Kapingamarangi - Numbers - 14

14:1  Di boo dogomaalia nia daangada gu-tangitangi i-di nadau boo nadau lodo.

14:2  Digaula guu-tamu a Moses mo Aaron, e-helekai boloo, “Tadau mmade i-lodo Egypt la-koia e-humalia i tadau mmade i-lodo di anggowaa deenei!

14:3  Dimaadua e-lahi gidaadou gi-lodo tenua deelaa eiaha? Gidaadou ga-mmade-hua i-lodo tauwa, gei tadau lodo mo tadau dama gaa-kumi i tauwa. Maa nei bolo gidaadou gaa-hula gi Egypt, koia e-humalia!”

14:4  Digaula ga-daamada ga-leelee i nadau mehanga, ga-helekai boloo, “Gidaadou ga-hilihili tadau dagi e-lahi gidaadou gi Egypt.”

14:5  Moses mo Aaron ga-dogoduli gi-lala i-hongo di gelegele i-mua tagabuli damana digau Israel.

14:6  Nia daangada hagadina dogolua ala ne-hula gi tenua deelaa, go Joshua tama a Nun mo Caleb tama a Jephunneh, ga-hahaahi nau gahu i-di nau manawa-gee.

14:7  Meemaa ga-helekai gi digaula, “Tenua dela ne-hagadina, la tenua humalia huoloo.

14:8  Maa Dimaadua ga-hila-mai gi gidaadou, gei Mee gaa-dagi gidaadou gi-lodo tenua humalia deelaa, ga-gaamai gi gidaadou tenua tomo ge logo ono meegai.

14:9  Goodou hudee hai-baahi ang-gi Dimaadua, ge hudee mmaadagu i digau tenua deelaa. Ma e-hai-hua ngoohia go tadau haga-magedaa digaula, idimaa, Dimaadua e-madalia gidaadou. Mee gu-hagahuaidu nadau balu-god, ala e-abaaba digaula. Goodou hudee mmaadagu.”

14:10  Malaa, digau dogologo guu-hai di-nadau hai belee dilidili meemaa gi-nia hadu gii-mmade. Di madagoaa-hua deelaa, gei di madamada o Dimaadua gu-gila-mai i-hongo di Hale-laa deelaa.

14:11  Dimaadua ga-helekai gi Moses, “Dehee di waalooloo o digau aanei i-di-nadau haga-balumee Au? Gu-waalooloo behee di-nadau dee-hiihai e-hagadonu Au, ma e-aha maa Au ne-hai agu mogobuna logowaahee i-mua nadau golomada?

14:12  Au ga-hagaduadua digaula gi tau-magi damana e-daaligi digaula. Gei goe, Au gaa-hai goe tamana ni tenua koia e-aamua gi-nonua, ge koia e-dogologowaahee i digaula.”

14:13  Moses ga-helekai gi Dimaadua, “Goe ne-daa-mai gi-daha digau aanei mo Egypt gi o mogobuna. Digau Egypt ma-ga-longono dau mee dela ne-hai ang-gi au daangada aanei,

14:14  gei digaula ga-hagi-anga gi digau ala e-noho i tenua deenei. Nia daangada aanei la-gu-longono-ginaadou bolo Goe, Meenei Dimaadua, le e-madalia gimaadou, i dau hai dela e-hanaga hagammaa i-mua madau golomada i-di madagoaa dau baahi gololangi dela ma-gaa-noho i madau mua i-nia laangi, be dau hai labelaa dela e-hana i madau mua i-di waduu-gololangi i-di aa, ge i-di waduu-ahi i-di boo.

14:15  Malaa, Goe ma-ga-daaligi au daangada aanei huogodoo, gei digau tenua deenei ga-longono ga-helekai boloo,

14:16  ‘Dimaadua la-deai ono mogobuna ai, belee wanga gi ana daangada tenua a-Mee dela ne-hagababa ang-gi digaula, deelaa di mee ne-hidi-ai-ei Mee ga-daaligi digaula i-lodo di anggowaa.’

14:17  Meenei Dimaadua, Goe la-gi-haga-modongoohia-aga nia mahi o mogobuna, heia dau mee dela ne-hagababa-mai gi gimaadou i au helekai aanei,

14:18  ‘Go-Au go Dimaadua, Au e-manawa hila-gi-lala, e-dumaalia, gei e-aloho-hua beelaa. Au e-dumaalia ang-gi nia huaidu mo-di hai-baahi o-nia daangada, gei Au ga-hagaduadua nia dama mo nadau dama gaa-dae-loo gi-di tolu mo-di haa adu-dangada i-nia huaidu o nadau damana.’

14:19  Goe manawa-dumaalia-anga, gei dumaalia ang-gi nia huaidu o digau aanei, be-di hai o do aloho aamua dee-odi, gadoo be dau hai dela guu-hai ang-gi digaula mai i-di nadau hagatanga mai i Egypt.”

14:20  Dimaadua ga-helekai, “Au gu-dumaalia ang-gi digaula, be dau hai dela ne-dangi-mai.

14:21  Gei Au e-hagamodu i dogu ingoo mo ogu madamada dela e-haga-honu henuailala, boloo:

14:22  Deai dahi dangada i-mehanga digau aanei e-mee di-ulu gi-lodo tenua deenei ai. Ma e-aha maa digaula guu-mmada gi ogu mogobuna mo ogu madamada ala ne-hai i-lodo Egypt mo lodo di anggowaa, gei digaula gu-hai-baahi-mai gi-di-Au haga-logowaahee, ge hagalee hagalongo-mai gi-di-Au.

