Kapingamarangi - Numbers - 21

21:1  Di madagoaa di king o Arad tangada o Canaan, dela nogo noho i-bahi-i-ngaaga tenua deelaa, ne-longono-ia bolo digau Israel gu-lloomoi i-hongo di ala o Atharim, geia ga-heebagi gi digaula, ga-lawalawa hunu gau i digaula.

21:2  Digau Israel gaa-hai di-nadau hagababa ang-gi Dimaadua, ga-helekai, “Maa Goe gaa-dugu-mai digau aanei gi-lala madau mogobuna, gei gimaadou ga-hagadabu digaula adu gi-di-Goe, mo-di hagammaa gi-hagalee digaula ngaadahi mo nadau waahale.”

21:3  Dimaadua gu-longono-Ia digau Israel, gei Mee gaa-wanga digau Canaan gi-lala nadau mogobuna. Digau Israel gu-hagammaa digaula la-gi-hagalee ngaadahi mo nadau waahale. Deelaa di mee ne-haga-ingoo di gowaa deelaa bolo Hormah.

21:4  Digau Israel gu-hagatanga mai gi-daha mo-di Gonduu Hor, e-hula i-di ala dela e-hana gi-di Malua o Aqaba, ga-haganiga tenua go Edom, gei nia daangada gu-hagalee manawa hagakono ang-gi nadau haingadaa.

21:5  Digaula gu-daamada guu-hai nadau donu gi God mo Moses ga-helekai gi Moses, “Ma e-aha dela goe ne-laha-mai gimaadou gi-daha mo Egypt bolo gii-mmade i-lodo di anggowaa deenei, di gowaa deai ono meegai mono wai ai? Gimaadou e-buhi nia meegai huaidu aanei!”

21:6  Gei-ogo Dimaadua ga-hagau ana gihaa poisin gi-baahi digaula gi-gadigadia digaula. Digau Israel dogologo guu-mmade.

21:7  Digaula gaa-hula gi-baahi o Moses ga-helekai-anga, “Gimaadou gu-ihala ang-gi Dimaadua mo adu gi-di-goe labelaa, i-di madau tamu goolua. Goe dalodalo-ina gi Dimaadua gi-daawa gi-daha nia gihaa huaidu aanei.” Malaa, Moses gu-dalodalo i digaula.

21:8  Dimaadua ga-helekai gi Moses, “Heia dau gihaa baalanga, daudaulia gi-nua i-di ulu di laagau. Tangada dela gu-gadigadi go di gihaa, gaa-mmada gi-di-maa, geia gu-mouli.”

21:9  Malaa, Moses gaa-hai dana gihaa baalanga-mmee, ga-daudau gi-nua gi tomo di laagau. Maa tangada gu-gadigadi go di gihaa gaa-mmada gi-di gihaa baalanga, geia gu-humalia, gu-mouli.

21:10  Digau Israel ga-hagamenege ga-haga-duu-aga nadau hale-laa i Oboth.

21:11  I-muli di-nadau hagatanga i-di gowaa deelaa, digaula ga-haga-duu nadau hale-laa i-di Gowaa Mooho o Abarim i-di anggowaa i-bahi-i-dua tenua digau Moab.

21:12  Nomuli gei digaula gaa-noho i-di gowaa mehanga gonduu o Zered.

21:13  Mai di gowaa deelaa, gei digaula ga-haga-maanege labelaa gi-di bahi-i-ngeia di Monowai Arnon, i-lodo di anggowaa e-dau-adu gi-lodo tenua digau Amor. (Di monowai Arnon la-go tagageinga i-mehanga digau Moab mo digau Amor.)

21:14  Deelaa di hai e-helekai-ai Di Beebaa Dauwa a Dimaadua boloo, “...tama waahale go Waheb i-lodo di gowaa o Suphah, mo nia gowaa paba, mo-di monowai Arnon,

21:15  mo nia daalinga nia gonduu o-nia gowaa paba ala e-loo-adu-loo gi-di waahale o Ar, gaa-tugi-loo gi tagageinga o Moab.”

21:16  Mai i-golo, digaula gaa-hula gi-di gowaa e-gahi bolo “Nia Monowai-Hali”, di gowaa Dimaadua ne-helekai-ai gi Moses boloo, “Haga-dagabuli-mai nia daangada gi-di gowaa e-dahi, gei Au gaa-wanga nia wai gi digaula.”

21:17  Di madagoaa deelaa, gei digau Israel gaa-huwa taahili deenei: “Nia monowai, uwa-mai godou wai, gei gimaadou ga-tenetene gi taahili.

