CSlElizabeth - Psalms - 85

85:1  Приклони, Господи, ухо Твое, и услыши мя: яко нищь и убог есмь аз.

85:2  Сохрани душу мою, яко преподобен есмь: спаси раба Твоего, Боже мой, уповающаго на Тя.

85:3  Помилуй мя, Господи, яко к Тебе воззову весь день.

85:4  Возвесели душу раба Твоего: яко к Тебе взях душу мою.

85:5  Яко Ты, Господи, благ и кроток и многомилостив всем призывающым Тя.

85:6  Внуши, Господи, молитву мою и вонми гласу моления моего.

85:7  В день скорби моея воззвах к Тебе, яко услышал мя еси.

85:8  Несть подобен Тебе в бозех, Господи, и несть по делом Твоим.

85:9  Вси языцы, елики сотворил еси, приидут и поклонятся пред Тобою, Господи, и прославят имя Твое:

85:10  яко велий еси Ты и творяй чудеса, Ты еси Бог един.

85:11  Настави мя, Господи, на путь Твой, и пойду во истине Твоей: да возвеселится сердце мое боятися имене Твоего.

85:12  Исповемся Тебе, Господи Боже мой, всем сердцем моим и прославлю имя Твое в век:

85:13  яко милость Твоя велия на мне, и избавил еси душу мою от ада преисподнейшаго.

85:14  Боже, законопреступницы восташа на мя, и сонм державных взыскаша душу мою, и не предложиша Тебе пред собою.

85:15  И Ты, Господи Боже мой, щедрый и милостивый, долготерпеливый и многомилостивый и истинный,

85:16  призри на мя и помилуй мя: даждь державу Твою отроку Твоему и спаси сына рабы Твоея.

85:17  Сотвори со мною знамение во благо: и да видят ненавидящии мя, и постыдятся, яко Ты, Господи, помогл ми и утешил мя еси.