Kapingamarangi - Numbers - 36

36:1  Nia dagi o-nia madahaanau lligi i-lodo di madahaanau damana o Gilead, go tama-daane a Machir, go tama-daane madua o Manasseh, go tama-daane a Joseph ne-hula gi Moses mo nia dagi ala i-golo.

36:2  Digaula ga-helekai, “Dimaadua ne-helekai-adu gi-di-goe bolo gi-duwwaa nia gowaa gi digau Israel i-di hudihudi. Mee gu-helekai labelaa bolo gi-wanga-ina nia gowaa o-di-madau duaahina go Zelophehad gi ana dama-ahina.

36:3  Dolomaa digaula gaa-lodo gi-nia daane o nnuai madawaawa, gei nia gowaa digaula gaa-hai nia gowaa ni-di madawaawa o-nia daane ala ne-lodo ang-gi digaula, gei di hulu o-nia gowaa ne-gaamai gi gimaadou la-ga-hogoohi.

36:4  Di ngadau dela ma-ga-gaamai gi-muli nia gowaa huogodoo ala ne-hui gi-daha gi digau nadau maa donu, gei nia gowaa o-nia dama-ahina a Zelophehad la-gaa-hai nia mee ni-di madawaawa dela ne-lodo ginai digaula, ga-hagalee hai nia mee ni di-madau madawaawa.”

36:5  Malaa, gei Moses gaa-wanga telekai deenei mai baahi Dimaadua gi digau Israel, ga-helekai, “Nnelekai di madawaawa Manasseh le e-hai donu,

36:6  gei Dimaadua ga-helekai bolo nia dama-ahina a Zelophehad e-moholo anga-hua di lodo gi-di-ingoo-hua tangada, malaa i-lodo nadau madawaawa donu la-hua.

36:7  Nia gowaa o digau Israel huogodoo ga-noho-hua beelaa i-baahi nadau madawaawa.

36:8  Nia ahina huogodoo ala gaa-donu e-hai-mee gi-nia gowaa i-lodo di madawaawa Israel, e-hai nadau lodo gi-nia daane i-lodo nadau madawaawa. Di hai deenei digau Israel huogodoo ga-hai-mee gi-nia gowaa o nadau maadua-mmaadua,

36:9  gei nia gowaa ga-hagalee hagadau i-mehanga nia madawaawa. Di madawaawa e-dahi e-duudagi-adu-hua i dana haihai-mee gi ana gowaa.”

36:10  Malaa, nia dama-ahina Zelophehad, go Mahlah, Tirzah, Hoglah, Milhah mo Noah, la-guu-hai gii-hai be nnelekai Dimaadua ang-gi Moses, digaula guu-lodo gi-nia dama-daane o-nia duaahina o nadau damana.

36:11  Malaa, nia dama-ahina Zelophehad, go Mahlah, Tirzah, Hoglah, Milhah mo Noah, la-guu-hai gii-hai be nnelekai Dimaadua ang-gi Moses, digaula guu-lodo gi-nia dama-daane o-nia duaahina o nadau damana.

36:12  Digaula guu-lodo i-lodo nia madahaanau o-di madawaawa Manasseh, tama-daane Joseph, ge nadau gowaa e-noho-hua i-lodo di madawaawa di-nadau damana.

36:13  Aanei nnaganoho Dimaadua ne-wanga gi digau Israel mai baahi Moses i-di gowaa maalama Moab, i-di baahi gi-golo di monowai Jordan e-huli-adu gi Jericho.