Kapingamarangi - Numbers - 23

23:1  Balaam ga-helekai gi Balak, “Hauhia au gowaa dudu tigidaumaha e-hidu i-di gowaa deenei, gei goe gaamai gi-di-au nia kau-daane e-hidu ge hidu siibi-daane.”

23:2  Balak gu-haga-gila-aga tangidangi Balaam, gei meemaa gu-tigidaumaha di-nau kau-daane mo di-nau siibi-daane i-hongo nia gowaa dudu-tigidaumaha dagidahi.

23:3  Balaam ga-helekai gi Balak, “Goe gaa-noho i-baahi dau tigidaumaha-dudu deenei, gei au e-hana gi Dimaadua e-mmada be Mee ga-heetugi-mai gi-di-au. Malaa, nia mee huogodoo a-Mee ma-ga-helekai-mai gi-di-au, gei au ga-hagi-adu gi-di-goe.” Balaam guu-hana gi-hongo di gonduu,

23:4  gei God ga-heetugi gi Balaam i-di gowaa deelaa, gei Balaam ga-helekai-anga, “Au guu-hau agu gowaa hai-tigidaumaha e-hidu gu-tigidaumaha, di kau-daane e-dahi ge dahi siibi-daane i-hongo nia gowaa hai-tigidaumaha dagidahi aalaa.”

23:5  Dimaadua ga-helekai, “Hana gi-baahi o Balak, hai gi mee i agu helekai ala ne-hai-adu gi-di-goe.”

23:6  Balaam gaa-hana, ga-heetugi gi Balak e-noho-hua i-baahi dana tigidaumaha-dudu madalia nia dagi o Moab huogodoo.

23:7  Balaam ga-helekai-aga nnelekai kokohp aanei: “Balak di king o Moab ne-gahi-mai au i Syria, mai nia gonduu bahi-i-dua, ga-helekai, ‘Hanimoi, hagamaamaa au, goe haga-halauwa-ina digau Israel.’

23:8  E-hai behee? Au e-haga-halauwa di mee a God dela digi haga-halauwa? Deeai! E-hai behee? Au e-hagadugina gi-di mee a Dimaadua dela hagalee hagadugina ginai? Deeai!

23:9  I-hongo nia hadugalaa nnoonua, gei au e-mee di-mmada gi digau Israel. I-hongo nia gonduu, gei au e-mee di-mmada gi digaula. Digaula la tenua guu-tuu mada-ginaadou, gei koia e-haadanga-lamalia i-nia henua ala i-golo.

23:10  Di madawaawa Israel le e-dogologowaahee be nia gelegele, e-deemee di-dau. Di hagaodi gi-muli dogu mouli bolo gii-hai hualaa be-di made o tangada i-nia dama a God. Di hagaodi gi-muli dogu mouli gii-hai be-di hagaodi gi-muli o digau hai-hegau donu ala e-noho i-di aumaalia!”

23:11  Balak ga-helekai gi Balaam, “Ma di-aha dela ne-hai kooe mai gi-di-au? Au ne-gahi-mai goe belee haga-halauwa ogu hagadaumee, gei goe dela-hua ne-hagahumalia digaula!”

23:12  Balaam ga-helekai, “Au e-mee-hua di-helekai i-nia mee a Dimaadua ne-gaamai gi-di-au bolo gi-helekai-ai.”

23:13  Balak ga-helekai gi mee, “Gidaua gaa-hula gi-di gowaa dela i-golo, gii-mmada goe gi hunu gau hogoohi o Israel, gei goe ga-haga-halauwa digaula i-di gowaa deelaa.”

23:14  Mee gaa-lahi a Balaam gi-lodo di gowaa maalama go Zophim dela i-hongo di Gonduu Pisgah. Mee gaa-hau labelaa ana gowaa dudu-tigidaumaha e-hidu i-di gowaa deelaa, gaa-hai dana tigidaumaha gi-di kau-daane ge tei siibi-daane i-hongo nia gowaa hai-tigidaumaha dagidahi.