21:18  Di monowai dela ne-geli go nia king mo nia dagi o-nia daangada, la-ne-geli gi togodogo di king mo nia dogodogo nia dagi.” Nomuli, gei digaula gaa-hula gi-daha mo di anggowaa gaa-hula gi Mattanah,

21:19  gaa-hula labelaa gi Nahaliel, gei mai Nahaliel gaa-hula gi Bamoth,

21:20  mai Bamoth gaa-hula gi-di gowaa mehanga gonduu i tenua digau Moab, bahi-i-lala di ulu di Gonduu Pisgah, e-gileia gi-di anggowaa.

21:21  Digau Israel ga-hagau nadau daangada gi-di king o Amor go Sihon belee helekai boloo:

21:22  “Dugua-mai gi gimaadou gii-hula laa-lodo do henua. Gimaadou mo madau manu la-hagalee tanga gi-daha mo-di ala gaa-hula gi-lodo godou gowaa mo godou hadagee-waini, ge hagalee inu nia wai mai godou monowai. Gimaadou e-hai-hegau-hua gi-di ala damana gaa-dae-loo gi-di-madau tanga gi-daha mo do henua.”

21:23  Gei Sihon digi dumaalia gi digau Israel e-hula laa-lodo dono henua. Mee ne-hagabudu ana gau-dauwa, gaa-hula gi Jahaz i-di anggowaa ga-heebagi gi digau Israel.

21:24  Gei digau Israel gu-daaligi nadau gau dogologo i-lodo tauwa, gaa-noho i-hongo tenua digaula mai di monowai Arnon dela i-bahi-i-ngeia i-di monowai Jabbok, guu-dau-adu gi tagageinga tenua digau Ammon, idimaa tagageinga digau Ammon la-guu-duuli gi-maaloo-dangihi.

21:25  Gei digau Israel la-guu-kumi nia waahale huogodoo digau Amor, ngaadahi mo Heshbon mo nia waahale huogodoo ala i dono baahi, gei digaula guu-noho i-lodo nia maa.

21:26  Heshbon la-go di waahale dagi o-di king o Ammon go Sihon, dela ne-heebagi gi-di king Moab nomua, gaa-kumi ono gowaa gaa-tugi-loo i-di monowai Arnon.

21:27  Deelaa e-hai-ai taahili deenei boloo: “Goodou lloomoi gi Heshbon, di waahale di king Sihon! Gimaadou e-hiihai e-mmada gi-di-maa e-haga-duu-aga e-hau hoou.

21:28  Tolongo e-dahi, gei digau-dauwa o Sihon ne-hula gi-daha mo-di waahale go Heshbon guu-hai gadoo be-di ahi, gaa-oho di waahale go Ar i Moab mo-di haga-huaidu nia gonduu bahi-i-nua di monowai Arnon.

21:29  E-huaidu-adu gi goodou nia daangada o Moab! Goodou ala e-dadaumaha gi Chemosh, goodou gu-mooho gi-daha! Di-godou god la-guu-hai godou daangada gii-llele gi-daha mo nadau henua, gei nia ahina guu-kumi go di king o Amor.

21:30  Gei dolomeenei nia hagadili digaula la-gu-daaligi gi-daha, mai loo i Heshbon gaa-tugi-loo gi Dibon, mai Nashim gaa-tugi-loo gi Nophah, hoohoo gi Medeba.”

21:31  Malaa, nia daangada Israel guu-noho i-lodo tenua o digau Amor,

21:32  gei Moses ga-hagau ana daangada e-hagadina di ala e-humalia e-heebagi gi-di waahale go Jazer. Digau Israel guu-kumi di-maa mo ono waahale i dono gili, ga-hagabagi gi-daha digau Amor ala e-noho i-golo.

21:33  Nomuli, gei digau Israel gaa-huli gaa-hula laa-lodo di ala e-hana gi Bashan, gei di king Og o Bashan ga-loomoi mo ana llongo gau-dauwa belee heebagi gi digaula i Edrei.

21:34  Dimaadua ga-helekai gi Moses, “Hudee madagu i mee. Au gaa-hai goe gi-maaloo i mee, mo ana daangada huogodoo, mo dono henua. Heia dau hai gi mee gadoo be dau hai ne-hai gi Sihon, di king o Amor dela nogo dagi i Heshbon.”

21:35  Malaa, digau Israel ga-daaligi Og gii-made, mo ana dama-daane, mo ana daangada huogodoo, digi dugu ana daangada hagamouli, ga-nomuli digaula ga-hai-mee gi tenua o-maa.