14:23  Digaula hagalee loo e-ulu gi-lodo tenua deenei dela gu-hagababa ko-Au ang-gi nadau damana-mmaadua. Deai dahi dangada i ginaadou ala ne-haga-balumee Au, e-ulu gi-lodo ai.

14:24  Dagu dangada hai-hegau go Caleb dela ne-haga-modongoohia-aga dana hagadilinga mouli-gee mo-di manawa-dahi mai gi-di-Au, deenei dagu mee gaa-lahi a-mee gi-lodo tenua dela ne-hagadina go mee, gei dono madawaawa ga-hai-mee gi tenua deelaa.

14:25  Digau Amalek mo digau Canaan e-noho dolomeenei i-nia gowaa baba, malaa, daiaa gei goodou ga-hagatanga gaa-huli gi-muli laa-lodo di anggowaa gi-di Malua o Aqaba.”

14:26  Dimaadua ga-helekai gi Moses mo Aaron,

14:27  “Dehee di waalooloo o digau dogologo huaidu aanei i-di nadau hai-tamu Au? Au guu-buhi i dagu hagalongolongo gi nadau helekai hai-baahi.

14:28  Wanga-ina agu helekai gi digaula aanei boloo, ‘Au gu-hagamodu i dogu ingoo bolo Au gaa-hai-adu gi goodou go tagadilinga la-hua dela gu-longono-e-Au mai i godou baahi. Ko-Au go Dimaadua dela e-helehelekai.

14:29  Goodou gaa-mmade, gei godou huaidina la-ga-modoho i-lodo di anggowaa deenei, idimaa i-di godou helekai hai-baahi mai gi-di-Au. Deai dahi dangada i goodou e-madua nia ngadau e-madalua gaa-huli gi-nua e-ulu gi-lodo tenua deelaa ai.

14:30  Au gu-hagamodudahi ogu lodo bolo Au ga-haga-noho goodou i tenua deelaa, gei deai dahi dangada i goodou e-ulu ai, dela-hua go Caleb mo Joshua.

14:31  Goodou gu-helehelekai bolo godou dama gaa-kumi i tauwa, aanei go digaula ala ga-haga-ulu ko-Au gi-lodo tenua dela guu-bae go goodou gi-daha. Digaula ga-hai-mee gi tenua deelaa.

14:32  Gei goodou, goodou e-hai-loo gii-mmade i-lodo di anggowaa deenei.

14:33  Godou dama la-gaa-hai nia hagaloohi-siibi, ga-heehee i-lodo di anggowaa i-nia ngadau e-mada-haa, deelaa di hui ni di-godou de-hagalongo, gaa-dae-loo gi goodou huogodoo ma-gaa-mmade.

14:34  Goodou gaa-kae di hagaduadua i godou huaidu i-lodo nia ngadau e-mada-haa, di ngadau e-dahi ang-gi di laangi e-dahi i-nia laangi mada-haa ala ne-hagadina-ai tenua deelaa go goodou, bolo gi-modongoohia-ai goodou di hai o dagu hai-baahi adu gi goodou.

14:35  Au e-hagamodu bolo Au gaa-hai di mee deenei ang-gi digau huaidu huogodoo ala e-buni bolo ginaadou e-hai-baahi mai gi-di-Au. Goodou huogodoo la-gaa-mmade i-lodo di anggowaa deenei, ko-Au go Dimaadua dela e-helehelekai.’ ”

14:36  Nia daane a Moses ala ne-hagau belee hagadina tenua deelaa, la-ne-lloomoi gaa-hai nadau helekai tilikai, deelaa ne-hidi-ai digau Israel gu-hai-tamu Dimaadua mo-di hai-baahi ang-gi Mee.

14:37  Gei Dimaadua ga-daaligi digau hagau aanei gi-di magi gii-mmade.

14:38  Mai digau hagadina e-madangaholu maa-lua aalaa, aalaa-hua go Caleb mo Joshua ala ne-dubu, digi mmade.

14:39  Di madagoaa Moses ne-haga-modongoohia ang-gi digau Israel nia helekai a Dimaadua aanei, gei digaula gu-daamada gu-manawa-gee huoloo.

14:40  Ga-hooaga heniheni-loo dono daiaa, digaula gaa-hula belee hai-henua gi-di gowaa gonduu, ga-helekai, “Gidaadou gaa-hula gi-di gowaa Dimaadua ne-hagababa mai gi gidaadou. Gidaadou gu-iloo bolo gidaadou la-gu-ihala.”

14:41  Moses ga-helekai, “Ma di-aha dela e-de-hagalongo-ai goodou gi Dimaadua dolomeenei? Goodou hagalee maaloo!

14:42  Goodou hudee hula, idimaa, Dimaadua hagalee madalia goodou. Goodou ga-haga-magedaa go godou hagadaumee.

14:43  Goodou ma-ga-heebagi gi digau Amalek mo digau Canaan, goodou gaa-mmade. Idimaa goodou gu-huli gi-daha mo Dimaadua, deenei gaa-hidi-ai-ei Mee ga-hagalee madalia goodou.”

14:44  Digaula gu-hula-hua gi-hongo tenua gonduu, ma e-aha maa Tebedebe o-di Hagababa Dimaadua mo Moses digi hagatanga gi-daha mo lodo di waahale-laa deelaa.

14:45  Malaa, digau Amalek mo digau Canaan ala nogo noho i tenua gonduu deelaa, guu-hula gu-heebagi gi digaula, gu-haga-magedaa digaula, gu-waluwalu digaula gaa-dae-loo gi Hormah.