23:15  Balaam ga-helekai gi Balak, “Goe gaa-noho i-baahi dau tigidaumaha deenei, au e-hana-malaa e-heetugi gi God i-golo.”

23:16  Dimaadua ga-heetugi gi Balaam ga-helekai-anga, “Hana gi-baahi o Balak, helekai gi mee i agu helekai ala e-hai-adu gi-di-goe.”

23:17  Balaam gaa-hana ga-heetugi gi Balak e-noho hua igolo i-baahi dana tigidaumaha-dudu madalia nia dagi Moab. Balak ga-heeu be Dimaadua ne-helekai bolo-aha.

23:18  Balaam ga-helekai-aga i-nia kokohp aanei: “Balak, tama Zippor, hanimoi malaa, goe hagalongo gi-humalia gi dagu mee dela ga-helekai-ai.

23:19  God la-hagalee hai be tangada dela e-helekai tilikai, ge hagalee hai be tangada dela e-huli ana maanadu. Mee gaa-hai dana hagababa i dahi mee, ge-Ia e-haga-gila-aga di-maa. Mee e-helekai-hua, gei di-maa guu-hai.

23:20  Mee gu-helekai-mai gi-di-au bolo au gi-haga-maluagina-ina-aga. Di mee a God gu-haga-maluagina-aga, gei au e-deemee di-huli.

23:21  Au digi gida dahi mee huaidu i-baahi digau Israel, be di haga-haingadaa i-di madagoaa ga-hanimoi maalia. Dimaadua, go di-nadau God le e-madalia digaula. Digaula e-haga-modongoohia-aga bolo Mee go di-nadau king.

23:22  God gu-laha-mai digaula gi-daha mo Egypt, gei e-madamada-humalia i digaula i-lodo tauwa, gadoo be-di kau-daane lodo-geinga dela e-maaloo-dangihi.

23:23  Deai di buubuu e-mee di-hai ang-gi digau Israel ai. Deenei di madagoaa nia daangada e-helekai-aga i-di hai o digau Israel boloo, ‘Mmada gi-di mee haga-goboina a God dela guu-hai ang-gi ana daangada!’

23:24  Teenua o Israel gu-duu-aga gi-nua gadoo be-di laion maaloo-dangihi! Mee hagalee noho gaa-dae-loo gi dana daaligi ana manu, gaa-gai nia goneiga mo-di inu nia dodo o ana manu ala ne-daaligi.”

23:25  Balak ga-helekai gi Balaam, “Ma goe hagalee haga-halauwa digau Israel, gei goe hudee hagahumalia-ina digaula labelaa!”

23:26  Balaam ga-helekai gi Balak, “Au guu-lawa di-helekai-adu gi-di-goe bolo au ne-belee hai nia mee huogodoo a Dimaadua ala ne-helekai-mai gi-di-au bolo gi-heia.”

23:27  Balak ga-helekai-anga, “Hanimoi malaa, au gaa-lahi goe gi tuai gowaa. Holongo God ga-hiihai bolo goe gi-haga-halauwa-ina digaula i-di gowaa deelaa.”

23:28  Gei mee gaa-lahi a Balaam gi-di ulu di Gonduu Peor, dela e-mmada-adu laa-hongo di anggowaa deelaa.

23:29  Balaam ga-helekai-anga, “Hauhia au gowaa dudu-tigidaumaha e-hidu i ginei, goe gaamai-laa gi-di-au nia kau-daane e-hidu ge hidu siibi-daane.”

23:30  Balak gu-haga-gila-aga nia mee a Balaam ne-helekai ang-gi deia, gaa-hai dana tigidaumaha gi-nia kau-daane mono siibi-daane i-hongo nia gowaa dudu tigidaumaha dagidahi.