Kapingamarangi - Numbers - 18

18:1  Dimaadua ga-helekai gi Aaron, “Goe mo au dama-daane, mo digau Levi e-kae di hagaduadua gi godou hegau ihala ala ma-gaa-hai go goodou gi-muli i-lodo di Hale-laa dela e-noho-iei Au no-lodo; gei ma kooe hua mo au dama-daane ala e-kae di hagaduadua gi godou mee hala ala e-hai go goodou i-lodo godou hegau hai-mee dabu.

18:2  Laha-mai godou duaahina, ala go di madawaawa Levi, e-ngalua dalia goodou e-hagamaamaa goodou i-di madagoaa goe mo au dama-daane ma-ga-ngalua i-lodo di Hale-laa.

18:3  Digaula e-hai gii-hai nadau waawa-hegau adu gi-di-goe, mo nadau waawa ang-gi di Hale-laa, gei digaula hagalee bilibili gi-nia mee haga-madagu ala i-lodo di Gowaa-Dabu be gi-di gowaa dudu-tigidaumaha. Maa digaula gaa-bili gi-nia maa, gei digaula mo goe ga-daaligi gii-mmade.

18:4  Digaula e-ngalua dalia goe e-hai nnegau huogodoo i-lodo di Hale-laa, gei digau ala i-golo la-hagalee ngalua dalia goe.

18:5  Kooe hua mo au dama-daane ala e-hai nnegau i-lodo di Gowaa-Dabu mo-di gowaa dudu-tigidaumaha, gi-dee hai-hua labelaa dogu hagawelewele gi-nia daangada Israel.

18:6  Ma ko-Au dela ne-hilihili oo gau go digau Levi mai i-lodo digau Israel be nia wanga-dehuia adu gi goodou. Digaula gu-haga-dabu mai gi-di-Au, bolo gii-mee di-hai nadau hegau i-lodo di Hale-laa.

18:7  Ge di-ma kooe hua mo au dama-daane ala e-hai nnegau huogodoo o digau hai-mee-dabu i-di gowaa dudu-tigidaumaha mo nia goloo ala i-lodo di Gowaa Dabuaahia Huoloo. Nia mee aanei la nia waawa ni goodou, idimaa Au gu-gowadu gi goodou di wanga-dehuia o-di waawa hegau hai-mee-dabu. Tangada digi haga-mogobuna ma-ga-hanimoi gi-hoohoo gi-nia mee haga-madagu le e-daaligi gii-made.”

18:8  Dimaadua ga-helekai gi Aaron, “Heia gi-langahia bolo Au e-gowadu nia mee huogodoo ala ne-gaamai gi-di-Au, ala digi duungia be nia tigidaumaha. Au e-gowadu nia maa gi goodou mo godou hagadili e-hai tuhongo ni goodou gaa-hana-hua beelaa.

18:9  Nia tigidaumaha aanei ala koia e-haga-madagu ala digi duungia i-hongo di gowaa dudu tigidaumaha la tuhongo ni goodou: tigidaumaha huwa-laagau, tigidaumaha wwede nia huaidu, mo nia tigidaumaha ala e-haga-donu nia hala. Nia mee huogodoo ala ne-gaamai gi-di-Au be nia tigidaumaha haga-madagu, la nia mee ni-aau mo au dama-daane.

18:10  Goodou e-hai gii-gai nia mee aanei i-di gowaa dabu, go nia daane hua e-gai nia maa.

18:11  “Nia mee labelaa digau Israel ma-ga-gaamai gi-di-Au la nia mee ni goodou. Au e-gowadu nia mee aanei gi-di-goe, mo au dama-daane, mo au dama-ahina, tugi dolomeenei gaa-hana-hua beelaa. Digau huogodoo o do madahaanau ala e-madammaa ang-gi di hai daumaha e-mee di-gai nia maa.

18:12  “Au e-gowadu gi goodou nia huwa-laagau kaedahi humalia ala e-gaamai go digau Israel i-lodo nia ngadau: nia lolo-olib, mono waini, mo nia huwa-laagau.

18:13  Nia mee huogodoo ni goodou. Digau huogodoo o godou madahaanau ala e-madammaa e-mee di-gai nia maa.

18:14  “Nia mee huogodoo i Israel ala ne-haga-dabu mai gi-di-Au la nia mee ni goodou.

18:15  Nia dama ulu-mmaadua mo nia manu ulu-mmaadua huogodoo o digau Israel ala ma-ga-gaamai bolo e-haga-dabu la nia mee ni goodou. Goodou hai gii-kumi nia hui o-nia dama ulu-mmaadua ala belee lahi gi-muli, mo nia hui nia ulu-mmaadua mo nia manu ala hagalee mmaa.

