SPVar - Leviticus - 3

3:1  ואם זבח שלמים קרבנו אם מן הבקר הוא מקריב אם זכר אם נקבה תמים יקריבנו לפני יהוה

3:2  וסמך את ידו על ראש קרבנו ושחטו פתח אהל מועד וזרקו בני אהרן הכהנים את הדם על המזבח סביב

3:3  והקריב מזבח השלמים אשה ליהוה את החלב המכסה את הקרב ואת כל החלב אשר על הקרב

3:4  ואת שתי הכליות ואת החלב אשר עליהן אשר על הכסלים ואת היותרת על הכבד על הכליות יסירנה

3:5  והקטירו אתו בני אהרן המזבחה על העלה אשר על העצים אשר על האש אשר על המזבח אשה ריח ניחח ליהוה

3:6  ואם מן הצאן קרבנו לזבח השלמים ליהוה זכר או נקבה תמים יקריבנו

3:7  אם כשב הוא מקריב את קרבנו והקריב אתו לפני יהוה

3:8  וסמך את ידו על ראש קרבנו ושחט אתו לפני אהל מועד וזרקו בני אהרן את הדם על המזבח סביב

3:9  והקריב מזבח השלמים אשה ליהוה חלבו האליה תמימה לעמת העצה יסירנה את החלב המכסה את הקרב ואת כל החלב אשר על הקרב

3:10  ואת שתי הכליות ואת החלב אשר עליהן אשר על הכסלים ואת היותרת על הכבד על הכליות יסירנה

3:11  והקטיר הכהן המזבחה לחם אשה ליהוה

3:12  ואם עז קרבנו והקריבו לפני יהוה

3:13  וסמך את ידו על ראשו ושחט אתו לפני אהל מועד וזרקו בני אהרן הכהנים את דמו על המזבח סביב

3:14  והקריב ממנו קרבנו אשה ליהוה את החלב המכסה את הקרב ואת כל החלב אשר על הקרב

3:15  ואת שתי הכליות ואת החלב אשר עליהן אשר על הכסלים ואת היותרת על הכבד על הכליות יסירנה

3:16  והקטירם הכהן המזבחה לחם אשה לריח ניחח ליהוה כל חלב ליהוה

3:17  חקת עולם לדרתיכם בכל מושבתיכם כל חלב וכל דם לא תאכלו