מתנתיכם ומלבד כל נדריכם ומלבד כל נדבתיכם אשר תתנו ליהוה

23:39  אך בחמשה עשר יום לחדש השביעי באספכם את תבואת הארץ תחגו את חג יהוה שבעת ימים ביום הראישון שבתון וביום השמיני שבתון

23:40  ולקחתם לכם ביום הראישון פרי עץ הדר כפות תמרים וענפי עץ עבות וערבי נחל ושמחתם לפני יהוה אלהיכם שבעת ימים

23:41  וחגתם אתו חג ליהוה שבעת ימים בשנה חקת עולם לדרתיכם בחדש השביעי תחגו אתו

23:42  בסכות תשבו שבעת ימים כל האזרח בישראל ישב בסכות

23:43  למען ידעו דרתיכם כי בסכות הושבתי את בני ישראל בהוצאי אתם מארץ מצרים אני יהוה אלהיכם

23:44  וידבר משה את מועדי יהוה אל בני ישראל