TpiKJPB - Revelation of John - 19

19:1  ¶ Na bihain long ol dispela samting mi harim wanpela bikpela nek bilong planti manmeri long heven, i spik, Aleluya. Pasin bilong kisim bek, na glori, na ona, na pawa, i go long Bikpela, God bilong yumi.

19:2  Long wanem, tru na stretpela em ol kot bilong em. Long wanem, em i bin jasim dispela bikpela pamuk meri, husat i bin bagarapim dispela graun wantaim ol pamuk pasin bilong em, na em i bin bekim pe nogut long tingim blut bilong ol wokboi bilong em long han bilong meri.

19:3  Na gen ol i tok, Aleluya. Na smuk bilong meri i kirap i go antap oltaim oltaim na oltaim.

19:4  Na dispela 24 lapun hetman na dispela fopela animal i pundaun na lotuim God husat i sindaun long sia king, i spik, Amen. Aleluya.

19:5  ¶ Na wanpela nek i kam ausait long sia king, i spik, Givim biknem long God bilong yumi, olgeta yupela ol wokboi bilong em, na yupela husat i pret long em, man nating na bikman wantaim.

19:6  Na mi harim samting olsem nek bilong wanpela traipela lain tru, na olsem nek bilong ol planti wara, na olsem nek bilong planti strongpela klaut i pairap, i spik, Aleluya. Long wanem, God Bikpela i gat olgeta pawa i bosim kingdom.

19:7  Larim yumi stap amamas na wokim amamas tru, na givim ona long em. Long wanem, marit bilong Pikinini Sipsip i kam, na meri bilong em i bin mekim em yet redi.

19:8  Na long em God i tok orait long em i ken putim naispela klos long naispela laplap, klinpela na waitpela. Long wanem, laplap i naispela tru em i stretpela pasin bilong ol seint.

19:9  Na em i tokim mi, Raitim, Blesing i stap long ol husat ol i singautim long marit kaikai bilong Pikinini Sipsip. Na em i tokim mi, Ol dispela em ol trupela toktok bilong God.

19:10  Na mi pundaun long tupela lek bilong em long lotuim em. Na em i tokim mi, Lukluk gut long yu no mekim dispela. Mi stap wanwok bilong yu, na bilong ol brata bilong yu husat i gat testimoni bilong Jisas. Lotuim God. Long wanem, testimoni bilong Jisas em i spirit bilong tok profet.

19:11  ¶ Na mi lukim heven i op, na lukim, wanpela waitpela hos, na em husat i sindaun antap long en ol i kolim Man Yu Inap Bilip Long Em na Tru, na long stretpela pasin em i jasim na wokim bikpela pait.

19:12  Tupela ai bilong em i olsem lait bilong paia, na antap long het bilong em planti hat king i stap. Na em i gat wanpela nem em i raitim, i no gat man i save long dispela, em em yet tasol.

19:13  Na em i werim klos long wanpela naispela klos ol i putim liklik long blut. Na nem bilong em ol i kolim Tok bilong God.

19:14  Na ol dispela ami i stap long heven i bihainim em antap long ol waitpela hos, na werim ol laplap i naispela tru, waitpela na klinpela.

19:15  Na wanpela bainat i sap i go ausait long maus bilong em, inap long wantaim dispela em i ken paitim ol kantri. Na em bai bosim ol wantaim wanpela stik ain. Na em i krungutim masin bilong krungutim wain bilong strongpela pasin na belhat tru bilong God i Gat Olgeta Strong.

19:16  Na em i gat long naispela klos bilong em na long antap bilong lek bilong em wanpela nem ol i raitim, KING BILONG OL KING, NA BIKPELA BILONG OL BIKPELA.

19:17  Na mi lukim wanpela ensel i sanap long ai bilong san. Na em i singaut wantaim wanpela bikpela nek, i spik long olgeta pisin husat i flai long namel bilong heven, Kam na bungim yupela yet wantaim i go long kaikai bilong dispela nambawan God.

19:18  Inap long yupela i ken kaikai mit bilong ol king, na mit bilong ol kepten, na mit bilong ol strongpela man, na mit bilong ol hos, na bilong ol husat i sindaun antap long ol, na mit bilong olgeta man, friman na slevman wantaim, man nating na bikman wantaim.

19:19  Na mi lukim dispela animal, na ol king bilong dispela graun, na ol ami bilong ol, i bung wantaim long wokim bikpela pait i birua long em husat i sindaun antap long hos, na i birua long ami bilong em.

19:20  Na ol i kisim dispela animal, na wantaim em dispela giaman profet husat i wokim ol mirakel long ai bilong em, wantaim ol dispela em i bin giamanim ol husat i bin kisim mak bilong dispela animal, na ol husat i lotuim piksa bilong em. Dispela tupela ol i tromoi, taim ol stap laip, i go insait long wanpela raunwara paia i kuk wantaim ston salfa.

19:21  Na hap lain i stap yet em i kilim i dai wantaim bainat bilong em husat i sindaun antap long hos, dispela bainat i kam ausait long maus bilong em. Na olgeta pisin i pulap wantaim mit bilong ol.