Kapingamarangi - Numbers - 20

20:1  Digau Israel huogodoo gaa-dau-loo gi-lodo di Anggowaa o Zin i tahi malama, gei digaula gaa-noho i-golo i Kadesh, deelaa hogi di gowaa ne-made a Miriam gaa-danu-ai.

20:2  Nia wai guu-odi i-di gowaa deelaa, gei digaula ga-mmui-mai gi-baahi o Moses mo Aaron,

20:3  ga-hai-baahi ang-gi meemaa, ga-helekai, “Maa nei bolo gimaadou ne-madalia madau duaahina gau Israel ala ne-mmade i-mua di Hale-laa Dimaadua la koia e-humalia.

20:4  Goolua ne-laha-mai gimaadou gi-lodo di anggowaa deenei eiaha? Bolo gii-mmade gimaadou mo madau manu i-di gowaa deenei?

20:5  Goolua ne-laha-mai gimaadou gi-daha mo Egypt ga-laha-mai gi-lodo di guongo huaidu deenei eiaha? Di gowaa deai ono mee tomo no-lodo ai, nia huwa-laagau-‘wheat’ ai, nia laagau-‘fig’ ai, nia waini ai, nia laagau-‘pomegranate’ ai, deai hogi nia wai dulii belee inu ai!”

20:6  Moses mo Aaron ga-menege gi-daha mo-di hagabuulinga daangada deelaa, gaa-hula gi-di bontai o-di Hale-laa Dimaadua. Meemaa ga-dogoduli gi-lala i-hongo di gelegele, gei di madamada o Dimaadua gu-gila-mai gi meemaa.

20:7  Dimaadua ga-helekai gi Moses,

20:8  “Kae-ina togodogo dela i-mua Tebedebe o-di Hagababa, gei goe mo do duaahina go Aaron, goolua haga-dagabuli-mai digau Israel huogodoo. I-mua nia golomada digaula huogodoo, gei goolua ga-helekai gi-di hadugalaa deelaa, gei nia wai ga-malingi-mai. Deenei di-gulu hai e-hai e-haga-hali-mai nia wai mai i-lodo tadugalaa ang-gi nia daangada mo nadau manu gi-inu.”

20:9  Malaa, Moses gaa-hana gaa-kae togodogo deelaa, be-di hai a Dimaadua ne-helekai-ai.

20:10  Moses mo Aaron ga-haga-dagabuli-mai nia daangada huogodoo gi-mua tadugalaa deelaa, gei Moses ga-helekai gi digaula, “Goodou hagalongo! Goodou e-hamaaloo godou lodo! Ma e-hai behee, gimaua gi-haga-hali-ina nia wai la-gi-daha mo-di hadugalaa deenei belee inu-ai goodou?”

20:11  Gei Moses gaa-kumi togodogo deelaa ga-hagamaawa tadugalaa deelaa haga-lua, gei nia wai gu-malingi-mai. Digaula huogodoo mo nadau manu gu-inu.

20:12  Dimaadua ga-helekai gi Moses mo Aaron, “Idimaa gulu hagadonu la-hagalee dohu ang-gi di-gulu hagadele ogu mogobuna dabuaahia i-mua digau Israel, goolua hagalee dagi digaula gi-lodo tenua dela ne-hagababa ko-Au ang-gi digaula.”

20:13  Di mee deenei ne-hai i-lodo Meribah, di gowaa digau Israel nogo hai-baahi ang-gi Dimaadua, gei deelaa di gowaa a-Mee ne-haga-modongoohia Ia ang-gi digaula bolo Ia le e-dabu.

20:14  Moses ga-hagau ana gau kae-hegau gi-di king o Edom mai i Kadesh, ga-helekai, “Tangidangi deenei mai oo gau, nia madawaawa Israel. Goe gu-iloo di hai o-nia haingadaa ala guu-dae-mai gi gimaadou.

20:15  Di hai o madau maadua-mmaadua di-nadau hula gi Egypt, mo di-nadau hai nogo noho i-di gowaa deelaa i-nia ngadau e-logo, gei digau Egypt nogo haga-hagahuaidu madau maadua-mmaadua aalaa, mo gimaadou labelaa.

20:16  Gimaadou nogo gahigahi Dimaadua gi-hagamaamaa-ina gimaadou, gei Mee gu-hagalongo-mai gi gimaadou, gu-hagau-mai gi gimaadou tangada di-langi dela ne-dagi gimaadou gi-daha mo Egypt. Malaa, dolomeenei gimaadou e-noho i Kadesh, di waahale i-di mada o do henua.

20:17  Goe manawa dumaalia, dumaalia-mai gi gimaadou, gimaadou e-hula laa-lodo do henua. Gimaadou mo madau kau hagalee hula laa-lodo godou hadagee, be lodo godou hadagee-waini. Gimaadou hagalee e-inu nia wai mai i godou monowai-geli. Gimaadou gaa-hula i-hongo di ala damana, gaa-dae-loo gi madau hula gi-daha mo do henua.”

20:18  Digau Edom ga-helekai, “Gimaadou hagalee dumaalia-adu gi goodou gii-hula i-lodo di-madau henua. Maa goodou gaa-hula laa-lodo di-madau henua, gei gimaadou gaa-hai di-madau dauwa adu gi goodou.”

20:19  Digau Israel ga-helekai, “Gimaadou e-hula-hua i-hongo di ala damana. Maa gimaadou mo madau manu ga-inu godou wai, gei gimaadou ga-hui-adu gi goodou. Deenei hua di-madau mee e-hiihai ginai, bolo gimaadou e-hula laa-lodo do henua.”

20:20  Digau Edom ga-helekai labelaa gaa-hai, “Deeai! Goodou hagalee hula laa-lodo di-madau henua.” Gei digaula gaa-hula mo nadau buini-dauwa maaloo-dangihi belee heebagi gi digau Israel.

20:21  Idimaa digau Edom hagalee hiihai gi digau Israel e-hula laa-lodo di-nadau henua, gei digau Israel gu-hula-hua i tuai ala.

20:22  Digau Israel huogodoo gu-hagatanga mai gi-daha mo Kadesh, guu-hula guu-dau i-di Gonduu Hor,

20:23  dela i tagageinga o Edom. Dimaadua ga-helekai gi Moses mo Aaron i-di gowaa deelaa,

20:24  “Aaron ga-hagalee ulu gi-lodo tenua dela ne-hagababa ko-Au belee wanga gi digau Israel. Mee gaa-made, idimaa goolua gu-hai-baahi gi agu helekai i Meribah.

20:25  Lahia Aaron mo dana dama-daane go Eleazar gi-hongo di Gonduu Hor.

20:26  Goe ga-daa gi-daha nia gahu dangada aamua hai-mee-dabu o Aaron, ga-haga-gahu Eleazar, idimaa Aaron la-gaa-made i-di gowaa deelaa.”

20:27  Moses gu-haga-gila-aga nia mee huogodoo Dimaadua ala ne-helekai-ai. Digaula guu-hula gi-hongo di Gonduu Hor i-mua nia golomada o-nia daangada huogodoo.

20:28  Moses ga-daa gi-daha nia gahu tangada aamua hai-mee-dabu o Aaron, ga-haga-gahu a Eleazar. Gei Aaron guu-made i-di gowaa deelaa, i-hongo di gonduu. Moses mo Eleazar ga-lloo-ia gi-lala mo-di gonduu deelaa.

20:29  Digau Israel guu-longo bolo Aaron la-guu-made, gei digaula gu-tangitangi i-nia laangi e-motolu.