Kapingamarangi - Zechariah - 8

8:1  Dimaadua di Gowaa Aamua guu-wanga nia helekai aanei gi Zechariah,

8:2  “Au nogo hiihai huoloo di hagamaamaa Jerusalem idimaa i dogu aloho damanaiee i ana daangada, di aloho dela ne-hai Au gi-hagawelewele gi ono hagadaumee.

8:3  Au ga-hanimoi labelaa gi dogu waahale dabuaahia go Jerusalem, gaa-noho i-golo. Di waahale la-ga-modongoohia bolo di waahale manawa-dahi, gei di gowaa nnoonua a Dimaadua di Gowaa Aamua ga-hagaingoo bolo di gowaa nnoonua hagamadagu.

8:4  Nia daane mo nia ahina mmaadua ala e-heehee gi-nia dogodogo, digaula gaa-noho labelaa i-hongo nia gowaa nohonoho i-lodo di waahale.

8:5  Nia ala laa-lodo di guongo ga-deeoo nia dama-daane mo nia dama-ahina e-dadaagala.

8:6  “Di mee deenei e-hai be di mee e-deemee di-hai i-baahi digau o tenua ala e-dubu dolomeenei, gei di-maa di mee e-mee i dogu baahi.

8:7  Au ga-laha-mai agu daangada i-nia henua ala ne-lahi ginai agu daangada,

8:8  ga-laha-mai digaula mai dua mo dai, gaa-noho i Jerusalem. Digaula gaa-hai agu daangada, gei Au gaa-hai di God ni digaula, gaa-dagi digaula i-di manawa-dahi mo-di tonu.

8:9  “Goodou gi-maaloo! Dolomeenei gei goodou e-hagalongo gi-nia helekai la-hua ala nogo helehelekai-ai nia soukohp i-di madagoaa di baba hagamau ne-haganoho belee haga-hoou labelaa dogu Hale Daumaha.

8:10  I-mua di madagoaa deelaa, e-deai dahi dangada e-mee di-hui dana dangada, be di manu e-ngalua, e-deai tangada e-mee di-moholo i ono hagadaumee. Au guu-hai nia daangada gii-bida hai-baahi i nadau mehanga.

8:11  Malaa, dolomeenei, gei dagu hai ang-gi digau ala ne-dubu i-lodo tenua deenei le e-hagalee hai be dagu hai i-mua.

8:12  Digaula gaa-dogi nadau laagau meegai i-lodo di aumaalia. Nadau laagau-waini gaa-huwa nia golee, nia gelegele gaa-huwa ono laagau, tenua ga-uwauwa, nia wai ga-logowaahee. Au ga-hagahumalia nia daangada o dogu henua ala ne-dubu gi-nia maluagina aanei.

8:13  Nia daangada o Judah mo Israel! Digau mai i-daha i-mua nogo hagadau haga-halauwa ginaadou, boloo, ‘Di lauwa dela ne-tale gi Judah mo Israel, gi hagalauwa-ina goe!’ Malaa, Au ga-benebene goodou, gei digau mai i-daha ga-hagadau helekai i nadau mehanga, ‘Nia hagahumalia ala ne-wanga gi Judah mo Israel gi-hai-mee ginai goe!’ Malaa, goodou gi-maaloo, hudee mmaadagu.”

8:14  Dimaadua di Gowaa Aamua e-helekai, “Di madagoaa godou maadua-mmaadua ne-hai Au gi-hagawelewele, Au gu-hagamamaanadu belee hagahuaidu digaula, gei Au hagalee huli dagu hagamaanadu, gaa-hai gii-gila.

8:15  Malaa, dolomeenei gei Au e-hagamamaanadu belee hagahumalia nia daangada o Jerusalem mo Judah. Malaa, goodou hudee mmaadagu.

8:16  Aanei nia mee belee hai go goodou: Hagadau helekai di tonu i godou mehanga. I-lodo nia gowaa hai-gabunga, hagamodongoohia-aga di tonu, go di tonu dela e-gaamai di noho di aumaalia.

8:17  Hudee hai bilaan e-bida hagahuaidu goodou. Hudee hagi-aga tilikai i-lala di hagamodu. Au e-hagadugina gi-nia helekai tilikai, hai-baahi gi-di tonu, mo taaligi dangada.”

8:18  Dimaadua di Gowaa Aamua guu-wanga nnelekai aanei gi Zechariah,

8:19  “Nia hagaonge ala ne-hai i-lodo di haa, di lima, di hidu mo di madangaholu malama gaa-huli gaa-hai nia laangi budu hagatenetene mo manawa lamalia ang-gi nia daangada o Judah. Goodou e-hai-loo gi-aloho di tonu mo-di aumaalia.”

8:20  Dimaadua di Gowaa Aamua e-helekai, “Di madagoaa i-golo e-dau-mai gei nia daangada mai nia waahale e-logo ga-lloomoi gi Jerusalem.

8:21  Nia daangada mai di waahale e-dahi ga-helekai gi-nia daangada mai di waahale dela i-golo, ‘Gimaadou ga-daumaha gi Dimaadua di Gowaa Aamua, ga-dalodalo gi ono hagahumalia. Lloomoi madalia gimaadou!’

8:22  Nia daangada dogologo mo nia henua maaloo ga-lloomoi gi Jerusalem e-daumaha gi Dimaadua di Gowaa Aamua mo-di dalodalo gi Mee gi-hagahumalia-ina ginaadou.

8:23  I-lodo nia laangi aalaa, digau dogo madangaholu mai nia henua i-daha ga-lloomoi gi dahi dangada o Jew, ga-helekai, ‘Gimaadou e-hiihai e-buni-adu gi-lodo di-godou gowaa dela e-hula ginai, idimaa gimaadou gu-hagalongo bolo God e-madalia goodou.’ ”