Kapingamarangi - Numbers - 15

15:1  Dimaadua gaa-wanga gi Moses

15:2  nnaganoho aanei belee daudali go digau Israel i tenua dela gaa-wanga go Mee gi digaula:

15:3  Di kau-daane, siibi-daane, be-di kuudi e-mee di-wanga gi Dimaadua e-hai-ai tigidaumaha dudu, be tigidaumaha o-di haga-gila-aga di hagababa, be tigidaumaha e-hiihai bolo e-hai di wanga-dehuia, be tigidaumaha o-di hai-daumaha. Nia hauiha o-nia tigidaumaha meegai aanei le e-haga-manawa-tenetene ginai Dimaadua.

15:4  Be goai hua dela ma-gaa-hai dana tigidaumaha dudu gi siibi be-di kuudi ang-gi Dimaadua le e-gaamai ana pauna palaawaa e-lua gu-unugi gi-nia lolo-olib dalia di manu e-dahi, e-hai-ai tigidaumaha huwa-laagau, ngaadahi mo nia paini waini e-lua.

15:5  Be goai hua dela ma-gaa-hai dana tigidaumaha dudu gi siibi be-di kuudi ang-gi Dimaadua le e-gaamai ana pauna palaawaa e-lua gu-unugi gi-nia lolo-olib dalia di manu e-dahi, e-hai-ai tigidaumaha huwa-laagau, ngaadahi mo nia paini waini e-lua.

15:6  Maa siibi-daane dela e-hai-ai tigidaumaha, nia pauna e-haa palaawaa gu-unugi gi-nia paini lolo-olib e-dolu, le e-wanga labelaa gi Mee e-hai-ai tigidaumaha o-nia huwa-laagau,

15:7  madalia labelaa nia paini waini e-dolu. Nia hauiha o-nia tigidaumaha aanei e-haga-tenetene di manawa Dimaadua.

15:8  Di kau daane ma-gaa-wanga gi Dimaadua e-hai-ai tigidaumaha dudu be e-haga-gila-aga di hagababa, be e-hai-ai tigidaumaha o-di hagadaubuni,

15:9  gei nia pauna e-ono palaawaa gu-unugi gi-nia paini lolo-olib e-haa le e-wanga labelaa gi Mee,

15:10  mo nia paini waini e-haa. Nia hauiha o-nia tigidaumaha aanei le e-haga-tenetene di manawa Dimaadua.

15:11  Aanei nia mee ala e-wanga gi Dimaadua dalia nia kau-daane, siibi-daane, kuudi-daane, nia dama-siibi be nia damaa-kuudi ma-ga-tigidaumaha.

15:12  Ma-ga-tigidaumaha nia manu e-logo i-di manu e-dahi, gei nia mee ala e-hai dalia nia maa le e-haga-mada-logo labelaa, e-hai-hegau gi-nia hagatau aalaa.

15:13  Digau Israel donu huogodoo e-hai gii-hai di mee deenei i-di-nadau madagoaa ma-gaa-hai nadau tigidaumaha meegai, e-hauiha kala e-haga-manawa lamalia ang-gi Dimaadua.

15:14  Di-ingoo-hua di madagoaa ma-gaa-noho digau mai i-daha i godou baahi, noho bodobodo be noho beelaa gi-muli, gei digaula e-hai tigidaumaha meegai, e-hauiha kala e-haga-manawa lamalia ang-gi Dimaadua, digaula e-hai gi-haga-gila-aga nnaganoho hua aalaa.

15:15  Nia madagoaa huogodoo ala e-loomoi, goodou mo digau mai i-daha ala ma-gaa-noho i godou baahi e-hai gi-daudali nnaganoho aanei. Goodou mo digaula e-hai-hua be-di mee dahi i-mua nia golomada Dimaadua.

15:16  Go nnaganoho hua aanei ala e-hai-hegau goodou mo digaula.

15:17  Dimaadua gaa-wanga gi Moses

15:18  nnaganoho aanei belee daudali go digau Israel i tenua dela gaa-wanga go Mee gi digaula:

15:19  Di-ingoo-hua nia meegai ala ma-gaa-hai i-golo le e-gai, hunu maa e-dugu gi-daha ang-gi Dimaadua.

15:20  Goodou ma-gaa-dunu godou palaawaa mai godou huwa-laagau, di palaawaa matagidagi le e-wanga gi Dimaadua. Deenei e-hai di-godou wanga-dehuia hagalabagau mai godou huwa-laagau ala nogo haga-madammaa go goodou.

15:21  Nia madagoaa huogodoo ala ma-ga-loomoi, di wanga-dehuia deenei le e-wanga gi Dimaadua mai i godou palaawaa ala e-dunu.