18:16  Nia hui o-nia dama dagi-dahi nadau malama ala e-hui belee lahi gi-muli, le e-hui gi-nia silber e-lima gi-di hui dela gu-haga-noho.

18:17  Ge nia ulu-mmaadua o-nia kau, nia siibi mo nia kuudi hagalee hui e-kae gi-muli, digaula la nia mee ni-aagu e-hai-ai nia tigidaumaha. Kilia nadau dodo gi-di gowaa dudu-tigidaumaha gaa-dudu nadau kiliidi e-hai-ai tigidaumaha meegai, ono hauiha e-haga-tenetene mai gi-di-Au.

18:18  Nia goneiga nia maa la nia mee ni goodou, e-hai gadoo be tadahada mo-di wae gau-donu mugi-muli o-nia tigidaumaha hagalabagau la nia mee ni goodou.

18:19  “Au e-gowadu gi-di-goe, mo au dama-daane, mo au dama-ahina ang-gi nia madagoaa huogodoo ala e-loomoi, go nia tigidaumaha huogodoo ala e-gaamai go digau Israel gi-di-Au. Deenei la di hagababa e-deemee di-mooho dela ne-hai-adu ko-Au gi-di-goe mo o hagadili.”

18:20  Dimaadua ga-helekai gi Aaron, “Goe hagalee hai do duhongo gowaa bolo e-hai-mee ginai goe, ge deai di gowaa i Israel e-gowadu gi goodou ai. Ma go-Au go Yihowah dela belee hai-mee ginai goodou.”

18:21  Dimaadua ga-helekai, “Au guu-wanga gi digau Levi nia dahi baahi madangaholu o nadau mee huogodoo ala e-tigidaumaha mai gi-di-Au go digau Israel. Deenei le e-hui nadau hegau nogo madamada-humalia di Hale-laa dela e-noho-iei Au.

18:22  Digau Israel ala i-golo hagalee hai gi-loomoi gi-hoohoo gi-di Hale-laa, gei di-maa gaa-hai beenei gei digaula gaa-kae di hagaduadua o-di mmade.

18:23  Tugi dolomeenei gaa-huli gi-muli, go digau hua Levi ala e-madamada-humalia di Hale-laa, e-hai nia waawa-hegau huogodoo o-di Hale-laa. Deenei taganoho e-noho beelaa gi-muli dela e-dau labelaa gi godou hagadili. Digau Levi hagalee hai-mee gi-nia gowaa i Israel,

18:24  idimaa Au guu-wanga gi digaula dahi baahi madangaholu o-nia mee digau Israel ala e-gaamai gi-di-Au. Deelaa tadinga dagu hai gi digaula bolo ginaadou hagalee hai-mee gi-nia gowaa i Israel.”

18:25  Dimaadua ga-helekai gi Moses

18:26  bolo gi-helekai beenei gi digau Levi: “Goodou ma-gaa-kae dahi baahi madangaholu mai i-nia tigidaumaha o digau Israel ala e-gowadu go Dimaadua e-hai godou mee, goodou e-wanga e-dahi baahi madangaholu o-nia maa gi Dimaadua, e-hai-ai di-godou wanga-dehuia hagalabagau ang-gi Dimaadua.

18:27  Nia mee aanei e-tongaadahi gi-nia tigidaumaha huwa-laagau mo nia waini hoou ala e-hai go digau hai huwa-laagau.

18:28  Deenei di hai e-hai godou tigidaumaha hagalabagau ang-gi Dimaadua mai nia tigidaumaha huogodoo ala e-gaamai go goodou i digau Israel. Gei goodou gaa-wanga gi Aaron nia tigidaumaha hagalabagau aanei ala ne-wanga gi Dimaadua.

18:29  Goodou wanga-ina gi mee nia wanga-dehuia ala e-kaedahi e-humalia mai i-nia mee ala ne-kae go goodou.

18:30  I-muli di-godou wanga nia mee humalia, goodou ga-hai-mee gi-nia mee ala e-dubu, e-hai gadoo be tangada dogi-mee dela e-hai-mee gi-nia mee ala ne-dubu i ana tigidaumaha.

18:31  Goodou mo godou madahaanau e-mee di-gai nia mee ne-dubu i di-ingoo-hua di gowaa, idimaa, deenei di hui o godou hegau i-lodo di Hale-laa.

18:32  Goodou hagalee hala ma-gaa-gai nia mee aanei i goodou guu-wanga nia mee humalia gi Dimaadua, ge goodou gii-pula i goodou gi-de hagamilimilia nia wanga-dehuia dabu digau Israel i-di-godou miami i-nia maa i-mua di wanga nia mee ala koia e-humalia. Goodou ma-gaa-hai beenei, gei goodou gaa-mmade.”