Geez - Deuteronomy - 17

17:1  ወኢትሡዑ ፡ ለእግዚአብሔር ፡ አምላክክሙ ፡ ላህመ ፡ አው ፡ በግዐ ፡ ዘቦቱ ፡ ነውረ ፡ ላዕሌሁ ፡ ኵሉ ፡ ነገር ፡ እኩይ ፤ ርኩስ ፡ ውእቱ ፡ በኀበ ፡ እግዚአብሔር ፡ አምላክከ ።

17:2  ወለእመኒ ፡ ተረክበ ፡ በውስተ ፡ [አሐቲ ፡] እምነ ፡ አህጉሪ[ከ] ፡ ዘወሀበከ ፡ እግዚአብሔር ፡ አምላክከ ፡ ብእሲ ፡ አው ፡ ብእሲት ፡ ዘይገብር ፡ እኩየ ፡ ቅድመ ፡ እግዚአብሔር ፡ አምላክከ ፡ እለ ፡ ተዐወሩ ፡ ሕጎ ፤

17:3  ወሖሩ ፡ ወአምለኩ ፡ ባዕደ ፡ አማልክተ ፡ ወሰገዱ ፡ ሎሙ ፡ ለፀሐይ ፡ አው ፡ ለወርኅ ፡ አው ፡ እምውስተ ፡ ሰርጕሃ ፡ ለሰማይ ፡ ዘኢአዘዘከ ፤

17:4  ወእምከመ ፡ ሰማዕከ ፡ ተሐትት ፡ ጥቀ ፡ ወለእመ ፡ እሙነ ፡ ኮነ ፡ ዝንቱ ፡ ነገር ፡ ወኮነ ፡ ዝንቱ ፡ ርኩስ ፡ በውስተ ፡ እስራኤል ፤

17:5  ወታወጽኦ ፡ ለውእቱ ፡ ብእሲ ፡ ወእመኒ ፡ ብእሲት ፡ ይእቲ ፡ ወይወግርዎሙ ፡ በእብን ፡ ወይቅትልዎሙ ።

17:6  በክልኤቱ ፡ ሰማዕት ፡ ወሠለስቱ ፡ ሰማዕት ፡ ይመውቱ ፡ እለ ፡ ይመውቱ ፡ ወኢይመውቱ ፡ በአሐዱ ፡ ስምዕ ።

17:7  ወእደዊሆሙ ፡ ለውእቶሙ ፡ ሰማዕት ፡ ይቀድማ ፡ ቀቲሎቶሙ ፡ ወእምድኅሬሆሙ ፡ እደወ ፡ ኵሉ ፡ ሕዝብ ፡ ወታወፅእ ፡ እኩየ ፡ እምኔክሙ ።

17:8  ወለእመቦ ፡ ዘተስእነከ ፡ ቃል ፡ በውስተ ፡ ፍትሕ ፡ ዘማእከለ ፡ ደም ፡ ወደም ፡ ወማእከለ ፡ ንጹሕ ፡ ለአንጽሖ ፡ ወማእከለ ፡ ላኳ ፡ ወላኳ ፡ ቃለ ፡ ፍትሕ ፡ በውስተ ፡ አህጉሪክሙ ፡ ትትነሣእ ፡ ወተዐርግ ፡ ውስተ ፡ መካን ፡ ዘኀርየ ፡ እግዚአብሔር ፡ አምላክከ ፡ ከመ ፡ ይሰመይ ፡ ስሙ ፡ በህየ ።

17:9  ወተሐውር ፡ ኀበ ፡ ካህናት ፡ ሌዋውያን ፡ ወኀበ ፡ መኳንንት ፡ እለ ፡ ሀለው ፡ በውእቶን ፡ መዋዕል ፡ ወት[ሴ]አል ፡ ወያየድዑከ ፡ ፍትሐ ።

17:10  ወትገብር ፡ በከመ ፡ ቃል ፡ ዘነገሩከ ፡ በውእቱ ፡ መካን ፡ ዘኀርየ ፡ እግዚአብሔር ፡ ይሰመይ ፡ ስሙ ፡ በህየ ፡ ወዕቀብ ፡ ኵሎ ፡ ከመ ፡ ትግበር ፡ ዘመሀሩከ ፡ ሕጎ ።