15:22  Gei dolomaa dahi dangada ma-ga-dibaiaa-hua ga-hagalee daudali hunu haganoho aanei ala ne-wanga go Dimaadua gi Moses,

15:23  gei dolomaa i-lodo di madagoaa dela e-hanimoi, gei nia daangada digi heia nia mee huogodoo ala ne-helekai-ai Dimaadua mai baahi o Moses.

15:24  Maa di hala la-ne-hai idimaa nia daangada la de-iloo-ginaadou, digaula e-dahi-aga di-nadau damaa-kau e-hai-ai tigidaumaha dudu e-hauiha kala e-haga-manawa lamalia ang-gi Dimaadua, dalia tigidaumaha huwa-laagau mo waini ala e-tau-anga. Digaula e-hai gi-tigidaumaha labelaa di kuudi-daane e-hai-ai tigidaumaha e-wwede nadau huaidu.

15:25  Tangada hai-mee-dabu gaa-hai taumaha o-di haga-madammaa o digau Israel, gei nia huaidu digaula ga-maahede, idimaa di hala la-hagalee di mee ne-haga-maanadu bolo e-hai, di-mee hua ne-dibaiaa, gei digaula la-ne-gaamai nadau tigidaumaha e-wwede nadau huaidu, guu-hai tigidaumaha o-nia meegai ang-gi Dimaadua.

15:26  Digau Israel huogodoo mo digau mai i-daha ala e-noho i nadau baahi, le e-dumaalia ginai, idimaa digaula huogodoo ne-dibaiaa-hua guu-tale gi-di hala deelaa.

15:27  Maa tei goodou ga-dibaiaa-hua gaa-hala ge digi maanadu bolo ia e-hai di hala deelaa, ia e-hai gi-tigidaumaha dana kuudi-ahina guu-dahi dono ngadau, e-hai-ai tigidaumaha wwede nia huaidu.

15:28  Tangada hai-mee-dabu e-hai taumaha i-di gowaa dudu-tigidaumaha e-hagamadammaa tangada gi-daha mo ono hala, gei tangada la-gu-dumaalia ginai ono huaidu.

15:29  Taganoho la-hua deenei dela e-hai-hegau ang-gi digau huogodoo ala ma-ga-ihala, hagalee hilihili be digaula la digau Israel donu, be digau mai i-daha ala e-noho i Israel.

15:30  Gei tangada dela ma-gaa-hai dana mee hala, ge gu-iloo-ia di mee ne-hai, hagalee hilihili be mee tangada donu o Israel be mee tangada mai i-daha, mee gu-ihala i-di haga-balumee a Dimaadua, gei mee e-daaligi gii-made,

15:31  idimaa tangada la-gu-haga-balumee nnelekai Dimaadua, gu-haga-hai-gee ana haganoho. Ia e-bida hai-mee-hua gi dono made.

15:32  Di madagoaa digau Israel nogo i-lodo di anggowaa, taane e-dahi gaa-gida nogo hagabudu ana dohomu i-di Laangi-Sabad.

15:33  Taane deenei guu-lahi gi Moses, Aaron mo nia daangada huogodoo,

15:34  gaa-dugu e-hagaloohi, idimaa digi modongoohia be di-maa di-aha e-hai gi mee.

15:35  Dimaadua ga-helekai gi Moses, “Taane deenaa e-hai gi-daaligi gii-made; digau Israel huogodoo la-gi-dilidilia a-mee gii-made i-daha mo-di gowaa e-noho-ai goodou.”

15:36  Malaa, digau Israel gaa-lahi a-mee gi-tua di-nadau waahale-laa, ga-dilidili a-mee gii-made gii-hai be nnelekai Dimaadua.

15:37  Dimaadua ga-helekai gi Moses

15:38  bolo gi-helekai gi digau Israel: “Heia nia ‘tasel’ i-nia madaaduge o godou gahu, wanga-ina di loahi halatee gi-nia mee humu mee aalaa. Goodou e-hai di hai deenei i-nia madagoaa huogodoo ala ga-loomoi.

15:39  Nia ‘tasel’ aalaa e-hai nia mee hagalangahia; goodou ma-gaa-mmada gi-nia maa, gei goodou ga-langahia agu helekai huogodoo, ga-daudali nia maa, ga-hagalee huli gi-daha mo Au, bolo e-daudali godou hiihai.

15:40  Nia ‘tasel’ e-haga-langahia bolo goodou gi-daudalia agu haganoho huogodoo, gei goodou gaa-hai nia daangada ni-aagu.

15:41  Au go Yihowah go di-godou God dela ne-lahamai goodou i Egypt belee hai di-godou God. Au go Yihowah, go di-godou God.”