17:11  ወበከመ ፡ ፍትሑ ፡ ዘነገሩከ ፡ ግበር ፡ ወኢትትገሐስ ፡ እምነ ፡ ቃል ፡ ዘነገሩከ ፡ ኢለየማን ፡ ወኢለፀጋም ።

17:12  ወዝክቱሰ ፡ ብእሲ ፡ ዘገብረ ፡ በትዕቢት ፡ ከመ ፡ ኢይትአዘዝ ፡ ለካህን ፡ [ዘ]ይቀውም ፡ ወይገብር ፡ በስሙ ፡ ለእግዚአብሔር ፡ አምላክከ ፡ አው ፡ ለመኰንን ፡ ዘሀለወ ፡ በውእቶን ፡ መዋዕል ፡ ለይሙት ፡ ውእቱ ፡ ብእሲ ፡ ወአሰስሉ ፡ እኩየ ፡ እምነ ፡ እስራኤል ።

17:13  ወኵሉ ፡ ሕዝብ ፡ ሰሚዖ ፡ ይፍራህ ፡ ወኢይድግም ፡ እንከ ፡ አብሶ ።

17:14  ወለእመኒ ፡ ቦእከ ፡ ውስተ ፡ ምድር ፡ እንተ ፡ ይሁበከ ፡ እግዚአብሔር ፡ አምላክከ ፡ መክፈልተከ ፡ ወተወረስካሃ ፡ ወነበርከ ፡ ውስቴታ ፡ ወትቤ ፡ እሠይም ፡ ሊተ ፡ መልአከ ፡ ከመ ፡ ኵሉ ፡ አሕዛብ ፡ እለ ፡ አውድየ ፤

17:15  ወትሠይም ፡ ለከ ፡ መልአከ ፡ ዘኀርየ ፡ እግዚአብሔር ፡ አምላክከ ፡ እምውስተ ፡ አኀዊከ ፡ ወኢትክል ፡ ሠይመ ፡ ለከ ፡ ብእሴ ፡ ነኪረ ፡ እስመ ፡ ኢኮነ ፡ እኁከ ፤

17:16  ከመ ፡ ኢያብዝኅ ፡ ሎቱ ፡ አፍራሰ ፡ ወከመ ፡ ኢያግብኦ ፡ ለሕዝብ ፡ ውስተ ፡ ግብጽ ፡ እስመ ፡ እግዚአብሔር ፡ ይቤ ፡ ኢትድግም ፡ እንከ ፡ ገቢኦታ ፡ ለይእቲ ፡ ፍኖት ።

17:17  ወኢያብዝኅ ፡ ሎቱ ፡ አንስተ ፡ ወኢይሚጥ ፡ ልቦ ፡ ወኢያብዝኅ ፡ ሎቱ ፡ ወርቀ ፡ ወብሩረ ፡ ጥቀ ።

17:18  ወሶበ ፡ ነበረ ፡ ውስተ ፡ ምኵናኑ ፡ ለይጽሐፍ ፡ ሎቱ ፡ ዘንተ ፡ ዳግመ ፡ ኦሪተ ፡ ውስተ ፡ መጽሐፍ ፡ እምኀበ ፡ ካህናት ፡ ወሌዋውያን ።

17:19  ወይንቦር ፡ ኀቤሁ ፡ ወ[ያ]ንብብ ፡ ቦቱ ፡ በኵሉ ፡ መዋዕለ ፡ ሕይወቱ ፡ ከመ ፡ ይትመሀር ፡ ፍኖቶ ፡ ለእግዚአብሔር ፡ አምላኩ ፡ ወይዕቀብ ፡ ኵሎ ፡ ትእዛዞ ፡ ወይግበር ፡ ኵነኔሁ ፤

17:20  ከመ ፡ ኢያዕቢ ፡ ልቦ ፡ እምነ ፡ አኀዊሁ ፡ ወከመ ፡ ኢይኅድግ ፡ እምነ ፡ ትእዛዙ ፡ ለእግዚአብሔር ፡ አምላኩ ፡ ወኢይትገሐሥ ፡ ኢለየማን ፡ ወኢለፀጋም ፡ ከመ ፡ ያንኅ ፡ መዋዕለ ፡ በውስተ ፡ ምኵናኑ ፡ ወውእቱ ፡ ወውሉዱ ፡ በውስተ ፡ ደቂቀ ፡ እስራኤል ።